زبانحال حضرت امام کاظم (ع)
.
✍️ #زبدةالاشعار ✍️
.
🆔: @nohe_torki
.
مرحوم کهنمویی
.
بارالها نه گوزل دارالعبادتدور بو یر
گوشه ی زندان دگول محراب طاعتدور بو یر
.
.
هر بلا و غم یتیشسه راضیم یوخدور سوزوم
جور خاره وصل گلدن اوتری لازمدی دوزوم
آختاروردوم دائماً بیر بیله خلوت یر اوزوم
عابد و معبوده یاخشی بزم وحدتدور بو یر
.
.
من دیمم زندان الهی بیر قرانلوق محبسه
بزم وصله رهگذردور من غریب و بی کسه
بو در و دیوارلر منله ویرولّر سس سسه
روضه ی رضواندی یا فردوس و جنّتدور بو یر
.
.
عاشق صادق گرکدور هر بلادن شاد اولا
قویمیه معموره ی دل غصّه دن برباد اولا
بو قفسدن مرغ روحیم آز قالور آزاد اولا
خالی از اغیاردور، بیر بزم خلوتدور بو یر
.
.
گوشه ی زندانیده مدّتدی محبوس اولموشام
کُنده و زنجیریله بو یرده مانوس اولموشام
دوشموشم دلدن حیاتیمدنده مایوس اولموشام
اهل بیتیم یوخ یانیمدا کنج غربتدور بو یر
.
.
بو یر ایتموشدی خدا دلخوش عبادتدن منی
طاعته ترغیب ایدوب ساعت به ساعتدن منی
زهر کین امّا بو گونده سالدی طاقتدن منی
اولماسا راز و نیازیم خاک ذلّتدور بو یر
.
.
مومنه قید شریعت بسدور ایلر اکتفا
بنده نی قویماز حدودُ اللهیدن خارج اولا
سن بولورسن بی گناهم بی گناهم ای خدا
منده بولّم منظر حقّ و حقیقتدور بو یر
.
.
بولموری هارون گیچن گون مهلتیندن قورتولار
گونده بیر گوندور عزّ و شوکتیندن قورتولار
بو غریبینده زمان ذلّتیندن قورتولار
قالمالی دنیا دگول جای مذلّتدور بو یر
.
.
رفع ایدن ظلمات بطن حوتی ای ذالنّون دن
ای سودی اخراح ایدن مابین فرث و خون دن
تیز منی اُلدور خلاص ایت محبس هارون دن
اُلماقین مشتاقیم یاریله وصلتدور بو یر
.
.
ای خدا جدّیم حسینی بوردا یاده سالموشام
دینه قربان اولماقین سرمشقین اوندان آلموشام
طاقتیم یوخدور قیامه سجده گهده قالموشام
نقد جانیم رایح سوق تجارتدور بو یر
.
.
جان ویرن وقتینده جدّیم قویدی آنّین سجدیه
اوز مقدّس عهدینون ایفاسینه شکر ایلیه
قالدی پیکر سجده گهده گیچدی باشی نیزیه
عرض ایدردی ای خدا نه یاخشی راحتدور بو یر
.
.
کهنمویی گرچه سیّدسن حسینی سن اوزون
چون گناهون چوخدی حتماً وار شفاعتده گوزون
نیّتون پاک ایله تاثیر ایلسون خلقه سوزون
فرصتی فوت ایتمه ماوای نصیحتدور بو یر
.
.
.
.
#سبک_زینبم_جان_اوستیم (4 سبک سینه و زنجیر تک ضرب )
.
.
#کاظمیه_شهادت
#بارالها_نه_گوزل_دارالعبادتدور_بو_یر
#کهنمویی
#ریاضی_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید