شهادت حضرت صدیقه طاهره زهرای مرضیه (س)
زبانحال حضرت زینب (س)
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
بار المیله بوکولوب قامت زهرا
یتدی بوکولن قامتیله رحلت زهرا
.
.
گوزدن گوزل اطفالینی مین دردیله آتدی
اؤز زینبین آخر آناسیز قزلارا قاتدی
.
.
دولدی گوزی اولدی یوزونون رنگی پریده
عمری گونی باشه یتشوب قدی خمیده
دنیادن او مظلومه خانم گئتدی شهیده
گئتدی اؤزی قورتولدی غمین دیللره سالدى
دنیاده هامی درد و بلا زینبه قالدی
.
.
سیرین قوتاروب چرخ حیا بدر کمالی
گون تک یتشوب اوّل شب عمر زوالی
باش وئردی او دم زینبینون غصّه هلالی
باشلاندی بلالی خانمین درد و بلاسی
باجادی دئسم یتدی غم کرب و بلاسی
.
.
خلقتده ائدوب وضع خدا مهر بناسین
گل اوسته چکر صاحب گل خار جفاسین
ایستر آنالار قزلارینی قزلار آناسین
قز اؤز آناسیندان آنا قزدان دونه حاشا
خاصه آنا زهرا اولا، قز زینب کبری
.
.
قزلار آنالاردان دؤنه بولمزله بو دوزدی
زینب ال اوزوب فاطمه دن بس نئجه دوزدی
الله ئوزی عالمدى ال اوزدی نئجه اوزدی
اوزدی الینی دوزدی شرار غمه یاندی
جسمیندن ائله بولدی که روحی آرالاندى
.
.
اهل دله گزلین دَگی واضحدی بو مطلب
صبر ایتدی آنا آیریلقیندا نئجه زینب
نه نوع آنا تابوتینی سالدی یولا یارب
سالدی یولا تابوتی دالینجا گوزی قالدى
قلبینده آنایه دیمه لی چوخ سوزی قالدى
.
.
حقلیدی علم اوج مصیبتده ساچیدی
حقلیدی پوزوب حالین اگر باشین آچیدی
تابوت دالینجا آنا وای دلده قاچیدی
نه سرّیدی یارب نه خانم باشینی آچدی
دوزدی آنا تابوتینون آردینجا نه قاچدی
.
.
زهرا قزی دوزدور که دونَنمزدی آنادن
آردینجا گئدنمزدی ولی کثر حیادن
آغلار گوزی حسرتله سَپردی سو قفادن
قالموش متحیّر ایکی مشکل آراسندا
جاگیر ایکی حسرت اودی بیر دل آراسندا
.
.
دوردی دولی گوزلی بیر آنا آردیجا باخدی
هجران اودی یاندیردی یانان قلبینی یاخدی
یاندی ئورگی گوز یاشی گوزدن یوزه آخدی
حسرت الى قوینوندا او مظلومه قیتدی
یوزده آناسیزلیق توزی پوزقون ایوه گئتدی
.
.
اولدی ایوه وارد غمیله مظهر زهرا
گوردی که یریندن یغیلوب بستر زهرا
بوش گورجاق آناسی یرینی دختر زهرا
ایله پوزولوب نالیه گلدی او دل افکار
احوالینه قان آغلادی مطلق در و دیوار
.
.
زهرا دولانان یرلری گوردی او وفالی
غم ایتدی گلوگیر آخوب اشک ملالی
ایوده دایانا بولمدی چخدی او بلالی
گلدی قاپونون دوردی دالیندا اوزی سوزلی
گوزلوب آتاسیله حَسنینی دولی گوزلی
.
.
دوردوقجا پوزولدی دیمه احوالی دوزلدی
یولدا گوزی تیر غمیله قلبینی دلدی
ناگه آتاسیله ایکی قارداشلاری گلدی
گوردی حسنین اشکی وورور موج گوزونده
وار گرد یتیمی اولارین سولموش اوزونده
.
.
