زبانحال حضرت زینب سلام الله علیها در حال احتضار
.
.
.
#سبک_ای_حرمینه_ناز_ائدن … 3 سبک … عطری گلور محرمون … واردی باشیمدا یا حسین …
.
.
مرحوم انور
.
.
ترک ائدور آز قالور حسین تیره جهانی زینبون
گوزلری آختارور سنی فاطمه جانی زینبون
.
.
الّی بئش ائیلدی سایه لطفوه دالدالانمیشام
عشقیوه دستگیر اولوب شهرلری دولانمیشام
شمع یانوب خموش اولار منکه همیشه یانموشام
اللی بئش ائیلده سونمیوب سوز نهانی زینبون
.
.
آزقالوری یومولماقا اشک تری آخان گوزوم
میلۀ غصّه سُرمه سین کیپریگینه یاخان گوزوم
قتلگهونده نعشیوه حسرتیله باخان گوزوم
منتظروندی دیدۀ اشک فشانی زینبون
.
.
شامه اوزاقدی کربلا چوخدی اگر چه فاصله
سن آقاسان اوزاق یولون زحمتینی قبول ائله
بیر یول ایشیم دوشوب سنه گلمسن ایلرم گله
غملی باشین دیز اوستونه یوخدی آلانی زینبون
.
.
هر باجی جان وئرن زمان من کیمی اولسا دربدر
صاق وصولا باخار گوزی قارداشین آرزو ائدر
قارداشی دفنه گلمسه قبرینه ناگران گئدر
گل نگران گئدور بو گون روح روانی زینبون
.
.
یاسین اوخوردون هر شب جمعه آنام بتوله سن
فکره گئدوردوم عالم عشقیده فوق العاده من
کاش دیردوم ای حق قادر و حیّ ذوالمنن
زینب ئوله حسین اولا فاتحه خوانی زینبون
.
.
من دئدوم عمرومون گلی عزّتیلن سولار حسین
تربتیوی ئوپر باجون جام صفا دولار حسین
غصّه لی روحی غصّه دن اوردا خلاص اولار حسین
گورمدی جان وئرن زمان کرب و بلانی زینبون
.
.
یتمه دی بهری زینبه قارداش او خاک اقدسین
درک ایلیم مزاریده اصغرین آغلاماق سسین
خاطرین ایستین قزون ساخلادی یورقون عمه سین
قونشی اولار رقییه خوشدی مکانی زینبون
.
.
یدّی وفالی قارداشین خواهر مهربانیم
کرب وبلا ددیارینون غصه لی مهربانیم
شمره اسیر اولانلارون حافظ و پشتبانیم
ایندی اجل گلوب حسین یوخدی توانی زینبون
.
.
سنسیز حسین یاتاندا من هر گجه غمله یاتمشام
غصه لرون دوشوب یادا ئوز ئوزومی اویاتمشام
قدّیمی غملرون بوکوب پرچمووی اوجاتمشام
آدون اولوبدی دم بدم ورد زبانی زینبون
.
.
یاخشی دگل گتورسه کیم ائتدیگی خدمتین دیله
خدمت ائده وظیفه دور شوقیله باغبان گُله
گُللرووه ئوزون کیمی یِتشمدیم گذشت ائله
عذره یول آختارور دئدی بو جریانی زینبون
.
.
سوز غمونده قلبیدن عود کیمی آلیشمیشام
هاردا دئیوبله آدیوه خارجی من دانیشمیشام
هاردا سالوبلا مشکله عترتیوی چالیشمیشام
عزّتیله دولاندیریب آل عبانی زینبون
.
.
رخت اسارتی گیوب پاک و خجسته ساخلادیم
دوره می آلدی بیر بُولوک قلبی شکسته ساخلادیم
ساخلا دئدون رقیه می سینمون اوسته ساخلادیم
پرورشنده غفلتی اولمادی آنی زینبون
.
.
رنگی سارالدی گون بگون بیلدیم او قز خطرده دور
هی سنی مندن ایستدی منده دئدوم سفرده دور
یومدی گوزون خرابه ده داغی یانان جگرده دور
حیف او بالا ئولن زمان چخمادی جانی زینبون
.
.
باشیوی آلدی سینه سی اوستونه دقت ایلدی
دوردی چکیلدی گوشیه ، مجلسی خلوت ایلدی
سنله خصوصی بیر نچه ثانیه صحبت ایلدی
باشیوه اوخشاما دئدی قینه دی قانی زینبون
.
.
نُطقی کسیلدی غفلتاً درک ائده بیلمدوم سوزون
فکر ایلدیم یاتوب بالون گُل یوزووه قویوب یوزون
گوردوم او طفل نازنین یومموش همیشه لیک گوزون
وای دئدی داده سسلدی زین العبانی زینبون
.
.
میّتی جابجا ائدم یاخشی اطاقیم اولمادی
باشینون اوسته یاندیرام شمع و چراغیم اولمادی
یاخشی حسین خرابه ده ئوزگه قوناقیم اولمادی
ایلدی رو بقبله اول خردا بالانی زینبون
.
.
گوردوم اونون قرا تلی گُل یوزون ایلیوب نهان
دوزمدی قلبیم ایلدوم طره لرون اویان بویان
گوزلرینی ئوپوب دئدوم آچ گوزوی رقیه جان
گلمدی نطقه بلبل باغ خزانی زینبون
.
.
.
.
.
#زینبیه_شهادت
#انور_اردبیلی
#ترک_ائدور_آز_قالور_حسین_تیره_جهانی_زینبون
#قیام_زینب_انور
#ترکی
#زبدةالاشعار
نظر دهید