کوچ اهل بیت از قتلگاه
.
✍️ #زبدةالاشعار ✍️
.
🆔: @nohe_torki
.
مرحوم عاصی تبریزی
.
ای نعشی قالان عریان ای وای یارالی قارداش
بو جسمه باجون قربان ای وای یارالی قارداش
.
.
باخدوقجا سنه یاننام گوزدن توکرم قانیاش
نه نوعی دوزوم بولمم بو درده منی کلباش
بیر بیله یارا آخر کیم وردی سنه قارداش
اولموش بدنون شأن شأن ای وای یارالی قارداش
.
.
قالموش گورورم جسمون گون اوزره قوری یرده
یوخ بیر زادیم آخر من بو نعشه چکم پرده
باخدوقجا یانور کونلوم قلبیم گلوری درده
غم باغریمی ائیلوب قان ای وای یارالی قارداش
.
.
بو پیکر صد چاکون بیر حاله سالوب اعدا
بو ظلمی مسلمانه کافر ائلمز اصلا
آتلار ایاقی آتدا یکسر داغلوب اعضا
خاکیله اولوب یکسان ای وای یارالی قارداش
.
.
بو گلشن جسمونده هر بیر یارا بیر گلدور
اوخلار پر آچوب گویا بو سینه ده سنبلدور
هر تک تکی اطفالون بو گلشنه بلبلدور
بلبلر ائدور افغان ای وای یارالی قارداش
.
.
اولمادی دین هرکز بیر بیله یارا بسدی
قانه باتوب انصاری یوخدی کسی بیر کسدی
بیرجه دیگوروم آخر بارماقیوی کیم کسدی
ظلمونده ائدوب طغیان ای وای یارالی قارداش
.
.
قالموش قوری یرلرده عریان بدنون قارداش
نه غسل ویرن وار دور نه دفن ائدنون قارداش
بو خار و خس صحرا اولموش کفنون قارداش
یاننام دیرم هر آن ای وای یارالی قارداش
.
.
یوخدور داخی بیر کیمسه درد دلیمی بولسون
مشگلدی منیم بیرده دنیاده یوزوم گلسون
سس ویر سسیمه آخر آز قالدی باجون ئولسون
غم ائتدی منی حیران ای وای یارالی قارداش
.
.
قارداش یارالی جسمون بیر نوعی سویوب دشمن
هر قدر ساقام یاننام دلدن ائدرم شیون
نه باشدا وار عمامه اگنونده نه پیراهن
بی جلد قالوب قرآن ای وای یارالی قارداش
.
.
اوخ ، نیزه ، قلج زخمی وئرمیش سنه چوخ زحمت
قبره قویارام جسمون گر وئرسه عدو مهلت
نه دلده دوزوم واردور نه الده حسین فرصت
نیلیوم من سر گردان ای وای یارالی قارداش
.
.
یاننام ته دلدن من باخدوقجا بو احواله
ویرموم یوزومه سیلی ائتموم نئجه من ناله
هانسی شیل اولان اللر سالدی سنی بو حاله
ای پادشه عطشان ای وای یارالی قارداش
.
.
تا شمر شهید ائتدی قارداش سنی کام آلدی
اود وئردی خیم یاندی شیون حرمه سالدی
صحرایه قاچان قاچدی اود ایچره قالان قالدی
اولدی حرمون تالان ای وای یارالی قارداش
.
.
بولمم نه جری ائتدی بو فرقۀ گمراهی
سندن صورا ال آچدی سویدی حرم الهی
یکسر بالا قیزلارون عرشه اوجالوب آهی
اولموش هاموسی نالان ای وای یارالی قارداش
.
.
مدتدی بو درگهده «عاصی» چاغرور یا حق
صدقیله طلب ایلوب ای شه دیوری صدّق
سندن یتیشن بیر دم ، دم وئردی اونا مطلق
ائتدی بو سوزی عنوان ای وای یارالی قارداش
.
.
#کوچ_کربلا #عاصی_تبریزی
#ای_نعشی_قالان_عریان_ای_وای_یارالی_قارداش
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید