باجی سن دی بو جماعت باشما داش آتماسونلار #کوفه_کریمی_مراغه_ای

کوفه
.
✍️ #زبدةالاشعار ✍️
🆔: @nohe_torki
.
#سبک_سو_یوخومدی_قزلاروندان .. 5 سبک
.
کریمی مراغه ای
.
باجی سن دی بو جماعت باشما داش آتماسونلار
منه بسدی بو حقارت باشما داش آتماسونلار
.
.
او قدر وروبلا یاره بویانوب قانا جمالیم
باخورام بو ازدحامه چوخالور غم و ملالیم
منه طعنه ويرماسونلار باخوری قزیم عیالیم
چکورم اوزوم خجالت باشما داش آتماسونلار
.
.
بو یارالی باشی گون تک سالوب اشقیا کسوفه
گیجه نی یاتوب کول اوسته دوشوب آی کیمی خسوفه
بو ستملره کفایت ایلمز بو اهل کوفه
نه دی بیر بیله عداوت باشما داش آتماسونلار
.
.
باجی خولیه دِیَن یوخ بو باشی سن آز دولاندیر
گیجه نین جفاسی بسدی داخی آز حسینی یاندیر
تانوری بو شهرین اهلی منی سنده آز اوتاندیر
بو قدر ایدوب شماتت باشما داش آتماسونلار
.
.
داش اورکلی بیر عجوزه گتوروب منی فغانه
الینه گوتوردی بیر داش ایدوب آننمی نشانه
یارالاندی سجده گاهیم گول اوزوم بویاندی قانه
کیمه ایلیوم شکایت باشما داش آتماسونلار
.
.
بو اسفلی حالتیله اوخورام جداده قرآن
منه کف چالوب گولوللر بو گروه نا مسلمان
نه منیم دلیمده طاقت نه بولاردا روح ایمان
من ایدن زمان تلاوت باشما داش آتماسونلار
.
.
بولار ایستوری جهاندن کسیله صدای قرآن
اودی که منی ایدوللر سر نی ده سنگ باران
ولی من نهال دینه سو یرینه ویرمیشم قان
قالاجاقدی تا قیامت باشما داش آتماسونلار
.
.
ایکی دفعه بو دیاره سفر ایلور آل حیدر
بیریسی کجاوه لرده هامی باشدا تازه معجر
بیری ایندیدور عیالیم قولی باغلی زار و مضطر
هانی بس او شأن و شوکت باشما داش آتماسونلار
.
.
دگیسن مگر او زینب نه ایاقوی أوپن وار
نه زیارته گلن وار باشوا نه گول سپن وار
نه آتام علی یانیمدا نه ده قارداشیم حسن وار
بو گروه پست فطرت باشما داش آتماسونلار
.
.
قوجاقوندا یوخلیوبدی باجی مهربان رقیم
اویانوب منی گورنده ایدیری فغان رقیم
منه گورسه داش آتولار اولی باغری قان رقیم
ایلمز بو ظلمه طاقت باشما داش آتماسونلار
.
.
بو قدر جماعت ایچره باجی یوخدی بیر مسلمان
آلا باشیمی بولاردان ایده توپراق ایچره پنهان
دیه ایتمیون بو باشی سر نی ده سنگ باران
منه ایلیه حمایت باشما داش آتماسونلار
.
.
بیزه روزو شب «کریمی» توکوب اشک حسرت آغلار
اوره گینده وار همیشه هوس زیارت آغلار
باشیمی گورر جداده یارالی جماعت آغلار
گینه ده ایدوب اذیّت باشما داش آتماسونلار
.
.