شب ضربت خوردن حضرت علی (ع)
.
.
.
سدید هریسی
.
بؤرؤیوب هرطرفی گؤیده کی ماتم بو گئجه
غم یاغیر سانکی فضادن یئره هردم بو گئجه
.
کائناته یاییلیرعالم معناده بو غم
نه فلک یاسه باتیب آغلائیر عالم بو گئجه
.
یاس دوتوب جمله ملائک بیر عظیم فاجعه ده
شدّت غمدن اولوب ایشلری برهم بو گئجه
.
چون صاباح صبحون اذانینده آغیر حادثه دن
وار خبرعرش معلّاده، مسلّم بو گئجه
.
بویانارقانینه محراب عبادتده علی
مقصد شومه چاتار زادۀ ملجم بو گئجه
.
چون قفادن ووراجاق سجده ده مولانی او پست
باتاجاق یاسه بوتون عالم وآدم بو گئجه
.
سون نمازی اولاجاق رهبر دینین او نماز
اولاجاق قامت قد قامتی چون خم بو گئجه
.
باش آچیب صبحه کیمی اوخشائیب آغلار قالاجاق
حضرت فاطمه جنتده دمادم، بو گئجه
.
نه فقط فاطمه جنّتده عزا بزمی دوتوب
انبیاء یاسه باتیب رأسیده خاتم بو گئجه
.
نئجه قان آغلاماسین شیعه بوماتمده «سدید»
چونکی قان آغلوری پیغمبر اکرم بو گئجه
.
داها ویرانه نشینلر گؤزی یوللاردا قالار
اونلاری ترک ائده جاق حامی وهمدم بو گئجه
.
ال چکن اولمیاجاق بیرده یتیملر باشینا
آخاجاق اؤزلرینه گؤزیاشی نم نم بو گئجه
.
دای عدالتدن اثر قالمیاجاق دنیاده
وار یئری عدله عزا ساخلیا عالم بو گئجه
.
بارالهی سن اؤزون ایله کرم اذن ظهور
تا اولا مهدی موعوده فراهم بو گئجه
.
.
#حیدریه_سدید_هریسی
#حیدریه_شهادت
#بؤرؤیوب_هر_طرفی_گؤیده_کی_ماتم_بو_گئجه
#ترکی
#زبدةالاشعار
نظر دهید