اربعین
.
✍️ زبدة الاشعار ✍️
.
🆔: @nohe_torki
.
حاج رضا محمدی ( ولایی )
.
بلا چکن باجووا قیل نظاره آی قارداش
آخیر سرشکی نجه گور عذاره آی قارداش
.
عنایت ائتدی باجون زینبه خدای احد
گلوبدی کرب وبلایه دوباره آی قارداش
.
جلالتی داغیلان زینبون اولا قربان
بو آلتی گوشه لی پوزقون مزاره آی قارداش
.
علی اصغریوی سینه ده یاتیردیبسان
مزار اولوب قوجاقون شیرخواره آی قارداش
.
یاخینلاشوب ایکی اوچ پر اوخون عجب یاراسی
یاتوبدی یاره نین اوستونده یاره آی قارداش
.
ایاقون آلتدا ادبدن یاتوب علی اکبر
کی نعشی اولموشیدی پاره پاره آی قارداش
.
سیزی شهید ائلیندن سورا.اسیر اولدوخ
بوچولده فرقه کینه شعاره آی قارداش
.
طنابه چکدیله اعداء بنات زهرانی
سالیبلا محنت ورنج وفشاره آی قارداش
.
مگر دئمیر بیزه قرآن ودین تسلی ویرون
تزه عزیزی ئولن داغداره آی قارداش
.
تسلی وئرمدیلر هئچ ووروردولار قمچی
شماتت ائتدیله هر اشکباره آی قارداش
.
حسین گوزوندان ایراق خارجی بیزه دیدیلر
گیرنده کوفه او ویران دیاره آی قارداش
.
جدا باشیندا گورنده کوله باتان باشیوی
گونوز گوزومده دونوب لیل تاره آی قارداش
.
آیین نجه شب اول هلالی گورسنسه
ائده ّله خلق اونا ساری اشاره آی قارداش
.
او نوعی بیربیرینه گورسدیردیلر باشیوی
منیم ده اشکیم آخیردی عذاره آی قارداش
.
بیر عده داش بیزه ووردی بیر عده دیل یاراسی
دوروب بیر عده ائدوردی نظاره آی قارداش
.
بیر عده گتدی تصدق شرفلی ساداته
بیر عده همرهیدی نیزه داره آی قارداش
.
یاراندا آلنوی داش نیزه ده ئوزون گوردون
دوزمّدوم داخی او انکساره آی قارداش
.
بلالی باشیمی من چوب محمله چالدوم
الیمده چون یوخیدی آیری چاره آی قارداش
.
خلاصه باشیمیزه اولمیان بلا گلدی
بلالرین سایی گلمز شماره آی قارداش
.
بئله مصائبیله قویمادوم دیه لطمه
دفاع حق او تعالی شعاره آی قارداش
.
بیزی آپاردیلا دار الاماریه جبراً
دولاندی باشیمه دنیا دوباره آی قارداش
.
طرب بناسینی قورموشدی ابن مرجانه
ووروردی هی دل احراره یاره آی قارداش
.
جسارت ائتدی زیاد اوغلی یاره لی باشوا
بو اودلی سینمه سالدی شراره آی قارداش
.
باخا باخا بالالار چوب خیزرانیله
دوداقیوه ائلیوردی اشاره آی قارداش
.
دئدوم کی قوی دئمسینلر حسین آدامسیزدی
توکل ائتدوم ازل کردگاره آی قارداش
.
آتام علی کیمی دوردوم وقاریلن ایاقا
تمام غملری قویدوم کناره آی قارداش
.
بئله دانیشدوم اوگون تا نقدری وار دنیا
ئوزونده ثبت ائده دار الاماره آی قارداش
.
اساس ظلمی گتیردی تزلزله خُطبم
بنی امیه نی سالدوم حصاره آی قارداش
.
ائله دانیشدوم اوگون اهل مجلسین هامیسی
ائدوبله لعنت او بی اعتباره آی قارداش
.
اولار کی بیزلره داش وورموشیدی گولموشدی
انابه ائتدیله پروردگاره آی قارداش
.
حسین خلاصه سنون قویمادوم یاتا علمون
اگرچی قلبیمه چوخ دگدی یاره آی قارداش
.
نقدری شکر ائدم آللهه حقی اولماز ادا
کی تاپدوم ال بئله بیر افتخاره آی قارداش
.
ولیک بیر سوز اخا چوخ پوزوبدی زینبیوی
چتیندی شرحی من دلفکاره آی قارداش
.
سپهر محنت وغم بس کی قالدی ظلمتده
دیار شامیده آخدی ستاره آی قارداش
.
ئولیدی کاش باجون بوسوزی دیونجه سنه
رقیه یومدی گوزون روزگاره آی قارداش
.
حسین ئوزون بیلوسن کی رقیه یه خاطر
گلیلیم فلک کج مداره آی قارداش
.
یارالی باشیوی ویرانسراده تا گوردی
اولده توکدی سرشکین عذاره آی قارداش
.
بیر آز دانیشدی ائلیکی یارالی باشونلا
ییخیلدی پیکری بیردن کناره آی قارداش
.
جواب وئرمدی هر قدری سسلدوم بالامی
قیامت اولدی من بی قراره آی قارداش
.
کفن تاپیلمادی چون..قاره معجره بوکدوم
رقیه نین کفنی اولدی قاره آی قارداش
.
اونا خرابه ده بیر خیردا قبر ئوزوم قازدوم
ئوزوم رقیه نی قویدوم مزاره آی قارداش
.
بو قیرخ گونی فقط آلله بیلور نلر چکدوم
بلایه همقدمیدوم هماره آی قارداش
.
#ولایی هی یازوب آغلیر بیزیم مصیبتدن
بو یولدا قلبی اولوب یاره یاره آی قارداش
.
عنایت ایت قلم وطبعینی روان ایله
اولا سپهر ادبده ستاره آی قارداش
.
.
#اربعین
#بلا_چکن_باجووا_قیل_نظاره_آی_قارداش
#محمدی_ولایی
#ترکی
.
✍️ #زبدةالاشعار ✍️
.
🆔: @nohe_torki
نظر دهید