اربعین
.
✍️زبدةالاشعار✍️
.
🆔: @nohe_torki
.
مرحوم سعدی زمان
.
ای نهره باخوب جان ویرن عطشان آنام اوغلی
آواره باجون قبریوه قربان آنام اوغلی
.
قربان لبِ عطشانیوه زینب ، سو گتوردوم
قارداش سنه گوز جامی لبالب ، سو گتوردوم
.
.
بو دشتده سن یاندوروب عالم لری یاخدون
قان آخدی زبس ضعف ایلدون صاق سولا باخدون
یاندون سوسوزوندان سو دئدون هی سویا باخدون
هر یرده او گوندن که سو جامی اله آلّام
یانّام قوریان لبلریوی یادیمه سالّام
.
.
بیر سو گتوروب زینبون ای قبلۀ حاجات
دنیا بوئی بیر کیمسه نظیرین گوره هیهات
ای باشی سوسوز ذبح اولونان دور سو وئروم یات
حسرتله داخی ای شه عطشان سویا باخما
لب تشنه ئولن جانوه قربان سویا باخما
.
.
ای نوحین اولان فُلکده امّید نجاتی
وی خضره وئرن لعل لبی آب حیاتی
ای کاش گوروم قانه دونیدی بو فراتی
دریا کیمی موج ایلدی صحرالره آخدی
یاندوردی عطش سوزشی امّا سنی یاخدی
.
.
ای تشنه وئرن جان ایکی نهرین آراسیندا
قاندان گلِ توحید آچان گل یاراسیندا
بو ظلم جهانین گورنوبدور هاراسیندا
بیر تشنه یارالی سو یانندا سوسوز ئولسون
بیر قطره اگر ایستسه سو قاتلی گولسون
.
.
ای کاش یانوب گلشن ایجادی سولیدی
باغریم کیمی گل باغری بوتون قانه دولیدی
چون اولمادی قسمت سنه، سو آتش اولیدی
خاک اودلانوب افلاکه شراری دایانیدی
قلبیم کیمی بو گلشن ایجاد یانیدی
.
.
بیر بیله سنی سسلوری بو خانه سی ویران
سس ویرمیسن ای کَونی قویان صبرینه حیران
بو درد و بلا یورقونی زینب سنه قربان
یوخسا باجی نین حالینی قارداش خبر آلماز؟
قارداش کیمی هئچ کیم باجی نین قیدینه قالماز
.
.
واردور نظرونده او گون ای شافع محشر
قان ایچره چالوردون ال ایاق دورده لشگر
تاب ایلمدیم ای گلِ طاها منِ مضطر
گلدیم باشون اوسته باشوی شمر کسنده
گل سنده باشیم اوسته برادر من ئولن گون
.
.
بو چولده که سن نوش ایلدون جام شهادت
ال غارته آچدی سپه کفر و ظلالت
غارت نجه غارت بیزه یوز وئردی قیامت
اسلام نوامیسینه کفار ال آچدی
بیر باش حرم آهولری قارداش چوله قاچدی
.
.
بو فکریله ظلمین یتوره بلکه تمامه
سعد اوغلی حیا ائتمدی اود ووردی خیامه
صحرالره یوز قویدی خواتینِ تهامه
بیر غصّه منیم طاقت و آرامیمی آلدی
بیمار قاچا بُلمدی بیر خیمه ده قالدی
.
.
خیمه آلشوب یاندی برادر نجه یاندی؟
یاندیم سسی اطفالدن افلاکه دایاندی
بو قانه دونن قلبیمین آرامی تالاندی
قرآن مبین عترتی صحرایه داغیلدی
قرآن پوزولوب هر یره بیر آیه داغیلدی
.
.
گوردوم بدنون شامه گیدنده قالوب عریان
باشسیز بدنون دفن ایلیم اولمادی امکان
کیم ائتدی کفن جسموه زینب سنه قربان
کیم قبره قویوب باش داشینا آدوی یازدی
بو اسمه صفت اودلانان اکبادوی یازدی
.
.
دنیا بوئی بو قبری گورن ای شهِ عطشان
آگاه اولاجاق بوردا یاتان تشنه وئروب جان
قرخ مین نفر ایچره یوخوموش بیرجه مسلمان
بیر شربه سنه سو وئره اودلانمیا قلبون
سوزِ عطشوندن دوتوب اود یانمیا قلبون
.
.
من صبرده ایّوب دن عالی یره یتدیم
اؤز سینه می هر تیر بلایه سپر ائتدیم
منجر او یره اولدی ایشیم کوفیه گئتدیم
اول شهر که خاتونیدیم اوردا نچه مدّت
بی پایه منه یتدی همان شهرده محنت
.
.
بیر یر که اُناثی منه ایلردی تملُّق
الطافیمه مشمول اولان ایلردی تفوّق
اطفالیوه گتدی او یرین اهلی تصدّق
ای وای فلک گور منی نه گونلره سالدی
چوخ جای تعجبدی باجون ئولمدی قالدی
.
.
گوردوم گچوب اندازه دن اول قوم جفاده
منسوب ائدوللر حرمون اوزگه بیر آده
افکارینی خلقین دگیشم ائتدیم اراده
آتدیم اؤزیمی ، دین مبین قیدینه قالدیم
بیر نطقیمیله شهره بؤتون ولوله سالدیم
.
.
باشلاردی نجه خطبه آتام شاه ولایت
ایراد ایلدیم منده ایله خطبه او ساعت
ائتدیم او قَدَرقوم ستمکاری ملامت
هر کیم سسیمی آلدی ، گویه چخدی فغانی
یاد ایلدی منبرده آتام شیر خدانی
.
.
آندرودوم او قومه که بیز اسلامه فدایوق
قرآن تاپا رونق ، گله هر ظلم رضایوق
هر حالده بیز حامیِ احکام خدایوق
ای قوم ائدوب آل امیه سیزی گمراه
قرآندا بیزی پاک و منزّه سایوب الله
.
.
بو حالده قرآن سسوی نیزه دن آلدیم
عزّتله گئچن گونلریمی یادیمه سالدیم
شوریله بلالی باشیمی محمله چالدیم
بو مقصدیله حقّیله باطل آرالانسون
یاردیم باشیمی بلکه یاتان ملّت اویانسون
.
.
گوردوم باشوی نیزه ده چون نیر آفاق
آفاقه سالوب پرتو اسلامیله اشراق
افسوس دوتوب صورتوی قانیله توپراق
بُلدوم گجه خاکستر و خاک اوسته یاتوبسان
گوندوز واریدی قان گئجه توپراقه باتوبسان
.
.
تقریر ائدم گر ستم ابن زیادی
زهرا انامین عرشه چخار آه و فغانی
پیغمبریله بسکه واریدی چوخ عنادی
باخمادی باخور اهل حرم چشم تریله
ووردی یارالی باشوی تیغ فنریله
.
.
بُلمم نه دیوم کوفه دن ای خسرو خوبان
بیر عمر دئسم تاپمیاجاق محنتی پایان
اولدی یریمیز کوفۀ ویرانه ده زندان
زندان نجه زندان گونوزی لیلۀ ظلمت
اوردا بالالار یاتمادیلار بیر گجه راحت
.
.
یولّاردا نه لر چکدی خواتینِ تهامه
ذکر اولسا دونر صبح وصالیم گئنه شامه
چوخ زحمتیله شمر یتوردی بیزی شامه
اودلار دلیمی گلسه دیله شام جفاسی
طعن ائتدی بیزه شامده مکّه طُلَقاسی
.
.
گَلمز ستم آل امیه سانا قارداش
تک تک دیله گلسه یری وار دل یانا قارداش
اما هامی غم بیر یانا بو بیر یانا قارداش
شام اهلی دف اللرده تماشامیزه گلدی
بو قانه دونن قلبی شماتت اوخی دلدی
.
.
قارداش نه شکایت ائدورم رنج و عَنادن
نه قلبیمه هر گون وورولان تازه یارادن
فریاد یزید ایلین ایذاء و جفادن
دنیاده ایله شرم و حیاسیز بشر اولماز
ملعونه شجردن بلی نیکو ثمر اولماز
.
.
باشوندی گواهیم منیم ای شاهد عادل
الله شهیدیله بو شاهددی مقابل
نقصانِ جفا و ستمی ایلدی کامل
گه طعن و شماتت دلین اچدی منِ زاره
گاهی یارالی باشووا ووردی گینه یاره
.
.
بیر یاندان اولوب مستِ میِ کبر و ریاست
بیر یاندان ایدوب خمر اونون عقلینی غارت
گوردوم نه حیا ایلوری آنلور نه دیانت
اسلامه تمسخر ائدور اول فاسق و فاجر
افعالیله گفتاریله کفر ایلوری ظاهر
.
.
گَه بدر چولونده ئولن اشیاخی ائدور یاد
گه می ایچور اوینور گهی نرد اول ائوی برباد
گه ایستوری سجادی شهید ائتماقا جلاد
هئچ بُلموری نیلور او زنا زادۀ کافر
گه سویلوری نه دین و نه قرآن ، نه پیمبر
.
.
ایستوردی گهی پرچم تکفیر اوجاتسون
ایستوردی بیزی گاه کنیز آدینا ساتسون
ایستوردی قماریله گهی باده نی قاتسون
گاهی دو شش ایستوردی گلن دمده دو و پنج
غیظیله وئروردی یارالی باشوه چوخ رنج
.
.
