زبدةالاشعار

بومطلبی که یازمیشام اوراق دفتره #رضویه_اشرفی

کرامت امام رضا علیه السلام
.
✍️ زبدة الاشعار ✍️
.
🆔: @nohe_torki
.
حاج علی اشرفی عین الدین
.
بومطلبی که یازمیشام اوراق دفتره
مربوط اولور کرامت آل پیمبره
.
الله کمک لیق ایلسه یار اولسا طاقتیم
جذب ایلیر مخاطبی نظمیم کتابتیم
.
سعییم بو دور ئورک سئون اولسون وزین یازام
سوزده تصرف اولمیا عینا ئوزین یازام
.
راوی سی علم صاحبی دور پاک نیتی
شهرین نماز جمعه سینه وار امامتی
.
ائتسم اشاره آدینه اولماز رضایتی
آلام اجازه وار منه نسبت عنایتی
.
(سیدرضا) آدی (رضوی) علم صاحبی
تاثیر ائدر کلامی کیم اولسا مصاحبی
.
تدریس ائدر او خاطره شیوا بیانی وار
صحبت لرینده علم زمانین نشانی وار
.
قرخ آی بئزیم اداره ده قبلا مدیراولوب
خدمت لری بومنطقه یه بی نظیراولوب
.
اون گون اجازه آلماق فیض زیارته
درخواست الیمده گئتدیم اطاق ریاسته
.
چون هر سوزین یرین تانیار اول بزرگوار
بو مطلبی بیوردی به عنوان یادگار
.
سید محمد آدلی قارداشی وار صاحب کمال
تقوا و معرفت ده بیوک قارداشا مثال
.
اوندان بو مطلبی بیزه نقل ایلدی آقا
طبعیم ده اولدی داوطلب ، نظمه چکماقا
.
گویا اولوبدی مشهده عازم قطاریلن
سنی جوان ئورک دولوسی عشق یاریلن
.
بیر کوپیه دوشوبدی گوروب خانواده وار
هر کیمده غیرت اولسا حیاء فوق العاده وار
.
حجب و حیاسی مانع اولوبدور اوتورماقا
راضی اولور سالوندا ایاق اوستده دورماقا
.
مامور پرس و جوائلیور نیتین بوله
اگلشمیوب یرینده نیه، علتین بوله
.
باعث ندور عزیزیم ایاق اوسته دورموسان؟
بوشدور یرون نه علته خاطر اوتورموسان؟
.
جریانی شرح ائدوراونا تا شکّی قالماسین
من راضیم بو وضعه یریم اولمور اولماسین
.
ماموره سیدین سوزی چوخ ایلیور اثر
حل ایلرم بو مشکلی صبر ایله مختصر
.
سندن خوشوم گلوبدور عجب پاکزاده سن
حالون نشان وئرور که نجیب خانواده سن
.
وار بوردا بیر نفر که ئوزی تکدی کوپه ده
سنلن مصاحب اولماقی گوچکدی کوپه ده
.
بیر خواهش ایلرم اونا شاید اولا رضا
خواهش قبول اولمادی اولده از قضا
.
ماموردن سئوال ائلدی کیمدی یولداشیم
بیلدی منم که مذهبی دور سقلیم باشیم
.
وئردی اجازه حرمتیلن احترامیلن
اذن دخول آلیندی اُتوردوم سلامیلن
.
بیر آزسووشدی مندن ائدوب شغلیمی سئوال
چوخ اختصاریلن ائلدیم منده شرح حال
.
دانشجویام دئدیم نئچه ترمیم قالور هله
کلاً لوازماتی آقام گیل آلور هله
.
ماموریت واریمدی بو شهر مقدسه
شکر ایلرم بو باره ده خلاق اقدسه
.
تا بیلدی سیّدم دئدی چاتدیم سعادته
ائتدی اشاره حقّینه اولموش کرامته
.
من دکترم دئدی منه لطف ائیلیوب آقام
اوندان کرامت اولدی هله ئولمدیم ساقام
.
ائیللّر قاباق مریض لیک ائله آلدی جانیمی
اِئلّلر گوزومی باغلاماقا کَسدی یانیمی
.
ایراندا چاره اُولمادی باش وئردیم هر یانا
ناچار اُولوب طبابت اوچون گئتدیم آلمانا
.
آلماندا دوستلاریم دئدی یوخ چاره دردیوه
درمانی یوخدی گزمه چوخ آواره دردیوه
.
گِئت اِیوده استراحت ائله دوشمه زحمته
آماده اُول یواش یواش آز قالدی فرقته
.
حق دور ئولوم هامو گئده جاق دار فانی دن
سعی ایلیاخ که یاخشی چیخاق امتحانیدن
.
گلدیم دوباره مملکته حال زاریلن
گونلر گئچوردی قورخولی بیر انتظاریلن
.
