زبدةالاشعار

بو رایی ایلمیشم اوزلیقیمدا من تصویب #کاظمیه_سعدی_زمان

شهادت حضرت امام کاظم (ع)
.
✍️ #زبدةالاشعار ✍️
.
🆔: @nohe_torki
.
مرحوم سید رضا حسینی #سعدی_زمان
.
بو رایی ایلمیشم اوزلیقیمدا من تصویب
ایدم قضیّه ی موسی بن جعفری تعقیب
.
ایدر گوزوم یاشی شرمنده بحر عمّانی
سالاندا یادیمه زندان غریبی موسانی
.
او گونکه دوتدولا موسی بن جعفری اشرار
دیار بصریه گوندردیلر او مولانی
.
قالوبدی بصره ده بیر مدّت اول امام غریب
ولی مُوَکّلی گوزلردی رسم مهمانی
.
امامه ایتمزیدی هتک حرمت و آزار
روا او سروره گورمزدی جور و ایذانی
.
بُلوب بو مطلبی هارون که والی بصره
چوخ احترامیله ساخلور او شاه والانی
.
گوتوردی یازدی یولا سال امامی بغداده
مُوکّلی یولا سالدی او شاه دورانی
.
نجه گَتوردیله بُلمم بو قدر عرض ایدورم
یوزینده ظاهریدی انکسار پنهانی
.
ندندی اولمادی بر باد خطّه ی بغداد
اسیر گَتدیله بغداده شاه بطحانی
.
ایدوب عنادینی هارونِ بی حیا ظاهر
گَتوردی نالیه دوردومجی گویده عیسانی
.
پیمبر اوغلونا ووردوردی بیر آغور زنجیر
غم و مصیبته سالدی بتول عذرانی
.
او شاهه ایلدی سِند بن شاهکی مامور
خراب اولیدی گوروم کاش کون و امکانی
.
یازولّا سِندی شقاوتده شمریدن برتر
اونون یانیندا نه حارث، نه زجر و نه ثانی
.
امامی محبسه سالدی ولی نجه محبس
قصوری وار قلمین شرح ایده او زندانی
.
نه حبس خانه دل اهل کفر تک تاریک
گونوز اولوردی او محبس چو لیل ظلمانی
.
دینمورم نجه یر، تو به تو اوزی ظلمت
مورّخین ایدر کشف بو معمّانی
.
خبرلرین بودی مفهومی محبس هارون
چو قعر چاهیدی، مرئی دگولدی پایانی
.
قوجا امام او محبسده اون بیر ایل قالدی
صباح و شام اوجالدی سپهره افغانی
.
نه بیر گَلَن، نه گیدن، نه انیس، نه مونس
انیسیدی اوزینه محنت فراوانی
.
گئجه صباحه کیمی نی کیمی سیزیلداردی
نشان ویرردی سرشکیله نوح طوفانی
.
هدایتین گونی اولدی ضعیف مثل هلال
خسوفه دست قضا سالدی ماه تابانی
.
خزانه دوندی بهاری، سارالدی گُل رنگی
پوزولدی فاطمه نین باصفا گلستانی
.
نماز صبحی قیلاردی قویاردی سجدیه باش
اولوردی ظهره کیمی وردی ذکر سبحانی
.
نماز ظهری قیلاندان صورا ایدردی سجود
زمان عصره کیمی یاد ایدردی جانانی
.
ایدردی سجده ده ناله نماز مغربه تک
قیلاردی روشن او زندانی آه سوزانی
.
عشا نمازی قیلاندان صورا امام حلیم
خدای قادره سَبحیده ایدردی طولانی
.
نماز صبحه کیمی سجده ده بلالی باشی
توکردی گوز یاشی رخساره اول بلا کانی
.
ایدردی هر گئجه گوندوزده بیر وضو تجدید
اوخوردی ناطق قرآن همیشه قرآنی
.
قویاندا سجدیه باش بیر نفر باخِیدی اگر
او قعر چاهیده گورمزدی شکل جسمانی
.
باخان گورردی او زنداندا کهنه بیر جامه
محالیدی ویره تشخیص واردی انسانی
.
گورردی منزلی خلوت، ایدردی راز و نیاز
دیردی باشه یتوردوم الهی پیمانی
.
سُوَردیم اولمیا اغیار بزم رازیمده
هزار شکر مرامیمده یوخدی نقصانی
.
غریبه یردی بو یر، بزم راز خلوتدور
بنا ایدوب منه گویا بو مَحبَسی بانی
.
قویِیدیلر قالا آسوده کاش محبسده
اذیّت ایلمیِیدی زمانه دونانی
.
آناسی فاطمه دن رخصت ایستورم بو سوزه
پوزار بو شرح مصیبت آناسی زهرانی
.
ایله امامی اَریتمیشدی بوته ی محنت
او حبس خانه ده تشریح محضیدی جانی
.
دیسم دویولماقینون اصلی وار حیا ایدورم
دیسم غلطدی ندور بس زیارت عنوانی
.
سلام اولا او شهه سِجن ده معذّبیدی
گورردی دشمن بی رحم اَلینده ایذانی
.
ایدر بو مطلبه گویا اشاره زوّاری
سالار خیاله او محبسده کی قضایانی
.
او قدر جسمینی سخمشدی حلقه ی زنجیر
دامارلاریندان آخاردی گئجه گونوز قانی
.
یارالامیشدی مبارک اَیاقلارین کُنده
دینمورم او شهه یوز ویرن بلایانی
.
بو قدر عرض ایده بُلّم سوموک لری اوغولوب
باخان گورردی اَیاقینده رنگ مرجانی
.
غریب امامی ایله حاله سالدی سِند دَنی
چَتین او حاله سالار ارمنی مسلمانی
.
دایاندی بیر یره ایش گوردی یوخ داخی چاره
امام میل ایلدی زهردار خرمانی
.
دوداقلاریندان آخوب قانی، اودلانوب جگری
دوباره دن پوزولوب حالت پریشانی
.
مسیّبی چاقوروب محضره امام غریب
بویوردی آز قالوری ترک ایدم بو دنیانی
.
گیدم بالالاریمی ایستورم وداع ایلیم
ایدم خموش وصالیله نار هجرانی
.
دیدی مسیّب اوزاقدور مدینه بغداده
بویون بلاسین آلوم ای حجاز سلطانی
.
منی مقصّر ایده للر سنی خلاص ایلسم
بو حبسخانه نین آخِر منم نگهبانی
.
امام ویردی جواب ای مسیّب اولما ظنین
اسیر ایدوب منی هارون مُرتَد و زانی
.
بقیّتُ الله کبرایم، آیتُ اللهم
ازل بیز آدمه تعلیم ایتدوخ اَسمانی
.
منیم وجودیمیله عرش و فرش قائم دور
گر ایسته سم ایدرم ماسوی اللهی فانی
.
بونی ایشیتدی مُسَیّب دیدی جُعِلتُ فِداک
سن ایسته منده خدا محکم ایتسون ایمانی
.
دگوب او پارچالانان لبلری بیری بیرینه
امام ذکر ایلدی نام حیّ یکتانی
.
دیر مسیّب آچولدی یره دوشوب زنجیر
گورنمدیم داخی اول شهریار زیبانی
.
امام طَرفَهُ العِین ایچره یثربه گَلدی
وداع قیلدی خواتین خُلد و رضوانی
.
ایدوب ودیعه لرین امّ احمده تسلیم
بویوردی ساخلا یادوندا همین وصایانی
.
او دم که ایسته دیلر بو ودایعی سندن
بُل ئولدوروبله من دلفکار و نالانی
.
بولاری ایسته سه هر کیم او حُجّتُ الله دور
مُطاعیدور مَلَک و اِنس و جِنّه فرمانی
.
