زبدةالاشعار

بوعلمی مشق ویروب اهل عشقه بیر استاد #قاسمیه_سعدی_زمان

حالات حضرت قاسم علیه السلام
.
✍️ #زبدةالاشعار ✍️
.
🆔: @nohe_torki
.
مرحوم سعدی زمان
.
بوعلمی مشق ویروب اهل عشقه بیر استاد
مدیر عشق بو عشّاقی ایلیوب ارشاد
.
باشندا هر کیمون اولسا محبت معشوق
فراق اودوندا یانار متّصل چکر فریاد
.
مریض عشق اولانون درد دل طبیبی اولا
خیال یاریله غم چکماقا اولا معتاد
.
غذاسی خون جگر شربتی سرشگ بصر
انیسی ناله اولا مونسی دل ناشاد
.
عراق دشتنی صحرای بی ستونی دوتوب
صدای نالۀ مجنون و تیشۀ فرهاد
.
همیشه عاشقی معشوق امتحان ایلر
که عشقی ثابت اولا اهل عالم ایلیه یاد
.
بو امتحانی ویروب کربلاده شاه شهید
ایدوبدی عشق یولین طیّ علت ایجاد
.
.
ئولوب کومک لری یکسر قالوب وحید و فرید
گلوب حضوره او ساعت ده قاسم داماد
.
آلوب اجازه او شهزاده با هزار شعف
اوزین یتوردی صف دشمنه بعزم جهاد
.
دوروپ باخوردی شه دین خیم قباقنده
اوزین وروب قشونا اوُل جوان پاک نژاد
.
ایدردی حمله یمین ویساره حیدر تک
قاچاردیلار قباقندان تمام اهل عناد
.
آپاردی قلب سپاهه او شیر دل حمله
اولوبلا منتشر اشرار کوفه مثل جراد
.
دوشوب بو فکره ایده سرنگون قلب علمین
بو چرخ قویمادی چرخین ایوی اولا بر باد
.
هزار حیف او ناکام یتمدی کامه
خراب اولیدی گوروم کاش بو خراب آباد
.
ز بس که لشگری سعد اوغلی ایلدی ترغیب
سالوبلا دلدن اونی کوفیان بد بنیاد
.
وروبلا بسکه سنان و خدنگ و داش یاراسی
گیدوبدی طاقتی بیحال اولوب او پاک نهاد
.
او قدر جسمنه دگدی یارا یارا اوستن
دورانمیوبدی آت اوستونده قاسم ناشاد
.
دیدی امام حسن جنت ایچره وا ولدا
یخلدی توپراقا صد پاره قامت شمشاد
.
دوتوب خیامه یوزین سسلدی عمو تئز گل
یخوب یره منی آتدان بو فرقۀ بیداد
.
یارالی آهو کیمی سالدیلار منی دامه
آلوبدى دوره می بر نئچّه سنگدل صیاد
.
چوخ آرزو ایدورم جان وئرم حضورونده
نولور بو حالده لطفیله ایلسن منی یاد
.
دوروبدیلار باشیم اوسته عمو بوفرقۀ کین
چکوبله قتلیمه اللرده خنجر فولاد
.
قویوبدی حنجریمه خنجرین عداوتیله
یاخوندی باشیمی کسسون بو رحمسیز جلاد
.
بو صون نفس ده عمو جان اگر یوزون گورسم
شکسته قلبیم اولور قید غصه دن آزاد
.
بویور آنام یولاچوخ تیکمسون داخی گوزینی
چتین منی گوره لر بیرده عترت أمجاد
.
آتام که یوخدی گله باشیم اوسته جان ویرورم
بو حالده منه گل ایله سن اوزون امداد
.
ایدوبدی پیکریمی پایمال سمّ ستور
گویون ستاره سی تک یوخدی زخمیمه تعداد
.
نولور بوآخر عمریمده سر فراز ایده سن
یوخومدی کیسمه بو جان اوسته ایلوم استمداد
.
.
ائشتدى خیمه ده قاسم سسین امام حسین
آخوب عذارینه گوز یاشی ائتدی شیون و شین
.
.
سوار اولوب آتنا پادشاه ملک حجاز
یتوردی قاسمه اوُل شه اوزینی چون شهباز
.
باخوب نگوردی که بیر کافر ستم پرور
قویوبدی قاسم ناکام حلقنه خنجر
.
ایدوبدى غیظیله بیر تیغ اشاره شاه امم
او بیجیانون اولوب بیر قولی او دمده قلم
.
دوتوب یوزین قشونا اول لعین ایدوب فریاد
دیدی اماندی گلون ایلیون منه امداد
.
گلوب تلاطمه دریا کیمی قشون یکسر
احاطه ایلدی مظلوم امامی دشمنلر
.
قارشدی بیر بیره آتلو پیاده سر تاپا
او عرصه گاهی او حالتده دولدوروب غوغا
.
بو یرده قلبیم الولاندی یا امام زمان
نجه بو مطلبی ایلوم من آشکار بیان
.
او حالیله که ایدوب آتلولار او چولده فرار
وجود قاسمی اولموب ایدن او یرده کنار
.
قاچاندا وحشتیله هریانا او قوم دنی
قالوردی آتالار ایاقنده قاسمین بدنی
.
دگنده سمّ ستوان یارالی پیکرینه
یتردى ضعف او حالتده قلب مضطرینه
.
دیردی گل عمو ظلمیله گلشیم سولدى
جنازم آتلار ایاقنده پایمال اولدی
.
مگر یتیم اولانون دادینه یتن اولماز
مگر یتیم اولانون حالینی بُلن اولماز
.
ایدردی قاسم شهزاده آه وشیون و شین
قلج وراردی ولی کربلا غریبی حسین
.
صداسینی ایشدوب قاسمین توکوب قانیاش
بویوردی قارداشیم اوغلی عمون ئوله ایکاش
.
داغتدی لشگر کفّاری خیلی سرعتیله
یتیشدی قاسمه سالدی نظر محبّتیله
.
گوتوردی آلدی دیز اوسته باشین امام هدا
دیدی چتندی بو حالون سنون غریب عموا
.
که سن چاقوراسان امّیدیله اونی داده
گله بو سرعتیله رزمگهده امداده
.
کومکلیقی اولا منظور دشمنین دفعی
ایده کومکلیق اونون اولمیا سنه نفعی
.
ایاقه دور آپاروم نعشوی خیامه اوغول
گوره اوغولسوز آنان تا یته مرامه اوغول
.
تیکوبله گوز یولووا اهل بیت پیغمبر
آنان سریّه آچوب باشینی یولون گوزلر
.
غرض جنازه سی اوستونده شاه تشنه لبان
توکوب سرشک بصر ایلدی چوخ آه و فغان
.
ز بس او حالتی یاندوردی قلب مضطرینی
خیال ایدوب آپارا خیمه گاهه پیکرینی
.
گوروب که گل یوزینه قطره قطره قان دوزولوب
او قدر یاره دگوب بند بند دن اوزولوب
.
باخوب جنازه سنه گلدی محنتی جوشه
یاپوشدی باش طرفندن که آلسون آغوشه
.
دُر سرشگیله دولدی او دمده گوز صدفی
باشین گوتوردی یر اوسته قالوب ایاق طرفی
.
غرض جنازه نی بیر نوعیله گوتوردی امام
یانا یانا ایلیوبدور او وقته عزم خیام
.
بو سوز که عرض ایدورم مقتلین عبارتی دور
صحیح دور خبری مجلسی روایتی دور
.
یازور که قاسم شهزاده روز عاشورا
یتیشمه مشدی بلوغه او نوگل زیبا
.
سالوردی حیرته حسنی هم انس وهم جنّی
واریدی بلمورم اون دورت یا اون اوچ سنّی
.
بودورهمان خبرین کشف اولاندا مضمونی
واریدی طرّۀ شبرنگی قدّ موزونی
.
او قدر یاره ولی ورموشیدی قوم دنی
او نوجوانین اوزانمشدی نازنین بدنی
.
باشینی سینیه آلموشدی شهریار زمن
گیده گیده سورونوردی ایاقلاری یردن
.
جنازه نی یتورونجه خیامه جانه دویوب
گتوردی تا که علی اکبرین یانندا قویوب
.
قیت دی خیمیه اول پادشاه کلّ امم
کناره چخدی خیمدن مخدّرات حرم
.
حریم حق یوزه جاری ایدوبله اشگ زلال
او ماه پاره نین آلدیلا دورین هاله مثال
.
باخوب جنازیه یکسر آچوبلا باشلارینی
دوشوبله حیرته بیردن یولوبلا ساچلارینی
.
نجه جنازه دل عاجزدی ایلسون شرحین
او گل جنازه نین آت دیرناقی پوزوب طرحین
.
نجه جنازه اولوب قانه غرق سر تا پا
ووراندا ال داغلور بند بنددن اعضا
.
نجه جنازه خدا سر بسر جراحتدور
نه باش نه سینه نه بطنی اونون سلامتدور
.
نجه جنازه قزل گل کیمی قانا بویانوب
وروبلا بطننه بیر نیزه بطنی پارچالانوب
.
نجه جنازه اولوبدور بهار عمری خزان
ایدوبله پیکرینی برگ گل کیمی خندان
.
گوروب جنازه نی اودلاندی زینب کبری
زبانحالیله اوخشاردی اول ملک سیما
.
ستمله قانه باتان گل عذاری وای بالا وای
وفالی قارداشیمون یادگاری وای بالا وای
.
حناسى قان طویونی دوندرن فلک یاسه
باتان عزایه قرابخت یاری وای بالا وای
.
خطالی اوچیلارین دستگیری آهو تک
خدنگ و نیزه و خنجر شکاری وای بالا وای
.
اولان قلجلاریله قطعه قطعه اعضاسی
دگن وجودینه چوخ زخم کاری وای بالا وای
.
اولان منای محبتنده تشنه لب قربان
عزیز فاطمه نین جان نثاری وای بالا وای
.
دیوب بو سوزلری تا نطقدن دوشوب زینب
گلوبدی شوره سریّه شروع ایدوب مطلب
.
دورای عزیزلقیم عالمده عزّ و جاهیم اوغول
باشیم اوجالیقی محنت گونی پناهیم اوغول
.
بو قان دولان گوزون آچ گوزلرون بلاسین آلوم
نظاره قیل یوزیمه بیرجه دادخواهیم اوغول
.
بوقطعه قطعه بدن سنسن ای گوزوم نوری
و یا بو منظره ده واردی اشتباهیم اوغول
.
بو بخت قاره آنان ایلدون گونی قاره
سپهر حسنده ای آفتاب و ماهیم اوغول
.
باخاندا نعشوه قلبیم یانور جگر آلیشور
سالور شراره سماواته دود آهیم اوغول
.
.
آناسی ساچلارینی یولدی قیلدی چوخ افسوس
جنازه اوسته دوشندی گلوبدی نطقه عروس
.
.
دیدی عم اوغلی گوز آچ ایله بیر یوزیمه نگاه
اولوبدی گور نجه مونس منه فغانیله آه
.
یوزون خسوف ایلیوب قانیله چو بدرمنیر
اولوبدی قاره گونوم ای سپهر بختیمه ماه
.
یقینیم اولدی منی دستگیر ایدر اعدا
چکلّه مجلس ابن زیاده خواه نخواه
.
یزید مجلسنه چکسه لسر قولی باغلو
کنیز ایستسه لر کیم اولور بو زاره پناه
.
باشون دالنجا دولانّام دیار شاماتی
اسیر عشقوم اثباتینه واریمدی گواه
.
طناب و سلسله نی الده ایلرم عدلین
مقام عشقده ویرم نشان جلالت و جاه
.
«حسینی» ساخلا الون مطلبون اوزاندی دایان
فراز صحبتی دوندر کلامی قیل کوتاه
.
بو آستانیه صدقیله سال دخیل اوزوی
زیارتین گنه بر قسمت ایلسون الله
.
.
#قاسمیه #سعدی_زمان
#قاسمیه_شهادت
#بو_علمی_مشق_ویروب_اهل_عشقه_بیر_استاد
#کنزالحسینی2
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  انوار حق اولموش گینه تابنده قربان بایرامی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی