دیر راهب
.
✍️ #زبدةالاشعار ✍️
.
🆔: @nohe_torki
.
حاج حسین حسنی افشرد
.
باشوی سجاده مه قویدوم نه تک عیسایه خاطر
صبحه تک اولدوم عزادارون آنان زهرایه خاطر
.
یاره لی باشیله سن بودیری گلشن ایلیوبسن
چوخ گوگل آلچاقلوق ایلیوب بوردا مسکن ایلیوبسن
خواب غفلتدن منی بیدار چون سن ایلیوبسن
منده اسلامی قبول ایتدیم اولان سودایه خاطر
.
.
دین عیسایه یارالی سن منی بیگانه ایتدون
شمع رویون دوره سینده پر ووران پروانه ایتدون
قلبیمه عشقون سالوب آخر من دیوانه ایتدون
عاشقون اولدوم ئولونجه بو دل شیدا به خاطر
.
.
بولمدیم شاها گذشت ایله سنه اعزاز ایدیدیم
جانیمی اوّل گرک بو باشه پای انداز ایدیدیم
من یوزوم اوسته دوشیدیم تا سنی پیشواز ایدیدیم
یوز گوزوم توپراق اولیدی کول دوتان سیمایه خاطر
.
.
رسمدور سن تک بیرینون محترم مهمانی اولسا
حرمت ایلر هرقدر مهمانینه امکانی اولسا
میزبان واردور یری مهمانینون قربانی اولسا
جان فدا ایلر بلبل گل زیبایه خاطر
.
.
بو یارالی باشویله نالیه دنیانی گتدون
باش آچوق اغلار گوزیله دیریمه عیسانی گتدون
سر برهنه دیده گریان حضرت طاهانی گتدون
راهبین دیری شرفلندی بابان طاهایه خاطر
.
.
دیریمه بو نصف شبده مریم و حوا گلوبدی
گورماقا باشون یارالی هاجر و سارا گلوبدی
اللرین پهلوسینه قویموش آنان زهرا گلوبدی
آغلادوقجا آغلادیم آغلار قالان زهرایه خاطر
.
.
اهل بیته بیر اوجا بویلی خانم اولموش مراقب
بیر بالا قیز وار علاوه چوخ اولار اوندان مواظب
او قیزی سسلر رقیه آدینا عاشقدی راهب
آغلارام عمرومجه آغلار دیدۀ شهلایه خاطر
.
.
او اوجا بویلی خانمدان اوزگه بیر مطلب دیوللر
گوندوزون گوزده فراقوندا سنون چون شب دیوللر
قیزلارون عمه خانملار آدینا زینب دیوللر
باشینی سالموش بلایه سن دوشن غوغایه خاطر
.
.
اهل بیت ایچره اوغولوای ورد ایدن لیلانی گوردوم
اکبر آدلی بیر جوانه آغلیان ثکلانی گوردوم
روبروسینده باخاندا بیر شه خوبانی گوردوم
گوزلری حیران باخار مجنون کیمی لیلایه خاطر
.
.
آیری یرده صید ایدن آهولری صیاده باخدیم
بیر طرفده تللری قانلی سر داماده باخدیم
بیر سریّه آدلی دان عرشه چخان فریاده باخدیم
آغلارام بی اختیار آغلار قالان ثکلایه خاطر
.
.
وار او باشلار ایچره بیر باش غنچۀ خندانه بنذر
قان دوزولموش تللرینده شطّۀ مرجانه بنذر
لبلری معلوم ایدر سو ایچمیوب عطشانه بنذر
ایچمیوب سو سن کیمی عطشان قالان مولایه خاطر
.
.
گوزلریم هر یان دولاندی بیر گوزل سیمایه دوشدی
چرخ غمده ناگهانی بیر دوتولموش آیه دوشدی
اختیاریم گیتدى الدن تا گوزوم سقّایه دوشدی
بیرده من هیهات ایچم سو تشنه لب سقّایه خاطر
.
.
.
کیش ترساده بیر عمری بیلمه میشدیم نیلمیشدیم
ناقۀ صبر و ثباتی صبح اولونجا پیلمیشدیم
اوپماقا قانلی دوداقون آرزو چوخ ایلمیشدیم
گیتمه قال بو دیرده دینه گلن ترسایه خاطر
.
.
آز قالور هجران غمینده کاسۀ صبریم جالانسون
ایسترم گوز یاشمیله قبرون اطرافی سولانسون
ایسته بو جمعیله سنده باشوه گلسون دولانسون
بیر (حسنی) آدلی نوکر زینب کبرایه خاطر
.
.
#دیر_راهب_حسنی_تبریزی
#باشوی_سجاده_مه_قویدوم_نه_تک_عیسایه_خاطر
#ترکی
.
✍️ #زبدةالاشعار ✍️
.
🆔: @nohe_torki
نظر دهید