حالات حضرت علی اصغر(ع)
.
✍️ #زبدةالاشعار ✍️
.
🆔: @nohe_torki
.
آسال اردبیلی
.
بارالها اصغر شش ماهه میدانه گیدور
آلتی آیلیق دورولی میدانه مردانه گیدور
.
تشنه صهبای حقدور ناصر میر حرم
ایلیوبدور بو دلیله قصد میخانه گیدور
.
دوزدی بو میخانه نین سقاسی قانه غرق اولوب
حضرت جانانیدن آلماقه پیمانه گیدور
.
درک ایدوب گهواره ده هل ناصر ینصر سسین
غنچه دور ویرسون صفا باغ و گلستانه گیدور
.
صاحب ادراکیدور بو طفل ششماهه یقین
گوردی کی راه خطادن قوم بیگانه گیدور
.
رگلرینده جوش ایدوبدور خون پاک حیدری
ویرمگه درس شرافت قوم عدوانه گیدور
.
ایستیور بو شیرخواره نوحی حیران ایلسون
کشتی عشقون قوجاقینده بو طوفانه گیدور
.
آلتی آیدا بو بالا بیر لحظه راحت اولمادی
استراحت ایتمگه جنات و رضوانه گیدور
.
دردی وصل یاریدور درمانی اما اوخدادی
با لب خندان اودور پیشواز پیکانه گیدور
.
ظاهراً پیشواز پیکانه ولی باطنده یوخ
سالماقا روح ربابی کنج زندانه گیدور
.
جامه ی جنگی گیوب بو صودامر سرباز عشق
حامی اولسون نهضت شاه شهیدانه گیدور
.
جامه جنگی همان آغ دوشلوگیلن قونداقی
اوز آناسی گیدیروب بو طفل نالانه گیدور
.
غرق ماتم ایلیوبدور یکسره آل اللهی
یانماقا شمعین اوتوندا تشنه پروانه گیدور
.
ایستیور باب الحوائج رتبه سین کسب ایلسون
هم طراز اولسون ابوالفضله بودردانه گیدور
.
رو به قبله اگلشوبدور خیمه ده اما رباب
سسلنور الله بالام لب تشنه میدانه گیدور
.
سوت یوخومدی سینه ده مندن کوسوبدی اصغریم
سینمون داشین آتوب دیدار جانانه گیدور
.
بیر محن واردور مروری صبریمی الدن آلور
ایلیوبدور قلب ایوین بو درد ویرانه گیدور
.
کاش یا رب بو وداع آخر وداعی اولماسون
أولمگه اوغلوم مگر قانلی بیابانه گیدور
.
اصغریم أولسه منیمده جانیمی قورتار بوگون
من گوره بیلمم کی اوغلوم باتماقا قانه گیدور
.
آیریلاندا بیلمورم گولدی نیه اوغلوم منه
اوت ویروب آخر نگاهی یکسره جانه گیدور
.
.
اصغریلن شاه اما عزم میدان ایلدی
غنچه نی بازاره گتدی عرشی حیران ایلدی
.
.
گوردی لشکر عرصیه شاهنشه دوران گلور
صاحب جود و کرم آیینه ی یزدان گلور
.
باشینه قویموش عمامه چیگنینه سالمیش عبا
اوز عباسی آلتدا ایلوب گوهرین پنهان گلور
.
بیربیره لشکر دیدی حتماً حسین سو آلماقا
شمره یالوارسون الینده ساخلیوب قرآن گلور
.
بیلمدی یالوارماز آل بوتراب هیچ ناکسه
دشمنی خوار ایتمگه الده دوتوب برهان گلور
.
ایستیور گوسترسون انفاسه شقاوت حدینی
خصمی محکوم ایلسون محشرگونی سلطان گلور
.
شه بو خردا کعبه نون رد ایلدی استارینی
گوردولر اوندا ظهوره آیت سبحان گلور
.
گورسدوب شمس ضحی اشراره زیبا اخترین
بو عملدن لرزیه عرش حق رحمان گلور
.
سسلدی ناگه حسین ای اشقیای بد مرام
بیر ایچیم سو آلماقا بو طفل لب عطشان گلور
.
نه توانی جنگه وار دور نه دلی دردین دیه
ناله سیندن نالیه اخیامیده نسوان گلور
.
سیز منه رحم ایتمدوز باری بونا رحم ایلیون
حالتیندن شیونه هر سنگدل انسان گلور
.
سیز منی دعوت ایدوبسوز بو دیار محنته
میزبان سوز حرمت ایلون صود امر مهمان گلور
.
گوردی سعد اوغلی اودم لشکر توکور اشک بصر
فکر ایدوب اوندا زواله حیله شیطان گلور
.
حرمله نون سمتینه سرعتله قاچدی سسلدی
دردینه زهرانون اوغلی آلماقا درمان گلور
.
.سعی ایله بو امره پایان ویر داغیلدی لشکریم
ناله و فریاده یکسر لشکر عدوان گلور
.
حرمله عرض ایلدی اولما پریشان یابن سعد
چونکی اوخ آتماق منه هر امریدن آسان گلور
.
امر ایله سن باغبانی اوخلیوم یا غنچه سین
آری بو اوخدان منه بیر منصب شایان گلور
.
ویردی دستور ابن سعد اوخلا الینده اصغرین
اوخلاسون گر اوغلونی درده دل جانان گلور
.
حرمله قویدی کمانه تیرینی یا فاطمه
ئوپمگه اصغر بوغازین زهریلی پیکان گلور
.
ناگهان گوردی الینده شه چالیخلی اوغلونی
اصغرین نازک بوغازیندن دمادم قان گلور
.
گوردی اولدوز تک آخیندی اصغرین زیبا گوزی
اوغلونون بیلدی او لحظه عمرینه پایان گلور
.
.
چشم بازیلن حسین باخدی اودم دور و بره
قانلی میداندا گوروب واردور عجایب منظره
.
.
عرشیدن فرشه ملائک گوزده اشک تر گلوب
نوحه مریم دِی نوایه آسیه هاجر گلوب
.
قالمیوب عرش خداده یا جناندا بیر نفر
کربلا صحراسینه اهل برین یکسر گلوب
.
انبیا و اولیا و اتقیا و اوصیا
هاموسی قاره باشیندا دلده وای اصغر گلوب
.
انبیانون تاجی اوندا گوردی شه عمامه سیز
گورمگه حد بلانی ختم پیغمبر گلوب
.
تا علی گوردی حسینی چیخدی یاددان اوز غمی
حیدرون دردی دیدی هاردا بونا بنذر گلوب
.
او امامی کی دیدی لایومک یومک حسین
اوز سوزون اثبات ایده دشت غمه مضطر گلوب
.
گوردی بیر شخصی حسین گوزیاشی آخدی صورته
گوردی پهلوسی سنان زهراده بی معجر گلوب
.
سسلدی گلدیم حسین تا اصغره لایلای دییم
چون منیم لایلای سسیم هر طفله رامشگر گلوب
.
سن اوغول لایلای دیورسن دشمن اما ال چالی
بو قضایانی گوروب درده دل حیدر گلوب
.
اصغرون روحی حسینجان منله رضوانه گیدور
جسمینه آغوشون اما یاخجی بیر بستر گلوب
.
سعی ایله میداندا قالما گیت خیامون سمتینه
چون ازلدن زینبیم اوغلوم سنه یاور گلوب
.
قالما آواره باخاندا حالووه قلبیم یانور
ویر قولاق بو غمده افغانه یاتان لشکر گلوب
.
عرض ایدوب یا فاطمه خوشدور کی میداندا قالام
خیمیه گیتسم گوررسن لرزیه پیکر گلوب
.
جان ویرر اوغلون خجالتدن اگر گورسه آنا
اصغرین پیشوازینه اوغلی أولن مادر گلوب
.
آلتی آی یوللاردا دائم نازینی چکدی بونون
طاقتین الدن ویرر گورسه گلی پرپر گلوب
.
اصغرون بیر قطره گورسیدی آخور گر گوزیاشی
فکر ایدردی بو بلا هر دردیدن برتر گلوب
.
اصغری بو حالدا گورسه فکر ایله أولمز رباب
عمرونه بی شک او لحظه لحظه ی آخر گلوب
.
من ربابه اصغری اصلا گرک گورستمیم
اولمارام راضی گوره اوغلی پارا حنجر گلوب
.
تکجه گوندرٌم اونا بو قانه باتمیش دوشلوگون
درک ایدر گورسه اونی باشه نجه غملر گلوب
.
بی گمان باشه چاتوب بی کس ربابین خوش گونی
دای گورر هر گون غم اوستوندن غم دیگر گلوب
.
جان ویرینجک اگنینه دائم لباس غم گییر
ترپدر بیر بوش بشیک هر دم اوغول لایلای دییر
.
.
#اصغریه_آسال_اردبیلی
#اصغریه_شهادت
#بارالها_اصغر_شش_ماهه_میدانه_گیدور
#ترکی
.
✍️ #زبدةالاشعار ✍️
.
🆔: @nohe_torki
نظر دهید