امام عترتینی بیر به بیر وداع ایلدی
وصیّت ایلدی صبره بنات و نسوانی
.
اویاتمادی یوخودان خورداجا بالالارینی
بیوک لرین ولی عرشه اوجالدی افغانی
.
بُلوردولر او سفردن داخی قِییتمیه جاق
ویروبله زهر، یتوب باشه عهد و پیمانی
.
بُلنمورم نجه اهل حرمدن آیریلدی
بُلر مسافر اولان بو وداع ئوخرانی
.
آرایه آلدیلا بابُ الحوائجی بالالار
اولوبلا بیر دیلیله هر بیری نواخوانی
.
گنه سوزوم دولانور شاه کربلا باشینا
گوزیمده جلوه لَنور کربلا سلیمانی
.
یغوبدی باشینه بِلقِیس رو حرملرینی
گورر اورک گوزی اولسا او شور و غوغانی
.
خیالی وار گیده امّا اوشاقلار اَل چَکمور
گورولّه هلهله و های و هوی اعدانی
.
بیری دیور بیزی بیرده مدینیه قِیتر
اماندی قیلما نشیمن بو غملی صحرانی
.
بیری دیور بو سوسوزلوق منی هلاک ایلدی
بابا قوجاقیوه آل بیرده بو لب عطشانی
.
بیری دیور بابا گیتمه داخی سو ایستَمورم
اسیر ایده لّه سن ئولسن بنات طاهانی
.
تصوّر ایله حسینون پوزولماز احوالی
گورنده حالی پریشان رباب و لیلانی
.
گوروب حیا ایدوری اکبری ئولن لیلا
دوروب اوزاقدا دیور گور بو خانه ویرانی
.
سنقدی قلبیم عزیزیم، منیده بیر دیندیر
کنیزلر بُلوسن چوخ سُوَلّه مولانی
.
اَلیم اورکده قالوب تازه بیر جوانیم ئولوب
قویان تاپولموری قبره او ماه سیمانی
.
بونی بُلورسن اوغولسوزلارین یوزی گُلمز
جهاندا کیمدی گورن شادکام ثَکلانی (1)
.
یوخوندور اَلده علاجون گیدورسن ایمدی که گیت
ولیک قویما قالا یرده اکبرین قانی
.
اَلین فداسی اولوم ذوالفقارون آل اَلیوه
بو چولده ایله عیان سهم شاه مردانی
.
علیّ اکبریمون قاتلین ازل ئولدور
گیدنده شامه گوزوم گورمَسون او ترسانی
.
ولی اوزوم بُلورم قانلی گوز یاشیم قوروماز
اگرچه دولدوراسان قانیله بو میدانی
.
یارالی سان، اورکیم دوزموری ویروم زحمت
گیدیرسن ئولماقا بو کوی عشق قربانی
.
باشیم اوجالیقی گَل باشیوه دولانوم گیت
سنه داخی بُلورم یوخ قِییتماق امکانی
.
اشاره ایله او شه لیلینی ایدوب ساکت
بُلر مسافر اولانلار بو سرّ عظمانی
.
امام دوندی بویوردی آنام باجی زینب
گورنمَسوز داخی بیرده بو قانه غلطانی
.
حلال ایدون منی، منده سیزی حلال ایلدیم
گرک نشان ویرم عالمده عهده ایفانی
.
کسوب علاقه سین، الله بُلور نجه گیتدی
گوزیندن عارضه توکدی حمرانی
.
قلم دایاندی #حسینی، دایان اورکدن یان
دوباره شرح ایله حال امام موسانی
.
(1) ثکلا = بی فرزند
.
#کاظمیه_شهادت
#بو_رایی_ایلمیشم_اوزلیقیمدا_من_تصویب
#چهارده_معصوم_حسینی ص 256
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  ای تاجدار خلقت ،شاه ولا عم اوغلی #فاطمیه_امین_جوانمرد

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی