میلادیه حضرت علی (ع)
.
.
.
مرحوم #تائب_تبریزی
.
.
بو قاصر فکریمه بیر ماجرای دلگشا گلدی
دل غمدیدمه بو نکته دن ذوق و صفا گلدی
.
بودور فکریم یازام من حیدر کرّار میلادین
اگر یار اولسا حق گورّم که هر سوز جابجا گلدی
.
گوزل طرزیله بو شرحی یازوب استاد شاعرلر
ولیکن علّتی وار خامه مه بو ماجرا گلدی
.
بو شرحی ایستدی مندن نواخوان #شیعۀخلص
اودور مندن ظهوره بوردا بیله ادّعا گلدی
.
گرامی دور پیمبرلر تماماً محضر حقده
مقدّس بیر مکاندا بو جهانه انبیا گلدی
.
ولیکن چوخ گرامی اولدی بو عالمده بیر مولود
وجوده بیر گوزل یرده او نور کبریا گلدی
.
علیَّ المُرتضی آدی رسول اکرمه آرخا
او مولودیله دینه بیر قوای منتها گلدی
.
ولیّ اللّهیدی چون که او مولود سعادتمند
اودور بیت خداده عالمه شیر خدا گلدی
.
آناسی فاطمه تا حامله اولدی او مولوده
کنار بیت حقّه بیر گون اول کان حیا گلدی
.
اولوندی منشق امر داوریله کعبه دیواری
خانم بیته اولوب داخل حصوله مدّعا گلدی
.
مقفّل اولدی باب کعبه دیواری بوتون لَشدی
اولا خلوت او بیت، امر خدای ذوالعطا گلدی
.
اولوندی بیت خلوت جوش ایدوب دریای لطف حق
جهانه اون اوچِ ماهِ رجبده مرتضا گلدی
.
الی اوسته دوتوب بنت اسد اُول تازه مولودی
کناره بیتِ حقدن دلده مین حمد و ثنا گلدی
.
او طفلین آدین الله اوز آدیندان ایلدی مشتق
آناسینه خدای لامکاندان بو ندا گلدی
.
علی قوی آدینی بو تازه مولودین منم اعلا
ولیّیم دور منیم دنیایه کیم بو مقتدا گلدی
.
اولار اجرا بونون تیغیله حکم دینیم عالمده
بو سوزده شاد اولوب شکر حقه دلدن آنا گلدی
.
آلوب هر کس قوجاقینه آچوب گوز باخمادی اصلا
گورنلر فکرینه اول طفل اعمی بر ملا گلدی
.
آتاسین بیله غملو ماجرادن ائتدیلر حالی
که نسلوندن جهانه بیر گل اوزلی مه لقا گلدی
.
درخشاندور یوزی گون تک ولیکن گوز آچوب باخماز
ابوطالب پوزولدی درده دلدن بر ملا گلدی
.
تمام آل منافی حیرته سالدی بیله منظر
اولوب حالی همین بو ماجرادن مصطفا گلدی
.
آلوب آغوشینه تا کامینه لطفاً دلین ویردی
مشامه شیر حق گوردی شمیم آشنا گلدی
.
آچوب اؤز گوزلرین وجد تمامیله او ساعتده
سلام ائتدی کمال لطفه ختم الانبیا گلدی
.
رسول اللهدن آلدی او دم رخصت ولی الله
ایده آیات حق جاری جوابینده بلا گلدی
.
زبوری لحن داوودیله ایله ایلدی ایراد
زبورین صاحبی داوود او بزمه گوئیا گلدی
.
دوباره باشلوب انجیلی قرائت ایلدی بیر باش
غلط دوشمز دئسم روح مسیحایه صفا گلدی
.
صُحُفدن بیر قدر ائتدی تلاوت اُول لسان الله
هامی حیران قالوب وجده رسول مجتبی گلدی
.
هله پیغمبره قرآن مُنزَل اولمیوب نازل
او دمده باشلیوب قرآنی نطقه لافتی گلدی
.
قرائت ایلدی بیر نچّه آیه حجت باری
اولوب خوشحال گفتاره او دم شمسُ الضُّحا گلدی
.
بویوردی بیر کسه ممکن دگل بیر بیله نطق اصلا
فقط بیله فصاحت بیر بو مولوده سزا گلدی
.
پیمبر گوزلریندن اؤپدی رد ائتدی آناسینه
آنا آلدی قوجاقه قلبینه محکم قوا گلدی
.
.
#گریز #اصغریه_شهادت
.
علی نین اللرین قویدی قماطه فاطمه بوردا
خیاله بیر آنیله بیر بالا بیر کربلا گلدی
.
او گون که کربلاده تشنه قالدی آل پیغمبر
سوسوزدان خیمه لرده جانه آل مصطفی گلدی
.
علی اصغر ایله یاندی سوسوزدان غنچه تک سولدی
اولوب بی تاب آناسی باخدی درده بر ملا گلدی
.
گوروب دیلسیز بالانین یوخ دیلی دردین ایده اظهار
ولی آرام دوتمور رقّته اول مبتلا گلدی
.
علی اصغرین گتدی قماطه اللرین قویدی
باخوبلار بیر بیره درده آنا گلدی بالا گلدی
.
بالا اؤز لبلرین امدی دئدی رمزاً آنا یاندیم
آنا رخسارینه باخدیقجا رنگ کهربا گلدی
.
باخوب گه حسرتیله چکدی اصغر آهی آه اوستن
ربابی یاندیروب یاخدی دیله اول بینوا گلدی
.
اوؤوشدوردی اورک باشین توکوب رخساره گوز یاشین
دیدی یارب منیم تک درده هانسی بیر آنا گلدی
.
هوانین ایستیسی چوخ خیمه لرده بیر ایچیم سو یوخ
ندور چاره بالام اودلاندی جانه ای خدا گلدی
.
نه بو سینمده واردور سوت ویرم بلکه اولا آرام
دولاندیم خیمه گاهی نه اله بر جرعه ماء گلدی
.
نه دل آنلور بو دیلسیز دیل دیَم تا ایلیم ساکت
غریبه باشیمه بیر ماجرای ناروا گلدی
.
بئله ده درد اولار یارب اؤزوم تشنه بالام تشنه
آنا بالا باشینا هاردا بیله ماجرا گلدی
.
بالا تک بیر بالا نه قالدی عطشان لبلرین امدی
آنالار باشینه من تک نه درد بی دوا گلدی
.
باخور حسرتله بو دیلسیز بالام طرز نگاهیندن
دؤنؤر قانه گوگل درده بو سینم مُطلقا گلدی
.
بالام نی تک سیزیلدار من باخوب از بس نوا قیلّام
گوزیمه آغلاماقلیقدان سیاهی بیر غطا گلدی
.
دایان #تائب الون ساخلا سوزی بیله اوزاندیرما
مواظب اول آزارسان گور سوزون هاردان هارا گلدی
.
اوزون سال بابِ بابُ اللّهه وار هر حاجتون ایسته
ویرللر اولدی مستغنی بو بابه هر گدا گلدی
.
.
#حیدریه_میلادیه
#بو_قاصر_فکریمه_بیر_ماجرای_دلگشا_گلدی
#تائب_تبریزی
#ترکی
.
.
نظر دهید