باخدی آتیا دوندی گوزی بیر دولی ابره
آغلار گوزیله عرض ائدوب اول معدن صبره
تاپشوردون آنامی باباجان سن نئجه قبره
زهرا سنه بیر جانیدی جاندان نئجه دویدن
دوزدون نئجه سولموش یوزونی توپراقا قویدون
.
.
بیر عمر یانام واردی یری گر بو سوز اوسته
یاتدی نئجه توپراقلارین آلتندا او خسته
ال یاره قولاق یاره لی پهلوسی شکسته
نیلی یری وار قامتینون صاق و صولوندا
سیلی یری یوزده اثر قمچی قولوندا
.
.
بیر گنج حیا ایلموسن ای بابا مدفون
هیهات گوره مثلینی بو دیدۂ گردون
مین گوهر غم دلده گئدوب قبره او دلخون
دلخونیدی مین لر ئورگی قان ایلیوبدی
چوخ دللرى قان گوزلری گریان ایلیوبدی
.
.
بولمزدیم آنام گون کیمی آخشام باتاجاقدی
بولمزدیم آنام تز منی گوزدن آتاجاقدی
تک قبرین ایوینده نئجه من سیز یاتاجاقدی
حسرت زده ایلوب ئوزونه قاتدی علینی
اودلی ئورگین داغلادی آغلاتدی علینی
.
.
شاه آغلادی شهزاده لری داشدیلا بیردن
هم ناله اولوب سس چکوب آغلاشدیلا بیردن
دلده آنا وای ذکری قوجاقلاشدیلا بیردن
بیر سمتده زینب ئورگین تیر غم اویدی
بیر یاندا حسینیله حسن یوز یوزه قویدی
.
.
قزلار آنا یاسینده قورار ماتم أساسین
زینبده شروع ایلدی زهرانین عزاسین
گتدی دؤشه دی رسم عزائیله لباسین
باخجاق دؤشَنَن جامیه زهرایه نشانه
اوخشاردی یانقلی دلیله چوخ یانایانه
.
.
سویلردی اولان باشی بلالی آنام ایوای
پهلوسی سنق سینه یارالی آنام ایوای
مظلومه ئولن یاسلی عزالی آنام ایوای
سن نخل وفا میوه لرین دردین آپاردون
قبره أؤزویله ئورگون دردین آپاردون
.
.
ایوای منه، نه تئز بو قزوندان آنا دویدون
تندن دیریلیق رختینی آفاقده سویدون
قورتولدون ئوزون لیک یرونده منی قویدون
سنسیز قزیوی دوره له سون جور و جفالر
بیر زینب اولا بیرده هامی درد و بلالر
.
.
سن دویدون اگر مندن آناجان نه سوزوم وار
من دویمادیم اما بولوسن سنده گوزوم وار
سانما غم هجرانوه سینمده دوزوم وار
همدم منیله گوزده کی قانیاش اولی سنسیز
ایوای آنا ذکری منه یولداش اولی سنسیز
.
.
سنلن گیدن عزّت آنا بیرده گله هیهات
سنلن اولان عالم دوشه بیرده اله هیهات
زینب بیر آچیق قلبیله بیرده گوله هیهات
آنلار آناسیزلار بو سوزی ئوزگه سی بولمز
یعنی آناسیز قزلارین اصلا یوزی گولمز
.
.
من سن دولانان یرلری حسرتله دولانّام
گورّم یریوی بوش آنا دلدن یارالانّام
نسگلرون اودلار منی نار غمه یانّام
حقّیم دی یانام درد دلیم اولدی دواسیز
قالدیم صِغَر سنّیله عالمده آناسیز
.
.
«تائب» نقدر عمرده اولسا سنه فرصت
غفلت ایلمه آل رسوله ایله خدمت
بو خدمت اولور رونق اسلام و شریعت
بو شرطیله که خدمتون الله سُؤَن اولسون
بیر یول که گئدورسن ئوزی قرآن دیَن اولسون
.
.
.
.
#فاطمیه_تائب_تبریزی
#فاطمیه_شهادت
#بار_المیله_بوکولوب_قامت_زهرا
#ترکی
.
✍️ #زبدةالاشعار ✍️
.
🆔: @nohe_torki
نظر دهید