زبدةالاشعار

ترقّی عالمینده کربلا شاهی قدم ووردی #حسینیه_سعدی_زمان

سَیاسَةُ الحُسَینیَّةِ
.
.
.
مرحوم حسینی سعدی زمان
.
ترقّی عالمینده کربلا شاهی قدم ووردی
یزیدین صفحۀ تاریخینه نقش عدم ووردی
.
.
یگانه منجی اسلام افکاری ایده تبدیل
قوروب کرب و بلاده بیر مقدّس فکریله تشکیل
او تشکیل آل سفیانین ایدوب کابینه سین تعطیل
اوز استقلالینه شمشیریله خونین قلم ووردی
.
.
حقیقت مسلکین تطبیق ایدن راه مجازیله
تاپوب روح تدیّن عزّتین شاه حجازیله
فداکار شریعت دست خطّ امتیازیله
دیریلدوب اوز آدین هر مملکتده بیر علم ووردی
.
.
حسین بن علی گوردی نظام دین اولور درهم
تمرّددن یتن زخمه بلوب لازمدی بیر مرهم
مبادا جدّینون قانونینی اشرار ایده برهم
او گون بیر خیمه ی اجرا شه گردون خیم ووردی
.
.
امورات سیاستده ویره تشکیلینه رونق
ابوالفضله دیدی وور شهر بند عشقیده بیرق
سلاطینه جراید نشر اولونسون کیم ئولوب ناحق
نه اوستونده ئولوب، کیم حقّه حرف کیف و کم ووردی
.
.
ایله فکر سیاسی ایشلدوب سلطان مظلومان
که ذکری مادّه ی تاریخدور تا دور ایدر دوران
فنون جنگی ویرسون هر سیاسی لشکره اعلان
ازل میدان رزم کربلاده بیر قدم ووردی
.
.
ویروب فرمان نظامیسی یغشدی باشینه بیر باش
ابوالفضله بویوردی گل امیر لشکریم قارداش
علم وور قلب لشکرده ضمیریم سرّینی قیل فاش
آچوبدور پرچم نصرت علم اول محتشم ووردی
.
.
قیلوب سلطان مظلومان سپاهین جراته ترغیب
صف آرالیقدا ویردی میمنه هم میسره ترتیب
ایکی لشکر آلوب فرمان جنگی رای اولوب تصویب
ازل سعد اوغلی تیریله او فرمانه رقم ووردی
.
.
جوانلار نامینه موضوع اولوب قانون حرّیّت
عمومی بیر وظیفه بلدی سربازان حیثیّت
هر آزاده جوان باش ویرماقندا قیلدی جدّیّت
ولیکن تیر غم دلدن خواتین حرم ووردی
.
.
اولوب بیر جنگ مغلوبه، ویروب بیر فوج عطشان سر
قالانلاردا ئولوب تک تک، قالوب عبّاس نام آور
او صاحب منصب اردوی شاهنشاه بی لشکر
گیدوب سردوشه پاقون نشان سرخ دم ووردی
.
.
علم یاتدی، علمدار ئولدی، سندی لشکر اسلام
امام اوسته هجوم آور اولوب کفّار بدفرجام
الینده ذوالفقارین قبضه سی شاه ملک خدّام
ایدوب حمله صفوف دشمن دینی به هم ووردی
.
.
ووراردی لشکره شمشیر قهرآمیز او بی غم خوار
دیردی دم به دم تکبیر پور حیدر کرّار
یورولدی بس که دعوا ایتدی سبط احمد مختار
یره اوز نیزه سین اول شهریار غم حشم ووردی
.
.
وجود نازنینی قید کثرتدن تاپوب وحدت
دوروب حق مرکزینده آیه ی توحیده بیر آیت
ضلالت لشکریندن بیر نفر چوخ ایلیوب جرات
شه دین سجده گاهیندن او بیر سنگ ستم ووردی
.
.
آخوب قان وجه وجه اللهی دوتدی، دولدی عین الله
یغوب دامانینی سیلسون او قانی عین حقدن شاه
نمایان اولدی قلب قلب عالم گون کیمی ناگاه
مکان لامکانه حرمله بیر تیر اودم ووردی
.
.
او اوخ اوچ شعبه لیدی بیر وظیفه ایلدی ایفا
او شاهین سینه ینده آچدی باب مجلس شورا
همان شورای عالی کشف ایدوب معنای عاشورا
یخلماق رایی تصویب اولدی شه کلک رقم ووردی
.
.
منافقلر قیلوب شورا، قتاله تازه رای آلدی
ایدوب خطّی سنان اجرای آرا توپراقا سالدی
یارالی جبهه سین قویدی ترابه، ضعفیده قالدی
نه حسّ اولدی او دمده نه دم لا و نعم ووردی
.
.
گلنده هوشه عرض ایتدی که ای دانای مکتومات
بو حاله شاهد اول، انجام تاپدی جمله مرقومات
نشان ویردیم بو صحراده واریمدور هر نه معلومات
گورن تصدیق مهری خطّیم اوسته لاجرم ووردی
.
.
هامی بیر ذلّته دوزدوم من ای یار وفاداریم
عزیز نشاتین اولسون عزاداریله زوّاریم
یتور سنده اوز عهدون باشه معلوم اولسون اسراریم
بغیشله سینیه هر کیم بو غمده دست غم ووردی
.
.
نهانی سرّینی ابراز ایدردی حیّ یکتایه
یتردی ناله سی چرخ چهارمده مسیحایه
او دم وقّاص زاده ویردی فرمان قوم اعدایه
او حاله باخدی باشه زینب مریم شیم ووردی
.
.
عشایر انقلاب ایتدی قورولدی عکس تشکیلات
گلوب مستنطق رحلت آلا جان اوسته توضیحات
ویروب اعدام حکمی، ایلدی سرنیزه تحقیقات
صمد گویان جدایه باشینی اهل صنم ووردی
.
.
« #حسینی» ساخلا بو یرده سوزون، آغلاتما زهرانی
مگر سن بلموسن؟ زهرا غمی یاندوردی دنیانی
نه ایسترسن دی ویرسون، ناامید ایتمز حسین جانی
بیرینون سینه سیندن هاردا ارباب کرم ووردی؟
.
#حسینیه_شهادت #ورود_کربلا_عاشورا #قتلگاه
#ترقی_عالمینده_کربلا_شاهی_قدم_ووردی
#چهارده_معصوم_حسینی صفحه 121
#ترکی
.
.

متن پیشنهادی:  زینب ای بی دل بشکسته پر مضطر من #وداع_موسی_دبستانی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی