حالات #قیامت ، اشاره به وقایع کربلا -#جنگ_دو_برادر – شجاعت و شهادت حضرت ابوالفضل العباس علیه السلام
195 بیت
.
.
.
مرحوم حاج عبدالعظیم ذهنی زاده
.
.
بصیرتیله گوزوم گور بو کون و امکانی
تمام عالمی هر ماسوانی بول فانی
.
گتوردی مُوجد عَدَمدن وجوده موجودی
گینه عَدَمدی بِلاشَک وجود پایانی
.
هامی یارانمش اولوب محو اولاندی آخرده
تلاوت ایله دوشون کُلُّ مَن عَلَیهانی
.
خدای لم یزل و حیّ و فردیدور باقی
ایدوبدی وجهینه مخصوص لفظ یَبقانی
.
همین بو دار فنا بیر نزولگهدی بیزه
نجه کی منزل ایدر کاروان بیابانی
.
بو کاروان او زمان قُرب مقصده یتیشر
که حشرگاهیده ایلر معاد جسمانی
.
ایدر او عرصگهه قادر قدیم احضار
هامی معاشر جنی نژاد انسانی
.
هامی گورر او گون اعمالینون نتیجه سینی
بدون اینکه نتیجه ویره پشیمانی
.
بیر ایله گوندی او گون یاد ایدنده اوضاعین
یاخون اولور ایده جیحون سرشگ دامانی
.
اولار او گون هامونون ورد و ذکری وا نفسا
نجه حبیب اولا یاد ایلمز اَحُبّانی
.
قاچار اوغول آناسندان آنا اوز اوغلوندان
محالیدور سالا بیر کیمسه یاده آبانی
.
خیال یوسف کنعانی ایلمز یعقوب
ابوالبشر ایده جاق ترک یاد حوّانی
.
ایدر کسوف او گون جرم نیّر اعظم
حجاب خسف دوتار روی ماه تابانی
.
گونیله آی ایکسی جمع اولولّا بیر یرده
اولور جماعتین اَینَ المَفرّ تِبیانی
.
اولار جماعت ایکی قسمته او گون تقسیم
بیرسی فرقۀ جنّت بیرسی نیرانی
.
.
✔️ راجع به وقایع کربلا
.
گر ایسته سن گورسن رستخیز اوضاعین
همان او گونده وقوعه گلن قضایانی
.
مجسّم ایله گوزونده عراق صحراسین
او دشت محنت و غم وادی بلایانی
.
گوزون گورر ایکی فرقه او قانلو صحراده
بیرسی فرقه رمان بیریسی شیطانی
.
بویاندا عدّه ئی معدود دور اُناث و ذُکور
او یاندا آتلو پیاده نظام یوخ سانی
.
او قدر قان توکولوب نعشلر قالوب بی سر
ایدوب عقیق یمن قان بَسیط غبرانی
.
نماز خوف قیلولّار بویاندا وحشتیله
او یاندان اهل نمازه وورالّا پیکانی
.
یخیلدی چوخلاری توپراقه ختم اولونجا نماز
اولوب شهید قویوب بی سپاه سلطانی
.
اولار کی قالدی کنارینده شاه مظلومین
یارالانوب هامی پیر و جوانین اَبدانی
.
مُبارزتله قالانلاردا بیربیر اولدی شهید
اولوبلا شوقیله بزم وصال مهمانی
.
او گلسِتانِ محبتده گول وجودیلری
امام الیله مزیّن ایدردی قَتلانی
.
بیر آز زماندا قالان بیر شه اولدی بیر سردار
نه قالدی قاسم و اکبر نه مسلم و هانی
.
.
✔️استیذان و وداع حضرت ابوالفضل العباس علیه السلام
.
قتال نوبتی یتدی او دم ابوالفضله
دوتوب غبار مُحَن نُه رواق مینانی
.
بو فکره دوشدی که شمس شهادته مه اولا
یازوب بولوردی قضا کِلکی بیله فرمانی
.
لوای سلطنتین آچدی پرچمِ فَتحین
شهنشهون باشی اوستونده اول وفا کانی
.
دولاندی باشینه عرض ایلدی سنه قربان
منیمده واردی باشیمدا هوای قربانی
.
اجازه مرحمت ایله که خاکپایونده
نثار ثار ایدوم ای ثاری ثارِ رحمانی
.
بَسان مور الیمده هدیّه جان نَقدی
حضوره گلمیشم ای کربلا سلیمانی
.
بو تحفه پیشگهونده حقیردور لیکن
قبول ایدر کرم اهلی هامی هدایانی
.
بو دللر آلدی دِلین اول شه شکسته دِلین
توکوب عذاره جگر قانی چشم گریانی
.
کمال حسرتیله باخدی بیر علمداره
او بیر باخیشدا واریدی رموز پنهانی
.
بویوردی سنده گیدیرسن نِدوم منِ بیکس
حسینووین بولوسن یوخدی یار و اَعوانی
.
سن اولماسان منه دشمن جَری اولار قارداش
توکر بو پیرو ناحق سپاه حق قانی
.
علاوه اهل و عیالیم گوزون تیکیبدی سنه
سنی بولور حرم اهلی ، حرم نگهبانی
.
کسیلسه پرتو لطفون سرِ حرمدن اگر
اولار حرم گونوزی لیل تار و ظلمانی
.
دوتوم که من دئمورم سن اؤزون خیال ایله
مَآلِ کارِ حریمِ امیرِ بطحانی
.
جواب ویردی اؤزوم آگهم مَطالبدن
ولی عیاندی سنه صبریمون یوخ امکانی
.
نِجه دوزوم اؤزون آگاهسن برادر جان
عطشدن عرشه چخوب اهل بیتون افغانی
.
بیری دیر عطشیمدن خدا هلاک اولدوم
یاخوندی ترک ایده روحیم بو تنگ زندانی
.
بیری الینده دوتوب بوش سو جامی سو دِلده
توکر او جامه سو تک اشگ چشم شهلانی
.
بویوردی ایمدیکی یوخ چاره سنده گیتملوسن
بیر آز سو ایسته ویره بلکه لشکر جانی
.
همینکه ایستدی گیتسون دیدی برادر جان
دایان دویونجا گوروم بیر او قدّ بالانی
.
بو یول ئولوم یولودی گیتمه بو شتابیله
یخار سُموم ستم بیله قد طوبانی
.
چتیندی بیرده سلامت گورم سنی هیهات
بُلاق گرکدی غنیمت بو مختصر آنی
.
بودور مرام دلیم قول بویون اولاق بیرده
یانان اؤرکده آزالداخ شرار هجرانی
.
همینکه قول بویون اولدی حسینیله عبّاس
گتوردی شوره بنات بتول عذرانی
.
سکینه فاطمه نی تاپدی زینبی کلثوم
سریّه شاه زنانی رباب لیلانی
.
بیوک کیچیک هامی بیر بیرله قول بویون اولدی
ظهوره گتدیله شورِ نشورِ عُظمانی
.
ایله سیزیلدادیلار ائتدیلر ایله شیون
صدای ناله دوتوب گنبد مُعَلّانی
.
همین بو ساعت اولوب اقتران شمس و قمر
سالوبدی صحبت اَینَ المَفَرَّه نِسوانی
.
بُلنمورم نه قیامت او گون قیام ائتدی
ولیک حشره کیمی اولدی محشر عنولنی
.
✔️آمدن حضرت ابوالفضل به میدان و نصیحت به لشگر
.
خلاصه هر ایکی قارداش وداع کامل ایدوب
یانا یانا قویوب اول ماه مِهر رَخشانی
.
باتوب خیامده میداندا چخدی بَدرِ مُنیر
ضیائی خیره لدوب چشم قوم اَعمانی
.
نصیحته دل آچوب زاده لسانُ الله
که خوابدن اویادا قوم دل سکارانی
.
منی بویوردی بو لشکر هامی تانور که کیمم
گونوز گون اولکماقون اولماز نیاز بُرهانی
.
منیم کُنیَّم ابوالفضلدور آدیم عباس
ویروب غلام حسینه علیِّ عُمرانی
.
بوگون ولیک علمدار شاه بی سپهم
علاوه ایلدی سقّا ولیِّ سبحانی
.
ویروب بو مشگی منی نهره ایلیوب اعزام
سِقاء تشنیه مأمور ائدلَّه سقانی
.
گلون آچون سو یولون آز عناد ایدون ای قوم
عطش شرارینه یاندورمون آل طاهانی
.
پیمبر اوغلی سوسوز قالسون عترتی یانسون
ولی فرات ایده سیراب وَحش و حیوانی؟
.
.
✔️وارد شدن حضرت ابوالفضل العباس به فرات
.
.
نقدر ایتدی نصیحت گوروب قبول اولماز
محالیدور آییدا پند و وَعظ اعدانی
.
گرک آچا سو یولون آبرنگ شمشیری
غلافدن چخادوب تیغ برقِ آسانی
.
اوزون ویروب قُوشونا ابن ضَیغَم الغَزَوات
صفوف میسره نی پوزدی نظم یُمنانی
.
بیرآز زماندا آچوب نهر علقمه شهراه
ووروب شریعیه سرعتله باد پیمانی
.
قباقجا مشگینی دولدوردی باغلادی بندین
اؤرکدن ایلدی حمد قدیم الاحسانی
.
همان او حالیده داغ عطشله داغلی دلی
آلوب بُرودت آب فرات دریانی
.
هر ایکی اوجونی دولدوردی ایستدی ایچسون
خیال ایدوب عطش خسرو لب عطشانی
.
نوکوب سویی دیدی اوز نفسنه ملامتیله
دگیل طریق مواسات دوست نسیانی
.
حرامیدور سنه شرع وفاده آب حلال
ایچر اؤرک قانی لب تشنه عشق قربانی
.
وفایه سیر ایله لب تشنه چخدی دریادن
ولیک ایلدی سیراب نَخل ایمانی
.
.
✔️خارج شدن از فرات و احوالات
.
.
جهاد اکبری ایتدی خیامه آت سالدی
صول الده مشگی دوتوب صاقدا تیغِ بُرّانی
.
به حکم میر سپه آلدی دوره سین لشکر
یاغش تک اوستنه یاغدی خدنگ بارانی
.
قویاردی مشکی ویراردی قلج آچاردی یولی
ایدردی مشکنه حامل دوباره یُسرانی
.
تمام همّتینی حفظ مشکه صرف ایلیوب
ایدردی مشکه وقایه تمام اعضانی
.
شجاعتیله او صحراده لافتی اوغلی
وورور توکور داغیدور قوم بی سر و پانی
.
او شیر شَرزه که هر سمته ایلور عَطفِ عِنان
قاچور چو دستۀ روبه گروه سفیانی
.
گئنه گلور گوتورور مشکی بیر قدر آپارور
گورر خدنگه نشانه نشان اَدنی نی
.
آپاردی خُرمالیقا حفظ مشک تدبیری
بو گیرو دار او تدبیر جنگه دارانی
.
قویاردی مشکنی نخله دالیندا دوره سینی
طواف ایدردی چو پروانه شمع سوزانی
.
مجسم ایله همان عالمی خیالوندا
او کثرت سپهی سر سپاه تنهانی
.
گرک نه قدرت اولیدی بیر الده بیر مشگه
ایدیدی کوته اوتوز مین ید تَعَدّانی
.
.
✔️ مقدمه #جنگ_دو_برادر
.
.
همان او حینده تلّ اوسته حسرتیله امام
ایدردی قارداشینون رزمینه تماشانی
.
گوروب مشقته سالموش سو مشگی عبّاسی
ایدوب فراهم اونا زحمت فراوانی
.
بو فکره دوشدی که قارداشینا حمایت ایده
دوزنمدی قویا یالقوز او شیر غَرّانی
.
آت ایستدی گتوروب دخت فاطمه زینب
دوتوب رِکاب سوار ائتدی ابن زهرانی
.
سوار اولان کیمی سسلندی جان سپهداریم
گلور حمایتوه عالمون جهانبانی
.
اوزون ووروب قوشونا الده تیغ آتشبار
داغیتدی قارداشنون دوره سندن اعدانی
.
✔️ #جنگ_دو_برادر
.
هر ایکی قارداش او دم آرخا آرخیا ویردی
ایدردی بیر بیرینون حفظنه تقلّانی
.
ایله ووراردی قلج مرتضی نشانه لری
که مشکل ائتدیله اشراره فتح آسانی
.
دیَردی هر ایکی دلبنده آفرین دِلدن
اگر باخیدی او دعوایه شیر یزدانی
.
او ایکی قامتی شور قیامتین قلیجی
سپاهه ایلدی محشر او دشت و صحرانی
.
گوروب بو شورشی سسلندی زادۀ وقّاص
مخاطب ایلدی اشرار شام ویرانی
.
دیدی بو طَرزیله وورسا قلج ایکی قارداش
دمِ حُسامه چکر جمله پیر و بُرنانی
.
تلاش ایدون آییرون شاهدن علمدارین
چکون کناره هاموز شاهد منایانی
.
قشون او وقتده دریا کیمی گلوب موجه
مُضاعف ایلدی فُلک نجاته طوفانی
.
آییردی قوم فشاری عنای مشک آخر
او شهریاردن اول شهسوار هیجانی
.
پیمبر اوغلی اویاندیدی ذوالفقار الده
توکردی توپراقا کفّار بی مُحابانی
.
بویاندا وارث حیدر النده شمشیری
ایدردی زیر و زبر قوم سست پیمانی
.
ووراردی خرمن عمر سپاه اشراره
شراره صاعقۀ تیغ آتش افشانی
.
ایله فشاره سالوبلار او قوم تنگدلی
که تنگ ایدوب قشونا اول وسیع میدانی
.
قاچور سواره ایاقلور پیاده نی آتلار
دوتوب او چولده یارالی نواسی هر یانی
.
نه وار آتا خبری اوز عزیز اوغلوندان
نه بیر خلیل سالور یادینه اَخِلّانی
.
امام ایستدی عبّاسیدن خبر بولسون
بو اختباره ایدوب اختیار اَیمانی
.
قلج ووراردی دیردی اَنَاابنُ ختم رسل
بابام پیمبره حق نازل ائتدی قرآنی
.
آلاردی بو سسی عباس اودا ویرردی جواب
آتام علی اوجادوب نام حیّ اعلانی
.
بیری بیرینون آلاندا سسین ایکی قارداش
سیلردی زنگ مُحندن دل مصفّانی
.
بیر آز گیچردی گینه سسلنردی سبط نبیّ
سایاردی مَنقبت لاتُعدّوا تُحصانی
.
گورردی گلدی جوابی گینه ابوالفضلون
علیدن ایتدی بیان افضل ثنایانی
.
اوقدر گیچمدی آلدی قَطَعتُموا سسینی
آلان او سَمعی هامی صوت جَهر و اِخفانی
.
بولوب که قارداشینون صاق قولی قلم لندی
ایدر صول اَللی جهادی او حیدر ثانی
.
ایله آلیشدی دل شهریار خونین دل
شرار آهینه یاندی وجود ارکانی
.
یَدُاللهین قولونی قوه دن بو غم سالدی
غم برادر ایدر بیله بیر تقاضانی
.
گینه وورادی قلیج سبط احمد مختار
نهان ایدردی همان محنت هویدانی
.
تلاش ایدردی که قارداشینا یتورسون اؤزون
قضا آپارمامیش الدن عنان یارانی
.
قلج ووراردی دیردی اَنَا اِبنُ مَحمودٍ
که نازل ایلدی حقّینده حقّ اَسرانی
.
دیردی قارداشی من لافتایه دلبندم
بو چرخ پیر گورنمز او شاهه همتانی
.
هامی بولور که منم بیر ابو تراب اوغلی
تراب ذلّته توکدی مَنات و عُزّانی
.
صول اللی ایلرم اؤز دینمون حمایتینی
ایچم شهادتیله جام مرگ اَحلانی
.
که یعنی غم یمه قارداش هله یخلمامشام
نشان ویرور صول الیم ضرب شست یمنانی
.
خلاصه حامی دینون ایکی رشید اوغلی
قیراردی فرقۀ مُرتَدّ و بی تَولّانی
.
اوقدر عرصه نی تنگ ایلمیشدیر قوشونا
ایدوب معاینه سفیانیان منایانی
.
اوحینده گینه سسلندی سَرورِ مدنی
دیدی مناقب سلطان و ملک لَولانی
.
بویوردی گوهر گنجینۀ رسولم من
علاوه وارث اعمال خلق میزانی
.
گوروب امام که سسلنمدی ابوالفظلی
بولوب کی یخدیلار اول سرو عالم آرانی
.
✔️شهادت حضرت ابوالفضل
.
کمال حسرتیله رزمگاهه سالدی نظر
اویان بویانه دولاندوردی چشم بینانی
.
