زبانحال رقیه خاتون خطاب بجناب زینب در خرابه
.
.
.
#سبک_ای_باد_صبا …
.
.
مرحوم عاصی تبریزی
.
بی جا دگول اشگیله دولوب گوزلریم عمّه
آخر ئولورم هاردادی بس اکبریم عمّه
.
.
بیر عمریدی زلفوم کیمی آشفته دی حالیم
بیر کیمسنه بولمور ندور اندوه و ملالیم
وار بو سر شوریده ده مین فکر و خیالم
سرّی اودی قوینومدا قالوب اللریم عمّه
.
.
عمّه بولوسن بو صِغر سینّمیله من
صبر ائیلدیم هر قدر جفا ائیلدی دشمن
ویرانه او گوندن که اولوبدور منه مسکن
گوزدن یوزه دائم آخار اشگ تریم عمّه
.
.
چکدیم بو آز عمرومده ز بس رنج و مشقّت
دوندردی هلاله قدیمی بار مصیبت
آخر گتوروب جانه منى طعن و شماتت
یاندی منیم احوالیمه دشمنلریم عمّه
.
.
هر رنگ غمه من خُم مِحنده بویاندیم
جسمیم دوتوب اود آتش درد و غمه یاندیم
بو فکریله هر قدر بلا گلدی دایاندیم
ئولسم من اگر قبره قویار اکبریم عمّه
.
.
ویرانه ده حسرتله من ایندی وئرورم جان
گوز تیکموشم آخر یولونا واله و حیران
گلمور نیه جانیم، او گلن یولارا قربان
بو حالیمی بولمور او ملک منظریم عمّه
.
.
بولسم گلوری عمّه سورونّم یوزوم اوسته
یر وئرّم علی اکبریمه من گوزوم اوسته
ثابت قدمم سن که بولورسن سوزوم اوسته
جان بذل ائدرم مقدمینه یاوریم عمّه
.
.
وار سرّی دونوب اشگیله ای عمّه بو گوزلر
بو آخر عمرومده گوزوم اکبری گوزلر
قارداش باجیسین عمّه بو رقته بئله گوزلر
سالمور منی بیر یاده او مه پیکریم عمّه
.
.
بیر بلبلم آیریلموشام حسرتله گُلومدن
ظلمیله فلک عزّتیمی آلدى الیمدن
دوشمز علی اکبر آدی بیر لحظه دلیمدن
دلده آدی هر لحظه اولوب ازبریم عمّه
.
.
دور عمّه اماندور منِ زاره ائله چاره
گل جان وئرورم جسمیمی قوی بیرجه مزاره
اوزگه کفن آخردگی لازم منِ زاره
بسدور کفن آخر منه اوز معجریم عمّه
.
.
عاصی که سالوبدور باشنا شوق زیارت
هر بیر دیلیله یالواروری اولموری قسمت
من ایسترم حقدن اونی تا قویمیا حسرت
ایلوبدی منی واسطه اول نوکریم عمّه
.
.
.
.
#حضرت_رقیه #عاصی_تبریزی
#حضرت_رقیه_شهادت
#بی_جا_دگول_اشگیله_دولوب_گوزلریم_عمه
#ترکی
#زبدةالاشعار
نظر دهید