کوفه
.
✍️ زبدة الاشعار ✍️
?: @nohe_torki
.
مرحوم حسینی سعدی زمان
.
بو گوزل سسونده قارداش
آتاما شباهتون وار
اوخی من دلون فداسی
نه گوزل تلاوتون وار
.
او یارالی باشه قربان
اوخوری جداده قرآن
.
.
.
بو وفاسیز اهل کوفه آتامیز علی ئولندن
ائده بولموب استفاده کلمات بوالحَسَندن
گه آلار اوصوتی مندن گهی نوک نی ده سندن
من او لهجه ایله ناطق سن او دلده صحبتون وار
.
بیزه فخریدور اسارت بیزه لطفیدور شهادت
آتادان بو باش یاراسی یازیلوب سنه وراثت
ولی مرتضی باشیندان وورولوبدی بیر جراحت
سنون ای باشی بلالی اون ایکی جراحتون وار
.
بو خراب اولان دیاره ایکی دفعه گلمیشم من
منه پیشوازه قارداش ایکی دفعه گلموسن سن
او زمان عزیز و خرّم بو زمان اسیر دشمن
او زمان آت اوسته ایندی سر نی ده رفعتون وار
.
او زمان نوازشیله منه ایلدون محبت
بو زمان یارالی باشون منه آرتورور محبت
باجووا نه خوش دلیله ائدوسن وفا و رأفت
دیه بُلَّم اوندان ایمدی منه چوخ محبتون وار
.
باجوین عزیز جانیم سسووه بو جانی قربان
بو خیالیله اوخورسان یارالی باشیله قرآن
دئمه سونله خارجی دور باشیوا بو قوم بطلان
نه گوزل دلیل قاطع نه گوزل بلاغتون وار
.
بو فصاحت و بلاغت و بو حقایقه اشارت
بو محیّر العقول ایش بو یارالی باش بو صحبت
بو ودایع رسالت بو حرایم خدارت
ائدر اهل کفره ثابت نه گوزل دیانتون وار
.
بئله لحن دل کشیله اوخوموب زبوری داود
ائله جذبه وار سسونده که بو اشقیای مردود
ائدوب ازدحام ائشیتجک هامی یولّار اولدی مسدود
ائله نغمۀ حجازی ائله خوش قرائتون وار
.
گوروسن نه شرم ائدوللر نه حیا بو بد جماعت
یوخ ائدن بیزه حمایت ائدور اشقیا شماتت
اوخوسان جداده قرآن ائدوسن اوزون حمایت
سویولان مخدّراته نه گوزل حمایتون وار
.
نه گوزلدی حقّه برهان رخ حق نما دلیندن
نه گوزلدی شرح ایمان شه اتقیا دلیندن
نه گوزلدی صوت قرآن مَثَلِ خدا دلیندن
مَثَل اولماقا سزاسن او دِیَن عبادتون وار
.
باشون ای هلال زینب یتوشن زمان کماله
یتشوب غروبه سالدون منی ظلمت ملاله
نیه کول دوتوب جمالون بو نه آیدی بو نه هاله
کیمه میهمانیدون سن نیه خَسف علامتون وار
.
دئمورم که تک تک آل شه لافتانی دیندیر
دئمورم شکسته حالم منِ بینوانی دیندیر
اَریَه یاخوندی قلبی بو کیچیک بالانی دیندیر
بئله وقتیده بولوندور اونا نه عطوفتون وار
.
نقدر سنون «حسینی» اولا مهلتون اجلدن
بو حسینه خدمت ایله دوشه قویما خامه الدن
نقدر الون بوش اولسا بو جهاندا خیر عملدن
گینه وار امید رحمت چون حسینه نسبتون وار
.
#سبک_سو_یوخومدی_قزلاروندان … بیش از 5 سبک سینه و زنجیر
.
#کوفه
#سعدی_زمان
#بو_گوزل_سسونده_قارداش_آتاما_شباهتون_وار
#چهارده_معصوم_حسینی ص 190
#ترکی
.
✍️ #زبدةالاشعار ✍️
?: @nohe_torki
نظر دهید