آلوب او شه نظره مَصرع علمداری
همان او کعبۀ مقصود اهل معنانی
.
دیر او وقتده راوی که منده حاضریدیم
او عرصه گهده گورردیم او شاه خوبانی
.
سورور سمندینی سرعتله قارداش آختاروری
او شاهه شاهره آچمشدی عالی و دانی
.
بیر آز گلوب یخیلوب صدر زیندن ناگه
الیمدن آلدی بو غم دامن شکیبانی
.
ددیم حسینه خدایا نه یاره دگدی مگر
که سالدی آخر ایاقدان او سرو سرپانی
.
او قدر کچمدی گوردوم ایاقه دوردی امام
باسوبدی باغرینا بیر ال نشانِ جانانی
.
گهی اؤپردی گه ایلگردی قرمزی گل تک
همان او قرمزی قانیله دست حمرانی
.
دیردی بو اَلَه جانِ جهانیان قربان
روادی گوز بو اَلَه توکسه اشگ مرجانی
.
خدا بولور بو الون حقی چوخدی بوینومدا
گوروم گواه بو چوخ حقه حق دانانی
.
آلوب او حینیده قارداش سسین شه مظلوم
که داده سسلور او تخت ولایه اَولانی
.
تعاقب ایتدی سسی تاپدی قارداشی قارداش
گوروب خسوفه دوشوب اول مه درخشانی
.
بیر ایله صورته دوشموش مه بنی هاشم
تصوّر ایلیه بولمز او صورت مانی
.
نه حاله قالدی بیر الله بولوردی بیرده اؤزی
او حالتیله گورنده او قانه غلطانی
.
الین قویوب بلینه سسلدی وای آرخام وای
دوتوب نوای حسینی سپهر خَضرانی
.
کمال لطفیله اَگلَشدی توپراق اوستونده
او شهریار که ایتمز پسند دیبانی
.
ایکی الیله گوتوردی او قانلو توپراقدان
او توپراقا قانا آغشته ماه سیمانی
.
آلوب دیز اوسته باشین سویلدی سنه قربان
بو جان کی فدیه دی بو جانه عالمین جانی
.
بو چولده یاخشی مواسات ایلدون حقّا
جزای خیر ایده پروردگار ارزانی
.
سیلردی قارداشینون یوز گوزوندن القانی
که گوز آچوب گوره مه روی مهر زیبانی
.
آچاندا قانلی گوزون نور عین عینُ الله
گوروب جمال جمیل ایلین تَجَلّانی
.
او قدر قالمادی موسی کیمی دوشه مدهوش
گورنده وِجهۀ وجه خدانی نورانی
.
او طور عشقیده گلدی کلیم عشق دله
محلِّ صحبته زیبنده بولدی سینانی
.
چوخ انکساریله عرض ایلدی اوجالدی باشیم
گوروم اولیدی سر افکنده قوم ادنانی
.
منی بو دشتیده سندن خجالت ایلدیلر
اولیدی کاش خجل دوره سینده دورانی
.
ایدنمدیم سنه خدمت چوخ اعتذار ایدورم
اوزون قبول ایله بو اعتذار با جانی
.
نه بیر سن، اهل حرمدنده شرمسار اولدوم
سنه عیان ایلیوب لامکان خفایانی
.
سنون بو وقتیده تشریفون ای شرف کانی
منی موفق ایدوب ایلیم وصایانی
.
سنی قسم ویرورم فاطمه جلالتینه
قبول ایله من ابوالفضلیدن تمنّانی
.
نه قدر ئولممیشم خیمیه آپارما منی
وار احتضاریمون ایسّی قوم اوسته رُجحانی
.
سو اولمادی بولوسن اهل بیتیدن خجیلم
شکست ایتدی قضا رسم عهد و ایفانی
.
دَگیدی قلبیمه مشکه دگن خدنگ ای کاش
سُووَردی مرغ دلیم بیله تیر پرّانی
.
فسوس و آه گلوب مشکه دگدی پاره لدی
سو آخدی نقش بر آب ایلدی عنایانی
.
دیه دیه سوزونی یومدی گوز دیدی تهلیل
یانا یانا قویوب اول وارث مسیحانی
.
امام ایستدی قتلایه نعشینی آپارا
مُزَیّن ایلیه بو گول همان گلستانی
.
