زبانحال حضرت رباب (س) به علی اصغر(ع)
.
✍️ #زبدةالاشعار ✍️
.
🆔: @nohe_torki
.
#سبک_علی_جان_بالا_لبیک
مشابه
.
مرحوم تائب تبریزی
.
بیچن حلقینی پیکان
یارالی بالام ای وای
ایچن سو یرینه قان
یارالی بالام ای وای
یارالی بالام ای وای
بلالی بالام ای وای
.
.
بیچوب تشنه بوغازون سولی ناوک پیکان
ائدوب قرمیزی قانون سوسوز لبلرون الوان
آنان اولسون او قانه باتان لبلره قربان
ائدن باغریمی آلقان ، ملالی بالام ای وای
.
.
یانوردون سوسوزوندان سن ای غنچۀ نازیم
ئولوردون شه الینده اولان وقتیده عازم
سوسوز حلقیوه ویرماق سولی تیر نه لازم
بو ظلم اولمیوب عالم اولالی بالام ای وای
.
.
باخاندا سنه قلبیم یانار نسکلیم آرتار
اُپوبدور بوغازوندان ایله تیر جفا کار
آنان اُپماقا قالموب بوغازوندا بیر آثار
یارالی بالام ای وای ، بلالی بالام ای وای
.
.
علی اوچ گیجه گوندوز صودوم اولمادی یاندون
سوسوزدان ایله یاندون داخی جانه دایاندون
ال اوسته گیدوب آخر سوسوز قانه بویاندون
ئولن دلده سو فکر و خیالی بالام ای وای
.
.
او غنچیدون علی جان منیم گول بوداقیمدا
یاتاردون بوداقیمدا دوداقون دوداقیمدا
قالوبدور بالا ایندی یرون بوش قوجاقیمدا
دوشن ئوز آناسیندان آرالی بالام ای وای
.
.
دیردیم علی اصغر آز آغلا منی داغلا
ولی طالبَم ایندی دور آغلا بالام آغلا
آنان گوز یاشینی گور ، یوزه گوز یاشی باغلا
ائدن آغلار آناسین عزالی بالام ای وای
.
.
سنون تک علی بیر گول گلستان ده سولماز
قیزل قانیله صاحب گلین دامنی دولماز
منیم تک تهِ دلدن یانان بلبلی اولماز
قالان بلبلی شور و نوالی بالام ای وای
.
.
بالاسی ئولن آهو نئجه کیم مَلَر آغلار
یوزه گوز یاشی گوزدن سیزیلدار اَلَر آغلار
آنان ایله سیزیلدار نوایه گَلَر آغلار
اولان چینِ شریعت غَزالی بالام ای وای
.
.
سنون تک بوغازوندان علی اوخلانان اولماز
یانار حالیوه چوخلار منیم تک یانان اولماز
هامی گوز سنه آغلار وی ئوز آنان اولماز
ئولونجه اولاجاقدور مقالی بالام ای وای
.
.
گیدنده گُل نازیم پریشانیدی حالون
سارالموشدی سوسوزدان گوزل عارض آلون
گلنده تاپوپ امّا صفا رنگ جمالون
اولان قانیله گلگون جمالی بالام ای وای
.
.
اویان گور نئجه تیرِ بلایه سِپَرم من
باشون اوسته گوزومدن یوزه سو سَپَرَم من
حیا اولماسا مانع یوزوندن اوپرم من
بی بوندن اوتانور بو حیالی بالام ای وای
.
.
علی باشدان ایاقه قیزیل قانه باتوبسان
سالوب قرمیزی اَنّوک هامی کامه چاتوبسان
یتوب عین مرامه آنان گوزدن آتوبسان
آتان گوزدن آناسین بلالی بالام ای وای
.
.
دیردیم اولی بیر گون علی سن دیل آچارسان
او غنچه دوداقیله گولرسن گُل آچارسان
دوتوب بلکه ایاق بیر قباقیمده قاچارسان
ایاق دوتماقا حسرت یارالی بالام ای وای
.
.
سراغ ائتدون علی جان ئوزون بزم وصالی
گئیوب قیرمیزی گیتدون همین بزمه یارالی
آنان قالدی ئولونجه گونی باشی قرالی
آناسی گونی باشی قرالی بالام ای وای
.
.
صودوم اولمادی آجلیق توان قویمادی سنده
دئدیم صودامریم یات گمان یوخ صوده منده
بو قلبیم یاناجاقدور اوشاقلار صود اَمنده
سالان سینمه آتش او حالی بالام ای وای
.
.
عجب نوحه ده ((تائب)) گوزل شرح و بیان وار
الون ساخلا اگر چه سوزونده جریان وار
دئ شاه بیتی دوباره که بو جمله ده جان وار
بیچن حلقینی پیکان ، یارالی بالام ای وای
.
#اصغریه_شهادت
#بیچن_حلقینی_پیکان_یارالی_بالام_ای_وای
#ترکی
.
✍️ #زبدةالاشعار ✍️
.
🆔: @nohe_torki
نظر دهید