«ئولمیوب حسین ئولمز»
.
✍️ زبدة الاشعار ✍️
.
🆔: @nohe_torki
.
.
محمدعلی مصیبی تبریزی
.
.
#سبک_ساقیا_بده_جامی
.
.
تا جوشور ئورکدن غم ئولمیوب حسین ئولمز
تا اسور قرا پرچم ئولمیوب حسین ئولمز
.
((ئولمیوب – ئولمیوب
ئولمیوب حسین ئولمز))
.
.
تا بو قاره کوینکلر زینت تن و جاندی
تا حسین زهرانون عشقی دلده طوفاندی
تا کی گلمیوب مهدی سینه لر قزل قاندی
تا قیامت اعظم ئولمیوب حسین ئولمز
.
.
گون سپهر اخضردن قلب عالمی سیخدی
کربلاده بیر گون وار نوک نیزیه چیخدی
هم بیان ائدوب عشقین هم یزید ائوین ییخدی
تابش ایلیور توأم ئولمیوب حسین ئولمز
.
.
وئر خبر؛ مریض عشق قالسون اعتقادینده
بیر مطب آچوب مولا کربلا بلادینده
کیم خلوصیلن تاپسا استعانت آدینده
درده یوللیَر مرهم ئولمیوب حسین ئولمز
.
.
عالمه قرا چکدیم بیر قرانین عشقینده
دوشدوم عاقبت درده بیر دوانین عشقینده
یاندی روز وشب قلبیم کربلانین عشقینده
لوح اولوب غمه سینم ئولمیوب حسین ئولمز
.
.
ای سپهر اخضرده آفتاب تابنده
وار مرادی هر قلبین دل وئرر او دلبنده
شیعه نین گوزی امّا واردی یاحسین سنده
درگهوندن ایستور دم ئولمیوب حسین ئولمز
.
.
مقصد و مرامیندن عارفم شه خوبان
تشنه کسدیلر باشون قانه اولموسان غلطان
عاقبت سو یانینده سو یرینه ایچدون قان
جوشسا جوشماسا علقم ئولمیوب حسین ئولمز
.
.
سبط ِ خاتم مرسل ! سرّ و مظهر لولا
ای مقام ایثاری هر مقامیدن اولا
قان ایچینده آچدون سن جانمازیوی مولا
آغلیار دیئر خاتم ئولمیوب حسین ئولمز
.
.
کربلاده سلطان یکّه تازه عشق اولسون
قانیلن آلینمیش بیر دستمازه عشق اولسون
قان ایچینده تنویر جانمازه عشق اولسون
سسلر عالم و آدم ئولمیوب حسین ئولمز
.
.
جان کَنیش لیقیندا گل باشیم اوستونه بیردم
توپراقا گئدن دمده اول « مصیّبه » همدم
قبریده سوال اولسا کیمدی عشقیوه مَحرم
عالمی دوتار نالم ئولمیوب حسین ئولمز
.
.
#ورود_محرم
#حسینیه_مدح
#ترکی
#تا_جوشور_ئورکدن_غم_ئولمیوب_حسین_ئولمز
.
✍️ #زبدةالاشعار ✍️
.
🆔: @nohe_torki
نظر دهید