ظلم آیه سینی ایلدی ناگه باشون ازبر
اثبات ایلدی حقی او ناحقّه برادر
گوردوم سُفَرایِ دُوَلِ خارجه یکسر
بیر بیرلرینه دگدیله باشلاندی بو عنوان
کیمدور بو کسوک باش که اوخور آیۀ قرآن
.
.
دوشدوم بو خیاله که ائدم مطلبی روشن
کفر آتشینه قویمیام اول دون وورا دامن
بی باک یزیده دئدیم ای خالقه دشمن
بی شرم و حیا دور هامی اولادِ اُمیَّه
کفریله مُخمَّر اولوب اکباد اُمیَّه
.
.
آز سلطنت و عزّتیوه ایله مباهات
آز وور او باشی ساخلا الون آز دئ خرافات
آز قالدی اؤزین ئولدوره ، ظالم علویّات
قوی دینی کناره ، بو مروّتدن اوزاقدور
آخر قوناقا حرمت ائده للر بو قوناقدور
.
.
قرآندا دیوب حق که ائدن جرمده اصرار
جرئت تاپار آیات خدانی ائده انکار
قالمور او قدر قهره گله قادر قهّار
الله سوزودور دوغرودور ای ظالم گمراه
تعیین ایلیوب دوزخی ظلم اهلینه الله
.
.
کِتفَینیوی کبریله ندن اوینادوسان سن
اظهار تَفَرعُن ائدوب الله دانوسان سن
بیزلر کیموق ای هنده نین اوغلی تانوسان سن؟
بیز عترت پیغمبروق اسلامه مُبلّغ
شأنینده گلوبدور اتامین آیۀ بلّغ
.
.
کافرسن آدون قویموسان اسلامه خلیفه
توهین ائدوسن فعلویله دین حنیفه
رحم ایلموسن عابدِ تب دار و نحیفه
گه غالب و مغلوب ائدوب عنوان دانوشورسان
گه دینی ائدوب مَلعَبه هذیان دانوشورسان
.
.
سن بیله بُلورسن بو تَفَرعُن بو ریاست
دنیاده سنه آرتوراجاق عزّ و شرافت
نه سنده نه جدّونده وار آثار اصالت
جدّه ندی سنون هنده جگرخوار و زناکار
زهرا منه مادردی بابام احمد مختار
.
.
بیر کس که اولا زانیه عالمده آناسی
فخر ایلیه بت بنده سی اولماقه آتاسی
بیر ایله کسین نه اولی شرمی نه حیاسی
شهزاده نی ساخلار قولی باغلی ایاق اوسته
ایلر دُرِ گنجینۀ اسراری شکسته
.
.
فکر ائتمه بنی هاشمه ائتدون یر اوزین تنگ
عزّت قازانوب اولدون اوزون صاحبِ اورنگ
قانیله یوولماز بُلوسن سیزده اولان ننگ
اؤز فعلویله عالمی غمگین ایلدون سن
تاریخده اوز آدیوی ننگین ایلدون سن
.
.
مَهلاً، دایان ای ظالم مغرور و ستمگر
مهلاً دایان اولسون شل او ظلم ایلین اللر
مهلاً که کمینگاهده دور حاکم داور
بیر گون اولاجاق حقّیله دیوان ائده جاقدی
کاخ ستمون عدلیله ویران اولاجاقدی
.
.
یابن الطُّلقا گور بودی مفهوم عدالت؟
اهل حرمون یکسر اولا پرده ده راحت
امّا قالا بی پرده خواتین رسالت
بیر بزمده که دوره ده وار گَبر و نصارا
قول باغلو ایاق اوسته قالا عترت طاها
.
.
ائتماقدان اؤتور نقص جنایاتوی کامل
بیر یرده وئروبسن حرم عصمته منزل
نه سقفی نه دیواری وار اولسون بیزه حایل
شام اهلی تماشایه گلور دسته بدسته
ایلولَّه تماشایه گلنلر بیزی خسته
.
.
ویرانه ده یوخ کیمسه بیزه مونس و غمخوار
آغلار گیجه لر صبحه کیمی عترت اطهار
انصافیدی گور آج یاتالار خرداجا قزلار
زندان اولا ویرانه خواتینِ حجازه
شام اهلی ولی باش قویالار بالشِ نازه
.
.
«سعدیِّ زمان» اشکیله هر وقت فریضه
یاز نهره باخوب جان وئرن عطشانه عریضه
بیر یر که اونون تربتی دارودی مریضه
بو جمع پریشانی چاقورسون اورا مهمان
عَمَّن دلیجه سن دئ اولار ایلسون افغان
.
.
#ای_نهره_باخوب_جان_ویرن_عطشان_آنام_اوغلی
#آثارالحسینی2 ص 275
#ترکی
.
✍️ #زبدةالاشعار ✍️
.
🆔: @nohe_torki
نظر دهید