حالات حضرت زینب (س)
یادی از شهدای مدافع حرم
.
✍️ زبدة الاشعار ✍️
.
🆔: @nohe_torki
.
واصف مرندی
.
بو قرا پرچمین هرعصریده دشمنلری وار
بیرینین فتنه و فنّی بیرینین خنجری وار
چوخلاری پرده دالیندا چوخونون لشگری وار
فتنه فتواسی وئریر خلقه شریحین قلمی
تا کی قرآن گینه ده اولسون عوامین علمی
.
.
بئله فکر ایلمیون ئولدی یزیدِ شامی
قویمادی ئوز یرینه مروانیلان هشّامی
دوزدی عالم گوره بولمز ائله خون آشامی
یازدی تاریخ بونی سوزلرینین اوّلینه
دین دن قالماز اثر دوشسه عوامین الینه
.
.
نجه گون جلوه سینه ابر چکنمز پرده
نجه قوش ایکّی قانادیله اوچار گویلرده
ایکی نهضت آچیلیب مکتب پیغمبرده
اوّلی کرببلا دی علمی یاتمیا جاق
دوّمی مهدویتدور کی آدی باتمیا جاق
.
.
بیر زمان کرببلا یولّارینی باغلادیلار
آلتی گوشه حرمی توز بوروموش ساخلادیلار
او قدر شیعه لری سینه ویریب آغلادیلار
قالمور الآن او جنایت آدینین آثاری
کارت ملّیله گئدیر کربُبلا زواری
.
.
گینه بو باره ده آلله ظفر ایجاد ائده جاق
مکّه نینده یولونی شیعییه آزاد ائده جاق
زینبینده حریمین گوزیاشی آباد ائده جاق
سپیله سو کیمی گوزیاشلاری عشقین یولونا
مکّه دن شیعه دوشه شهر دمشقین یولونا
.
.
بونی عالمده مسجّل ائلیوب ربّ جلیل
طول تاریخیده واردیر بونا برهان و دلیل
کیم حسینیله طرف دوشسه اولار خوار و ذلیل
عاقبت آل امیّه گوروب آلله قهری
شامی بیر یاره لی باش ایلدی زینب شهری
.
.
زینبین ایندی باخین مرد مدافعلرینه
جان وئریر ایندی حاج عبّاسیمیز عبّاس یرینه (1)
اکبری لرده فدائی یازیلیب اکبرینه
هر شهیدین اولا عالَمده حسینی صفتی
حفظ ائدر قاره علم عشقینه هر مملکتی
.
.
بیر مصیبت یازیرام ایندی خانم زینبدن
بلکه اظهار اولا هر چکدیگی غم مطلبدن
زینبین سوزلری گئتمز عَلوی مکتبدن
دئمیرم درد و مصبتده یورولموشدی خانم
مجلس شامیده ئولموشدی دیریلمشدی خانم
.
.
جان وئرن لحظه لری توأم اولوب نیسگیلیلن
او گونی اولدی مساوی چتین بیر ایلیلن
دل شکن سوزلرینی یازدی نوالی دیلیلن
یوزونی عرشه دوتوب اذن وئریب گوز یاشینا
یادینه دوشدی حسین دنیا دولاندی باشینا
.
.
گل حسین جان وئریرم داغلی اورک درده گلوب
او قدر آغلامیشام گوزلریمه پرده گلوب
افتخار ایلمیشم پاک آدین هر یرده گلوب
زینبی خاطره لر بحر غمه غرق ائله دی
هر شهیدیله سنین یاره لرین فرق ائله دی
.
.
زندگینامه مین آیا هاراسیندان دانیشیم
شهر یثربده قاپی ماجراسیندان دانیشیم
یا جِداده باشیوین داش یاراسیندان دانیشیم
عمرومون درد و بلا سایه سالیب هر گونونه
ولی غربت غمیمی ساخلادی آخر گونونه
.
.
هیچ باجی گورمه سین عالمده حسین من گوره نی
من همان زینبیدیم کربُبلا شیرزنی
اوخشادیم حرمت و احساسیله هر بیر ئوله نی
روحیم هجران غمینه یاره لیدی ناخوشدی
بیر آغیر طایفه دن ایندی کناریم بوشدی
.
.
ایستیرم غملریمه ناله و افغان اولسون
درد پنهانلاریما گوز یاشی درمان اولسون
باشیم اوسته گله سن ئولمگیم آسان اولسون
دوزدی انسانه چتین مرحله بو ساعت اولار
باجینین قارداشی اولسا ئولومی راحت اولار
.
.
ایلدی حضرت سجاده بو صحبتلر اثر
دئدی یاندیرما یانان قلبیمی عمّه بو قدر
آغاران ساچلاریوین درد و غمی شام و سحر
ایلدی واقعی تأثیر آغارتدی باشیمی
بزم خلوتده بی بی قان ائله دی گوز یاشیمی
.
(1) شهید مدافع حرم ، حاج عباس عبداللهی مرندی
.
.
#زینبیه_شهادت
#مدافعان_حرم
#بو_قرا_پرچمین_هر_عصریده_دشمنلری_وار
#واصف_مرندی
#ترکی
.
✍️ #زبدةالاشعار ✍️
.
🆔: @nohe_torki
نظر دهید