در ولادت شاهزاده اعظم علی اکبر(ع)
#گریز به شهادت
.
.
مرحوم خوندل تبریزی
.
.
بو نارسا قلمیم کثرت تولادن
خیالی وار که آچا پرده بیر معمادن
.
نه وقتدور على اکبر آدین ایدوب ازبر
غرض ولادت شهزاده دور بو انشادن
.
یازولا اون بیر شعباندا بو دل آرانون
اولوپ تولدی لیلای ماه سیمادن
.
امامه ویردیله مژده آقا بیر اوغلون اولوب
ورار آیا گونه طعنه جمال زیبادن
.
جمالی بیت امامتده جلوه گر اولدی
ایشیقلانوب او گوزل بیت بو تجلادن
.
چکویدی خامۀ نقاش قدرت ازلی
نمونه نقش جمال رسول بطحادن
.
گلوب امام آناسیندان آلوب یوزیندن اوپوب
گوروب که جدّینه بنزر رخ دل آرادن
.
کلیمه طعنه ورار منطقی کلامینده
آلار تکلّم گرمی نفس مسیحادن
.
ورار تبسمی طعنه گونه گوله آیه
دلیل قدرت اولار کردگار یکتادن
.
باخوب او جلوۀ رخساره تا او منبع فیض
على افاضۀ فیض ایلدی او مولادن
.
سوروشدی حالینی بیربیر حریم طاهانون
تفقّد ایتدی عنایتله امّ لیلادن
.
اذان اقامه بویوردی او شاه دریادل
نشان ویروب آتالیق رسمینی بو دنیادن
.
دعا ایدوب آناسیندا اوزینده سرور دین
دعا قبول اُولور اُول شهریار والادن
.
بویوردی بو بالامون قوی آدین على اکبر
که بهره مندیدی بیر اعتلای کُبرادن
.
منیم خیالیمه بیرده باشیندان اوپدی امام
همان قلج بری منظور اولوب او ایمادن
.
دوباره ببرده قویوب قلبینه دوداقلارینی
گوروندی منظرۀ کربلا او مأوادن
.
امام ایلدی عاشور نقشینی ترسیم
او صحنه منعکس اولدی او قانلی صحرادن
.
ویروب آناسینا سلطان دین او مولودی
خدایه حمد – تشکّر ایدوبدی لبلادن
.
او دستۀ گلى آلدی خانم محبتیله
باساردی باغرینا دلشادیدی او سودادن
.
باخاردی طرۀ مشکینی تل به تل داغلوب
سالوبدی پرده یوزه طرۀ مُطرادن
.
گل بهشته اولار رشک ماه رخساری
خرام قدّى ألار جلوه شاخ طوبادن
.
دیردی مه یوزیوه زلفیوی نقاب ایلمه
او ابر تک منی محروم ایدر تماشادن
.
#گریز #اکبریه_شهادت
.
دولاندی دوری سپهرین یتیشدی عاشورا
گلوبدی ظاهره بیر صحنه حشر عظمادن
.
تعارض ایلدی ایمان و کفر ظلمت و نور
فراز اولوب علم امتحان او بیدادن
.
امام لشکری بیربیر گیدوب شهید اولدی
اوجالدی عرشه فغان اهلِ بیت طاهادن
.
توکولدی تپراقا یکسر ذبیح اهل وفا
منا ایدوب او چولی قطع اولان مَنایادن
.
دیدی بابا بو سوسوزلوق منی هلاک ایلدی
علاوه اسلحۀ جنگ سالدی یارادن
.
او شاه آغزینا سالدى دلین او تشنه لبین
قرار آلوب بو عمل اول جوان زیبادن
.
دیدی علی: «بابا مندنده چوخ سوسوز سان سن
بو امر ایدوب منی شرمنده بو تقاضادن»
.
سوسوز قایتدی گنه جنگه ایلدی اقدام
توکردی تپراقا افراد بی سر و پادن
.
سوسوزلوقی یارانون چوخلوقی هوا ایستی
علاوه قانی آخاردی لطیف اعضادن
.
توانی گئتدی بدن دوشدی تاب و طاقتدن
آخوبدی قانی اثر قالمادی شکیبادن
.
یارالانوب باشی قان آخدى دولدی گوزلرینه
ایدوب او قان اونی محروم چشم بینادن
.
دوشردی حیرته دل جلوۀ جمالیندن
آخاردی قرمزی قان گیسوی سمن سادن
.
او دمده زین عقابه قویوب باشین ناچار
خم اولدی قامت او سرو بلند بالادن
.
على او حالده ناگه یتیشدی بیر ظالم
وروبدی قلبینه بیر زخم تاب فرسادن
.
امیدی قالمادی عمره حیاته دنیاده
یقین ایدوب داخی اوز مرگینی او ایذادن
.
یوزین خیامه دوتوب بیر سلام عرض ایلدی
دیدی قوتاردی آنام انتظار بیجادن
.
سو ایستیدم بابا سندن سو اولمادی ممکن
اولوب گوزومده گونوز تار لیل یلدادن
.
نیه او حالده شرمنده ایلدیم بابامی
نصیب اولمادی بیر شربه سو او دریادن
.
بابا بودی باشیم اوستونده الده سو جدّیم
سو ویردی ائتدی منی بی نیاز مینادن
.
الینده ده بابا بیر جام ساخلبوب سو سنه
اولار سقایتی رسم و ره مدارادن
.
دی بیرده ای بابا گوزله مه سون آنام یولومی
خزان آییردی گولی عندلیب شیدادن
.
آلان کیمی یارالی اوغلونون سسین شهِ دین
آپاردی طاقت و آرام دل او مولادن
.
تمام سرعتیله خیمه لردن آیریلدی
کلیم عشق گلور گو که طور سینادن
.
یتیشدی گوردی دوشوب قانلی قوملار اوسته على
آلار او بستری سبقت جهاندا دیبادن
.
پیاده اولمادی معهود عادتیله امام
سقوط لفظی مُبرهندی شرح طغرادن
.
یوزین قویوب یوزینه قلبی اولمادی آرام
نه حاله قالدی سوروشماق او حالی ثکلادن
.
جمالینی آییراندا اوغول جمالیندن
گوروبله دوشدی او شه طاقت و توانادن
.
ایدوبدی قرمزی قان آغ محاسنین الوان
آلار طراوتی هر گلده رنگ حمرادن
.
امام آناسینا هم اهل بیته هم اوزینه
تحمل ایستدی درگاه حیِّ اعلادن
.
او دم چاغوردی بنی هاشمون جوان لارینی
اجابت ایتدیله اول یادگار زهرادن
.
دیدی گلون آپارون خیمه گاهه قارداشوزی
او امن یرده بالام حفظ اولار منایادن
.
همیشه دامن مولایه چنگ ور «خوندل»
کریم کیمدی بو سلطان عرش مأوادن
.
غم ایتمه شعرون اگر نارسادی باخما حسین
محالدور آییرا نارسانی شیوادن
.
#اکبریه_میلادیه
#بو_نارسا_قلمیم_کثرت_تولادن
#ترکی
#زبدةالاشعار #اکبریه #خوندل_تبریزی
نظر دهید