یُول اوسته کی مسافره بنذوردی حالتیم
نه گزمگیم یاپوشدی نه ده استراحتیم
.
هر منظره گورنده دیُردوم باخوم دُیوم
فکر ایلینده قلبیم اولوردی اُویوم اُویوم
.
نه عمر بیر اوزون گئجه وحشتلی داشلی یول
روحیه دن دوشنلره آخر نه باش نه قول
.
ایستکلی دیندیریردی تانشلار داریخمویام
باعث اولوردی چوخلی خیابانه چیخمویام
.
بیر شمعه بنذورم قالور آخر یانیشلاری
حالیم مکّدر ایلیوری دوست تانیشلاری
.
ایودنده یالواریردیلا بیرگئت زیارته
منده دچاریدیم اُو زمان حیف غفلته
.
ردّ ایلورم که یوخدور عقیده م بو سوزلره
راحتلشون که زحمتیم آز قالدی سیزلره
.
بیر حاله قالدیم ایلدیلر الده جا به جا
شرح ایلینمرم او حالی دیلده جا به جا
.
رؤیاده گوردوم اوج سعادتده دورموشام
صحن حرم ده صندلین اوسته اوتورموشام
.
بیر شخص او حالدا گلدی قویوب چیگنیمه الین
اوخشاتدیم افغان اهلینه شکلین شمایلین
.
مندن سئوال ائدوب آقاقربانلیق ایستوسن
وار منده نذرون اولسا گر احسانلیق ایستوسن
.
دوردوم دئدیم اِئدون منی آماده سفر
قصد زیارت ایلموشم ایلورم خبر
.
شاد اُولدی منزل اهلی سئوینمکدن آغلادی
اُو آغلاماق ئُورگیمی بالمرّه داغلادی
.
قیلدوخ سفر تدارکینی اشتیاقیلن
گلدوخ خلاصه بو حرمه اتفاقیلن
.
وئردیم نشان اُو نقطه مخصوصی عورته
آغلار گوزیله منتظر اولدیم کرامته
.
رؤیاده گوردوگوم کیشینی گوردوم آشکار
حیرتده قالموشام بو ایشه بیلمورم نه وار
.
قربانلیق ایستوسن دئدی اُپدوم دوداقلارین
حالیم یوخیدی یوخسا اُپردیم ایاقلارین
.
ذبح ایلدوخ اُو قربانی حق ائیلدی قبول
آلدیم شفا می اولدی آغیر ایستکیم حصول
.
گونلر کئچوردی خوف و رجا حالتیندیم
هر لحظه ورد و ذکر و دعا حالتیندیم
.
مدت دئموشدیلر ایکی آی کئچدی ئولمدیم
آغریمدا گون به گون آزالوب دردی بولمدیم
.
غملر داغیلدی آلدی یئرین صحت و صفا
بولدوم آقام کرامت ائدوب آلموشام شفا
.
دنیا ایشیقلانوب گوزیمه ردّ اولوب دومان
گئتدیم دوباره المانا مسرور شادمان
.
اصل طبیبیمی دئیم ایراندا تاپموشام
ئوز دردیمه علاج خراساندا تاپموشام
.
تا گوردیلر منی سئوینوب همکلاسلاریم
جمع اُولدیلار منیم باشیما جمله دوستلاریم
.
فکر ائتدیلر طبابت اوچون گلموشم گینه
دقتله ائیلیوبله منی بیر معاینه
.
گوردوم جوابینه هامی حیران قالوبدیلار
مندن اُو آزمایشی بیر ده آلوبدیلار
.
اظهار ائتدیلر داها یوخ دردیدن اثر
گئتّدون سن هانسی دکتره وئر بیزلره خبر
.
اصلی طبیبیمی دئدیم ایراندا تاپمیشام
ئوزدردیمه علاج خراساندا تاپمیشام
.
تعریف اُولوندی دوستلاریما کل ما مضی
هر تک تکی دئدی ائوین آباد( امام رضا(ع))
.
ایمدی هر ائیل گلوب اوُپرم آستانه سین
یاددان چیخاتمارام کرم بی کرانه سین
.
باب الحوائج اوغلی دی بو معدن کرم
دارالشفا دی شیعیه بو با صفا حرم
.
ای دردمند سنده دئنن احتیاجووی
آغلا داریخما سنده آلارسان علاجووی
.
شوق زیارت ، اشرفی، نین طاقتین آلوب
چوخلار کیمی اُو د ا آقا دان حاجتین آلوب
.
.
.
#رضویه_مدح
#بو_مطلبی_که_یازمیشام_اوراق_دفتره
#رضویه_اشرفی #ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  فایض اولدی فیض شهادته میر مومنان مرتضی علی #حیدریه_خادم_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی