یا مهدی
.
✍️ زبدة الاشعار ✍️
.
?: @nohe_torki
.
علیرضا حضرتی (ناعمی)
.
ای گوزی یولدا شیعه لر مهدی منتظر منم
چوللری باغریقان گزن سیّد دیده تر منم
.
خاتم اوصیا منم، سرور مقتدا منم
قائم آل مصطفی، وارث مرتضی منم
حاکم عدل گسترم دهره وئرن صفا منم
ظلمیله ظالمین سالان جانلارینا شرر منم
.
من گول باغ احمدم، فاطمه نور عینی ام
عاشق اولان اورکلرین دهریده شور و شینی ام
منتقم ولایتم حیدری ام، حسینی ام
نخل رسول خاتمه میوه منم، ثمر منم
.
عالمی کینه دولدوروب یوخدی وفا جهانیده
محو اولونوبدی یکسره صلح و صفا جهانیده
یاندیرور اهل عالمی جور و جفا جهانیده
فسق و فجور و فتنه دن خسته و خون جگر منم
.
مکر و ریا صداقتین حالدان حالا حالین سالوب
جهل و خطا دیانتین الدن اصالتین آلوب
دینیدن هاممی دم ویرور دین ولی بی کمک قالوب
غربت دینیدن او کی درد و غمه دوشر منم
.
چوخلاری سسلنور آقا یابن الحسن اماندی گل
مکریله گوزیاشینی توکور صورته سسلور العجل
مهدی نی چوخدی سسلین یوخ ولی کیمسه ده عمل
گیزلین اموره واقفم سرّی او کی بیلر منم
.
حیدر آتامدان آلموشام ارث اُبهّت و وقار
یوخدی اورکده واهمم واردی الیمده ذوالفقار
برقی بو ذوالفقاریمون ریشۀ ظلمه اود سالار
وعده وئروبدی ذات حق فتح منم، ظفر منم
.
شیعه امیدگاهی ام، سرور و دادخواهی ام
یوخدی پناهی هر کیمون ملجأیی ام، پناهی ام
خلق تمام عالمین دهریده تکیه گاهی ام
ال سیزین اللرین دوتان بی کسه بال و پر منم
.
ایندی منیم الیمده دی گردش چرخ روزگار
امر ائدرم عوالمه ایل دولانار بهار اولار
گولسم اگر کی گول گولر، دولسا گوزوم بولوت دولار
نظم نظامه ناظمم، مقتدر قدر منم
.
من کی جهاندا چاره سیز دردلرین طبیبی ام
خالص اولان اورکلرین دلبری ام، حبیبی ام
مهدی صاحب الزّمان عصرلرین غریبی ام
غصّه دن اشکینی ئوزه دائم او کی الر منم
.
کیم نه بیلور کی قلبیده وار نقدر غمیم منیم
شرح ائلسم داغا داشا ایلر اثر غمیم منیم
مین نئچه ایلدی روز و شب شعله چئکر غمیم منیم
فاطمه داغداری ام، سینه سی پُر شرر منم
.
ندبه لریمدن آل خبر گور نئجه غصّه لی حالام
گون ساییرام ظهور ائدم عالمه ولوله سالام
ثانی نانجیبیدن اوز آنامین قانین آلام
غملر آلان قرارینی، لشکری غصّه لر منم
.
فاطمه دردی نون مگر واردی جهاندا چاره سی
ئولدی جوان ساغالمادی سینه سی اوسته یاره سی
منده دی عمّه مه چاتان لنگۀ گوشواره سی
هاشمی کوچه سین او کی ایندی ده وار گزر منم
.
گیزلین اولان مزارینه باخدیقیجان قان آغلارام
نوحه ائدوب نواییلن قلب جهانی داغلارام
سسلنرم آنا آنا دیزلریمی قوجاقلارام
آغلار او کی اشیتمیسوز اشکی قانا دونر منم
.
ایندیده یاندیرور منی صورت نیلی صحبتی
شعله سالور وجودیمه کوچه و سیلی صحبتی
محشر اولونجان آغلادار آل خلیلی صحبتی
روز ظهورین حسرتین دلدن او کی چکر منم
.
#مهدیه
#ای_گوزی_یولدا_شیعه_لر_مهدی_منتظر_منم
#حضرتی_ناعمی
#ترکی
.
✍️#زبدةالاشعار✍️
.
?: @nohe_torki
نظر دهید