شهادت خانم زینب (س) و گلایه او از فلک کجمدار
.
.
.
مرحوم نادری میانجی
.
ای چرخ فلک تازه جگر داغلیاجاقسان؟
حیدر قزینی سن نقدر آغلاداجاقسان؟
.
.
چوخداندی بو گوزیاشم اولوبدور یوزه جاری
زلفوم آغاروب، قد اگیلیب، رحم ایله باری
چکدون تزه دن شامه گئنه زینب زاری
گئچمشده همین شامده، چوخ آغلاموشام من
حسرتله رقیم گوزونی، باغلاموشام من
.
.
من کرب و بلا ایچره، ئورکدن یارالاندوم
بازار بو شام ایچره اوگون اودلارا یاندوم
چوخ ساعت، او دروازۀ ساعتده دایاندوم
چوخ اولدی منیم قلب پریشانیمه نسگیل
زهرا قزینا، وئردیله ویرانه نی منزل
.
.
غم قافله سی، کوی بلاده ورولاندا
عریان دوه اوستونده، رقیّم یورولاندا
خوار اولماقیما شامده مجلس قورولاندا
دورموشدی ایاق اوسته، او گون عصرین امامی
زهرا بالاسین، اوندا کنیز ایسته دی شامی
.
.
بو شامده خوار اولدی او ایل مکّه امیری
روپوش ایلدوم، قیزلاریما کهنه حصیری
کافر اولا گر دهریده، اینجتمز اسیری
شاد اولدی جگر خواره قزی شأنی اوجالدی
زهرا قزی زینب سارالوب، سولدی، قوجالدی
.
.
وقتی بیزی آزاد ایلدی لشگر کینه
گیتدوق وطنه تا گوزه گورسندی مدینه
چاتدی بو خبر، اوغلی ئولن ام بنینه
آچدی قولونی امّ بنین سسلدی یا رب:
اوغلانلاریم عبّاس و حسینیم، هانی زینب؟
.
.
الله بلور اوندا کسیلوب طاقت و تابیم
دنیا دولانوب باشه اشدّ اولدی عذابیم
اوغلانلار آناسینه منیم یوخدی جوابیم
قولسوز بالانین قلبی او ساعت سخیلاندا
ئولسون آناسی نیلدی آتدان یخیلاندا؟
.
.
گوردوم قورولوب اوردا، او گون محشر کبرا
تکیه ایلیوب جده سینه، آغلوری صغرا
قلبیمده دودوم یِت قزیوون دادینه زهرا
سسلندی هانی، سویله مسافرلریم عمّه؟
بس هاردادی گورسنمیر علی اکبریم عمّه؟
.
.
تُپراق باشیما واردی بو باشین نه بلاسی؟
بیر یاندا اوغول گوزلور، اباالفضلین آناسی
بیر یاندا دوروب، جعفر طیار بالاسی
از بس تانومور، زینب غم پروری گوزلور
اوغلانلارینی، یا منِ بی یاوری گوزلور
.
.
هر نحویدی دربندِ بنی هاشمه چاتدوم
آچدوم قاپونی عطرینی گوز یاشیمه قاتدوم
ایوای حسین وای، دیوب ال باشیمه آتدوم
هیچ باجیا دنیاده او گون، اولمیا قسمت
بیر عمریدی من بی کسه، قسمتدی بو ذلّت
.
.
بیر مدت او نوعی، منه یثرب وطن اولدی
همدم گجه گوندوز منه درد و محن اولدی
آرام دلیم، قانه باتان پیرهن اولدی
سالدون منی ای چرخ دنی نار و فراقه
چکدون گنه بو زینبی سن ملک عراقه
.
.
بو شامده قالماقلقا یوخ قلبیده طاقت
از بس که ائدوبلر منه شام اهلی شماتت
بُلمم ندی ای چرخ فلک سنده بو عادت
عزّتده اولان کسلره، ذلّت یارادارسان
ناکسلره بیجا یره، حرمت یارادراسان
.
.
غم موجه گلوب، قلب پریشانه دولاند
گل بوته سی ظلمیله، خزان وقتی سولاندا
قارداشلی باجی بیر گونی، قارداشسیز اولاندا
نعشی قالی یرلرده، اونون عزّتی اولماز
تابوتینه بیگانه دوشر، حرمتی اولماز
.
.
چاتماز الیم عبّاسه، منه یاور اولیدی
قارداش بالاسی اوغلوم علی اکبر اولیدی
گهوارسی بوش قالمیش، علی اصغر اولیدی
گلسیدی حسینیم منیله راز و نیازه
تابوتمه بیر دسته، دوراردیلا نمازه
.
.
بیر عمر بو دنیاده، جگر داغلامیشام من
هر کیمسه ئولوب، گوزلرینی باغلامیشام من
عمروم نقدر وار، هامویا آغلامیشام من
ایندی ئولورم کیمسه منه آغلیان اولماز
غربتده گلوب گوزلریمی باغلیان اولماز
.
.
غم تاجریَم، غم یوکی بار ایلمشم من
چوخداندی عزیزلوق آتینی، پیلمشم من
بُلمم سنه ای چرخ و فلک نیلمشم من
داشدان داشا بو باشیمی، غم داشینه چالدون
ائلدن آیروب، تازه گئنه غربته سالدون
.
.
یاز «نادری» بو کرب و بلا بیر باغ اولیدی
زینب دیوری بوقره گون لر آق اولیدی
ایکاش بو گون تشنه حسینیم ساق اولیدی
گودالیده گوردوم نجه تاپشوردی سوسوزجان
مظلوم جانوا زینب نالان اولا قربان
.
.
.
#زینبیه_شهادت
#ای_چرخ_فلک_تازه_جگر_داغلیاجاقسان
#نادری
#ترکی
.
.
نظر دهید