شب نوزدهم رمضان ضربت خوردن حضرت علی (ع)
.
✍️ #زبدةالاشعار ✍️
.
🆔: @nohe_torki
.
مرحوم نجمی تبریزی
.
.
بو گجه محرابه بیر باشدان آخوب قان کوفه ده
آیت شق القمر اولدی نمایان کوفه ده
.
.
گورسنوب اوضاع عالمده بیوک بیر انقلاب
آز قالوب اولسون خراب آباد اولان عالم خراب
سیردن قالدی کواکب لرزه دوتدی نسه قباب
اولدی حشر اعظم موعد نمایان کوفه ده
.
.
سجده گهده ساجدین صدمه یتن دم باشینه
هولدن بیر قبضه توپراق ائتدی مرهم باشینه
توکدی توپراق عالم معناده عالم باشینه
باتدی قانه معنی ایمان و قران کوفه ده
.
.
بو گجه بیر قرقی منشقّ ایتدی شمشیر جفا
غرب و شرقی غم گرفتاری ایدوب بو ماجرا
بحر غصّه غرقی اولدی بو عملدن ماسوا
ائتدی دریای مصیبت بسکه طوفان کوفه ده
.
.
بو گجه بیر باش تاپوب محراب طاعتده شکاف
قان اخوب مرآت قلبین زنگ غمدن ائتدی صاف
دوشدی طاقتدن او کاری یاره دن شیر مصاف
سجده گاه عشقده آلقانه غلطان کوفه ده
.
.
ظلمله فُلک فلک اولدی نگون گردابده
تار عمر ماسوالله قالدی پیچ و تابده
آلدی بیر باش کاری یاره سجده ده محرابده
ائتدی محرابی او بیر باش قانی الوان کوفه ده
.
.
ظلمه باخ قانه بویاندی حجّت روی زمین
یول تاپوب خلتوگه جانانه میر مومنین
پُر اسف بیر صوتیله سسلندی جبریل امین
عترت طاها بو سسدن اولدی گریان کوفه ده
.
.
وئردی افلاکه تکان بیر تیغیله اهل ستم
دولدوروب آفاقی ظلمت موج ائدوب دریای غم
غرق اولوب قان دجله سنده شهریار محتشم
آی کیمی دوشدی خسوفه نور یزدان کوفه ده
.
.
بو سسی ناگه ائشیتدی زینب زارو فگار
ایلدی زلفین پریشان عصمت پروردگار
گوز یاشین رخسارینه یاغدیردی چون ابر بهار
ایسلادوب دامانین اشگیله او نالان کوفه ده
.
.
.
مسجده یوز قویدی سرعتله علی اوغلانلاری
هر قدم گئتدوقجا عرشه اوج ایدوب افغانلاری
خطّ سیری ایسلادوردی دیدۀ گریانلاری
گوئیا باران غمدن واری طوفان کوفه ده
.
.
مسجده وارد اولاندا گوردولر وار انقلاب
هایهائیله ایدر فریاد و ناله شیخ وشاب
بوترابه بستر محنت اولوب قانلو تراب
موج ایدر دریا کیمی محرابده قان کوفه ده
.
.
یوز حسینه دوندروب فرمایش ائتدی مجتبا
ناگراندور چوخ بابامدان زینب بختی قرا
منزله نقل اولماسا تعجیلیله گر مرتضا
اؤز اؤزین ایلر هلاک اول خانه ویران کوفه ده
.
.
الغرض شاه ولایت دودمانه نقل اولوب
باشدا بیر کاری جراحت خاندانه نقل اولوب
گوئیا بیر یاره لی قوش آشیانه نقل اولوب
رحمسیز صیّاد الیندن دلپریشان کوفه ده
.
.
گلدی زینب اللری باشینده گوزده گوز یاشی
گوردی آی تک ظلمیله منشقّ اولوب حیدر باشی
قرمزی قاندان مخضّبدور جمالی گوز قاشی
گوهر اشکین ایدوب لعل بدخشان کوفه ده
.
.
وای بابا سسلندی باشدان فوراً آچدی معجرین
خشک بند ایلوب علینون باغلادی زخم سرین
وار نه اندازه بلاسی بلمورم بیر مضطرین
اولموری بیر گون اولا شاد و خرامان کوفه ده
.
.
گه علینون باغلوری باشین توکور گوز یاشینی
گه گورور ظشتین کنارینده حسن قارداشینی
گه گورور نیزه باشندا شاه عطشان باشینی
ناقه اوسته گه گزیر قول باغلی حیران کوفه ده
.
.
هر او شخصی که اورکده وار زیارت حسرتی
یاخشی یولداشیله ائتسون آرزو وار لذّتی
نجمی ده عهد ایلوری بیر وقفه اولسون قسمتی
بانی اشعاریله اولسون نواخوان کوفه ده
.
.
.
.
#حیدریه_نجمی_تبریزی
#حیدریه_شهادت
#بو_گجه_محرابه_بیر_باشدان_آخوب_قان_کوفه_ده
#ترکی
.
✍️ #زبدةالاشعار ✍️
.
🆔: @nohe_torki
نظر دهید