هزار حیف او تک باغبانِ گلشن عشق
یغانمادی او گلِ برگ برگ خندانی
.
الینی قارداش الیندن اؤزؤب خیامه گیدیر
گوتوردی لیک نشانه او مشک شان شانی
.
بیر آز گیدور دایانور قارداشا باخور آغلور
سرشکی موجده شرمنده ایلور عمّانی
.
گورن بولوردی که چوخ ناگراندی قارداشدان
شرار هجر برادرله قلب بُریانی
.
باخاندا بیرده گوروب ماه هاشمی باشینی
جدا بویوندا ایشقلاندوروبدی دنیانی
.
دورار جدا بوئی گون خلقه گر قیامت اولور
حسینه لیک بو آی ویردی حشر اِعلانی
.
کُسوفه مایل ایدوب شمس عشقی ماه وفا
محبت اهلی ایدر حلّ بو معمّانی
.
عجب دگور سالا خَسف قمر کُسوفه گونی
عجب بودور گوره گون وقت ظهر یَلدانی
.
خلاصه خیمیه یتدی امیر حِلّ و حَرَم
چاقوردی زینب وارونه بخت نالانی
.
بویوردی یغ باجی جان اهل بیتیمی باشیما
چاقور اولان حرم عصمت ایچره ثَکلانی
.
گلوب منیله ابوالفضلیمه بیر آغلیالار
دویونجا اوخشیالار اول جوان رعنانی
.
یغشدلار چادرا اهل بیت شاه وحید
او بزم ماتمه اولدی امام اوزی بانی
.
عزایه سیر ایله بیر ماتمه گلنلره باخ
بو چرخ گورمز ایله دورۀ مُعزّانی
.
دئمم ووراردی بیری گل جمالینه سیلی
و یا یولاردی بیری طُرّۀ مُطرّانی
.
بو قدر وار ایله آغلاشدیلار سیزیلدادیلار
صدای ناله ثَرادن دوتوب ثُریّانی
.
امام گوردی کی واضَیعَتا دِیَر زینب
یوزونده آرتوری سیل سرشگ طوفانی
.
بویوردی ای باجی واضَیعَتا بَلی والله
نه یاخشی بولدون اوزون درد بی مداوانی
.
بو قوم ایلدی نسل پیمبری ضایع
داغتدی ظلم الی شیرازه بند فرقانی
.
تدارک ایله اسیر اولماقوز یقین اولدی
دیار شامه چکر شامیان اُسارانی
.
بیله گمان ایدورم شه دِیَن کیمی بو سوزی
دگیشدی نغمه ئی هر عندلیب شیدانی
.
دانیشدیلار بالالار بیر بیریله آهسته
یتوردولر باشا بیر آز زماندا نَجوانی
.
ال آتدی هر بالا اوز زیب و زینتین سویدی
نه گوشواره نی ساخلوب نه زینت پانی
.
نه عقد لولوئی بیر قیز قویوبدی بوینوندا
نه ساخلادی بیر اوشاق دست بند لالانی
.
دیردیلر که نه ایدر دست بند و گردن بند
اسیره قیز که نه حامی نه مایۀ شانی
.
طناب ظلم اولاجاق دستبندیمیز آخر
وورار بویوندا کمند عُقده عِقدیمیز سانی
.
سویوندی قیزلار اسارت تدارکین گوردی
قویوبلا شوریله اجرایه امر مجرانی
.
✔️ تخلص
.
او بزم ماتمین اَل وورما شرحینه «ذهنی»
یووار سرشگ قلم ایلین بیر املانی
.
بو شرح محنتی قوی روز محشره قالسون
قیامت ایله همان رستخیز کبرانی
.
خلوص نیتیله چنگ وور بو دامانه
آپار سعادت دنیا و فیض عقبانی
.
خدادن ایسته نصیب ایلیه بو جمعیله
طواف مرقد شاهنشه خراسانی
.
او آستانه بو روی سیاهی قویسام اگر
چراغ قبر ائدرم نور وجه بیضانی
.
او دار غربت آرا ایلرم انیس دله
خیال مرحمت ضامن غریبانی
.
.
.
#عباسیه_شجاعت
#عباسیه_شهادت #قیامت_ذهنی_زاده
#بصیرتیله_گوزوم_گور_بو_کون_و_امکانی
#ترکی
#زبدةالاشعار
نظر دهید