شهادت حضرت زهرا (س)
.
✍️ #زبدةالاشعار ✍️
.
🆔: @nohe_torki
.
حاج غلامرضا عینی فرد زنجانی
.
بیلمورم یارب ندن آی چخدی گوردی گون باتوب
فاطمه مظلوم ئولوبدی قونشولار راحت یاتوب
.
.
آیری عالمدی مدینه عزّتین الدن ویروب
آغلور انصار و مهاجر طاقتین الدن ویروب
نه حکومتدی بو خلق امنیّتین الدن ویروب
فتح خیبر ایلین مرد میادین نبرد
زیر آوار مصائبده قالوبدور چکدی درد
.
.
آز زماندا ایکی شخصیّت ویروب الدن علی
اوّلی طاها گوروب گچدی هدایت مشعلی
کوته اولدی دامن پاک رسالتدن الی
آخرین پیغمبرون هجرانی آلدی صبرینی
گوزیاشیلان پاک ایدوب گرد وغبار قبرینی
.
.
حیف اولاسندی دیردی خیمۀ حق پایه سی
باشینه دوشدی جهانین جهل و غفلت سایه سی
اوزگه دن آرتق علی نی اینجدوب همسایه سی
قویمیوبلار فاطمه راحت ایوینده آغلاسین
مجلس غم دایر ایتسون باشه قاره باغلاسین
.
.
ایکمنجی شخص علیدن ئولجاقین آلدی توان
فاطمیدی غصّه لر ایتدی رسا قدّین کمان
ساچلاری بیردن آغاردی گتدی دنیادن جوان
تاپشوروبدور غسل و کفن و دفنی گیزلنجه اولا
قویمادی مولا وصیّتدن بیری یرده قالا
.
.
نصف شب خاک بقیعده باتدی خورشید حیا
ترک ایدوبلر قبرین اوستین یدّی مردان خدا
گوردولر ایستور علی قبر اوسته بیر آز آغلیا
غملی قبرستانیدن تز اهل دل اولدی کنار
آی قالوب اولدوز قالوب گوز منظرینده قرخ مزار
.
.
سسلدی ای آسمان عشق هانی کوکبلرون
عشق ایدردی آسمانلار ذکر ایدنده لبلرون
حیف اولا قطع اولدی دنیادن نماز شبلرون
دنیوی آمالینه افسوس چاتمادی الین
نه گلین گیتدی ایویندن نه ایوه گتدون گلین
.
.
بیلمورم سندن نه گورمشدی عمر بو دهریده
گوردی من ال آچمادوم آت چاپدیلار بو شهریده
خالقون هرچند چوخدور صبری واردی قهریده
نار قهرینه خداوندین اولار بیر گون دچار
او گونیکه قارداشیندان قارداشی ایلر فرار
.
.
عم قیزی دریای صبریم آخ نه نوعی داشماسین
قبروین داش تپراقی منلن نجه آغلاشماسین
غصّه سرحدّین عم اوغلون صبر ایدوبدور آشماسین
خار اولوب ثانی مزارینده گمان یوخ گل آچا
شیعه لرحسرت قالا تاپماز مزارین گل ساچا
.
.
گلموشم غسلین ویرن وقتنده داد و شیونه
گورموشم قمچی ویروبلار ای گل تقوا سنه
درد و اندوهین گران گلدی دیدیم ایوای منه
کاش بو سرّی بیلیدیم اود ویراردیم عالمه
دشمنون قمچی وراندا ئولدورردیم فاطمه
.
.
بیلمگه بو ماجرانی اولمیوب الله رضا
اولمیوبسان گوئیا سن راضی اولسون برملا
ایندی که بیلدیم یوخوم شاهد گل اهل کسا
ضاربون یوخسا چکردوم دادگاهه فاطمه
تازیانه وردوراردوم دادگهده حاکمه
.
.
کیم دییر مشگل گشا مشگلده قالماز قالمیشام
ویرموشم الدن سنی رنج و مصیبت آلموشام
دویمارام سندن اوزومی قبرون اوسته سالموشام
آغلامور تنها علی سنتک وفالی همسره
آغلورام سندن صورا رنج و بلالی گونلره
.
.
#فاطمیه_عینی_فرد
#فاطمیه_شهادت
#بیلمورم_یارب_ندن_آی_چخدی_گوردی_گون_باتوب
#ترکی
.
✍️ #زبدةالاشعار ✍️
.
🆔: @nohe_torki
نظر دهید