زبانحال حضرت امام رضا(ع)
.
✍️ #زبدةالاشعار ✍️
.
🆔: @nohe_torki
.
مرحوم رجایی تبریزی
.
بارالها درد و غم اوّلدن عادت دور منه
من رضایم زهرلن ئولماق سعات دور منه
.
.
دین یولوندا وعده ویرموشدوم ویرم بیر امتحان
صبر قیلّام هر نه تقدیر ایتدی حی لامکان
افتخاریم دور ویرم بو طرزله غربتده جان
آخرت سوداسی دور یاخشی تجارت دور منه
.
.
قالموشام مدّتدی من غربت ولایتده خدا
نچّه ایل دور اولموشام درد فراقه مبتلا
ناخوشام وار دور یانمدا نه طبیب و نه دوا
مونسیم بو گوز یاشیله ضعف حالت دور منه
.
.
دین یولوندا جانیمی هر محنته توش ایلدیم
جور خاری گل وصالیله فراموش ایلدیم
عاقبت مأمون اَلیندن زهر کین نوش ایلدیم
دشمنیم ایتدی او که جور و جسارت دور منه
.
.
نِچّه ایل دور غربت ایچره نار هجره یانموشام
یادیمه دوشدوقجا اوغلوم اود دوتوب اودلانموشام
دین یولوندا هر بلا واریدی آسان سانموشام
شاهدیم سن سن، نظر قیلسان کفایت دور منه
.
.
وارثیم جدّیم حسینه بو غم و محنتده من
حسرتیله توپراق اوسته جان ویرم غربتده من
گوزلورم معصومه نی بو جان ویرن ساعتده من
گلسه معصومه عجب لطف و عنایت دور منه
.
.
شدّت زهر جفادن اود دوشوب اکبادیمه
مهربانیم یوخ یانیمدا کیم یتیشسون دادیمه
کیم خبر ویرسون منیم احوالیمی اولادیمه
منتظر ایمدی هامی آل رسالت دور منه
.
.
ایتمرم شِکوه یته هر صدمه جسم و جانمه
جانیمه صدمه یتیشسون یتمه سون ایمانمه
قویمارام نقصان اولا اوّلدهکی پیمانمه
عهدیمون ایفاسنه لازم شهادت دور منه
.
.
سن بولورسن هر بلا گلسه دایانّام یوخ سوزوم
روز اوّلدن بلایه وعده ویرموشدوم اوزوم
گلمدی اوغلوم تقی یولدا قالوب آغلار گوزوم
اوغلومی گورسم یانمدا خوش او ساعت دور منه
.
.
ایلدی بو آرزونی اول امام مقتدا
قالمادی حسرت اورکده مستجاب اولدی دعا
نوجوان اوغلون گوروب دور باشی اوسته برملا
محنت و اندوهه علّت بو روایت دور منه
.
.
نه گوزل ساعت دور عالمده او ساعت ای خدا
جان ویرنده باشی اوسته اوغلونی گورسون آتا
نه یامان دور بو ایشین عکسی جوان ئولسون بالا
بو آخان گوز یاشمه باعث او حالت دور منه
.
.
چوخ چتین ایش دور گوره جان اوسته اوز اوغلون آتا
بولمورم نه حاله قالدی خامس آل عبا
گوردی اوغلی جان ویرور جسمنده وار سایسیز یارا
سسلدی آچ گوزلرون سنسیز قیامت دور منه
.
.
اولمیوب بیر کس حسین تک مبتلا بو حسرته
ایلدی خم قامتین قویدی یوزون مه صورته
«شوشتری» او حالی جان ویرماق یازوب دور حضرته
مدرک الده گوردیقوم مقتل کفایت دور منه
.
.
سویلدی سنسیز اوغول توپراق جهانون باشنه
درد هجرون دور سبب من بی کسون گوز یاشنه
آغلوری ایمدی سکینه سن کیمی قارداشنه
عرض ایدور سنسیز علی قسمت اسارت دور منه
.
.
خیمه ده برپا اولوب شور قیامت دور گیداخ
لیلینی آلموش آرایه بیر جماعت دور گیداخ
سنده بیر ایله آنان حالین رعایت دور گیداخ
بو رعایت لیلیه عین رعایت دور منه
.
.
حمل نعشون گرچه مشکل دور اوغول من بی کسه
نیلیوم ایمدی ویروبلر اهل بیتیم سس سسه
سسلنور زینب ئولر لیلا جوانی گلمسه
دور گیداخ بو گیتماقون رسم اعانت دور منه
.
.
سعدون اوغلی باخموری غمدن وجودیم اودلانور
نوجوان داغی یامان دور اود دوتور قلبیم یانور
گورنه فخر ایلور منه اکبر غمین آسان سانور
سرسلامت ویرماقی طعن و شماتت دور منه
.
.
آغلارام سندن صورا هر قَدْر وار دنیا علی
باخمارام هرگز ندور دنیا و مافیها علی
یوخ ملامت گر هلاک اولسا آنان لیلا علی
حالنی سن بولموسن امّا درایت دور منه
.
.
چوخ مفصّل دور حسینیله علی اکبر غمی
آز زماندا سیر مشکل دور مفصّل عالمی
ایستورم تعقیب اولا سلطان هشتم ماتمی
مقصد اصلی او مطلبدن عبارت دور منه
.
.
طوسده جان تاپشوراندا اول غریب ممتحن
عرض ایدردی بارالها یالقوزام بو یرده من
سن بولورسن مهربانین آختارار هر جان ویرن
مهربانیم اولسا جان ویرماخ نه راحت دور منه
.
.
.
.
#رضویه_رجایی_تبریزی
#رضویه_شهادت
#بارالها_درد_و_غم_اولدن_عادت_دور_منه
#ترکی
.
✍️ #زبدةالاشعار ✍️
.
🆔: @nohe_torki
نظر دهید