#معراجیه و مدح حضرت علی (ع)
#گریز به #اصغریه_شهادت
.
✍️ زبدة الاشعار ✍️
.
🆔: @nohe_torki
.
مرحوم #سعدی_زمان
.
تمام عالمه مشکل گشا علی الی دور
رواج دینه ویرن مرتضی علی الی دور
.
اولوب خلایقه واجب طواف بیت خدا
چون اوردا ظاهر اولوب نور آیت کبری
.
اولاندا حامله مریم مسیحه بیته گلوب(1)
مسیحی خلق ایدن اولموب ولی بو امره رضا
.
یتیشدی مریمه سس فاخرُجی مِنَ المَعبَد
دگول ولایت عیسایه بو مقام سزا
.
گرکدی وضع ایده سن نینواده عیسانی
حسینیمه بولونه خانه زاددور عیسی
.
گلنده بیت خدایه ولیک بنت اسد
جدار کعبه نی منشقّ ایدوب حق یکتا
.
اولوبدی فاطمه داخل بوتونلنوب دیوار
قاپی مُقفّل اولوب خلوت اولدی اول مأوا
.
گلوب رجب آینون اون اوچونده دنیایه
ازلده آدمه مصداق عَلَّمَ الاسماء
.
قالوبدی فاطمه اوچ گون او پاک مأواده
بهشت میوه سی گوندردی ربّ ارض و سماء
.
ایشیقلی گون کیمی دوردومجی گون اولوب طالع
سپهر معرفته آفتاب چرخ آرا
.
چخوبدی فاطمه خوشحال بیت داوردن
آلوب علینی الی اوسته دلده حمد و ثناء
.
علی آناسنا سَس گلدی حیّ اعلادن
ولیّمون آدینی قوی علی منم اَعلا
.
بونون آدین اوز آدیمدان من ایلدیم مشتق
بودور اوامریمی خلقه ایلین اجرا
.
هامی اموریمی من ایتمیشم اونا تفویض(2)
اونی من ایلمیشم علم غیبمه دارا
.
خوشا او کسلره که بو علینی دوست دوتار
بدا او کسلره بو پیشوایه منکر اولا
.
آلوب قوجاقینه اوز اوغلونی ابیطالب
گتوردی ابطحه پروردگارین ایتدی ندا
.
یا رَبِّ یا ذَالغَسَقِ الدُّ جِیِ
وَالقَمَرِ المُبتَلِجِ المُضِیِّ
.
بَیِّن لَنا مِن حُکمِکَ المَقضِیِّ
ما ذا تَری فی اِسمِ ذاالصَّبِیّ
.
همینکه بو سوزی عرض ایلدی ابو طالب
عنایت اوسته گلوب کردگار بی همتا
.
بولود کیمی یره بر لوح گویدن ایتدی نزول
او لوح سبزیدی مثل زَبَرجد خَضرا
.
.
او لوحی دوتدی گتوردی ایوه ابو طالب
گونوز باخاندا گوروب نقش اولوب بو سوزلر اونا
.
خُصِّصتُما بِألوَلَدِاّلَزَّکِیِّ
وَألطّاهِرِ المُنتَجَبِ الرَّضِیِّ
.
فَاِسمُهُ مِن شامِخ عَلِیّ
عَلِیٌّ اشتقَّ مِنَ العَلِیِّ
.
آلوب قوجاقینه هر کیم او پاک مولودی
گوزون آچوب یوزینه باخمادی ولّی خدا
.
مخاطب ایتدی ابو طالبی بنی هاشم
که حق سنه بر اوغول لطف ایدوب گوزی اغمی
.
دوشوب تحیّره حیرتده قالدی آل مناف
اولوب بو مطلبه مسبوق حضرت طاها
.
گلوب عم اوغلوسینی آلدی جان تک آغوشه
مبارک آغزینا وردی دلین شه بطحا
.
تبسّم ایلدی آچدی گوزینی عین الله
ازل رسول کرامه سلام ایتدی ادا
.
خلوص قلبیله اقرار ایتدی توحیده(3)
آچاندا نفیه دل اثبات ایلدی اِلّا
.
شهادت ایلدی پیغمبرون رسالتینه
ره دیانتی گوستردی رهبر عظمی
.
صورا دیدی که اولار رستگار مؤمنلر
اولار که مؤمن اولا حقّه ایلیه تقوی
.
بیوردی ختم رسل سن امیری سن اولارین
تمام مؤمنه سنسن دلیل و راهنما
.
ایدوب صلوة ده خاشع اولانلاری تعریف
سکوت ایدوب گنه گلدی کلامه شمس ضحی
.
کمال وجدیله عرض ایتدی یا رسول الله
اجازه وار اوخویوم مصطفی بیوردی بلی
.
آچوبدی نطق گهربارینی لسان الله
تلاوت ایلدی توراتی جمله سر تا پا
.
دوباره باشلیوب انجیلی سربسر اوخودی
معاینه ایدوب انجیل صاحبین احیا
.
شروع ایدوب اوخودی برده آدمین صُحُفین
زبوری باشلادی داوود اوزی اوخور گویا
.
هله پیمبره بر آیه گلمیوب قرآن
تلاوت ایلدی قرآنی میر ملک هدا
.
باخوب تبسّم ایدوب عقل کلّ ختم رُسُل
بیوردی اوزگیه ممکن دگول بو نطق اصلا
.
اوپوبدی گوزلرینی قیتروبدی فاطمیه
قُماطه ایلدی پیچیده اوز بالاسین آنا
.
قویوبدی زیر قماطه الین چکوب قیردی
مجسّم اولدی گوزیمده دیار کرب وبلا
.
ربابده بر علی اللّرین قُماطه قویوب
خراش ایدردی آنا سینه سین او تشنه بالا
.
آنانین امجگینی سوزش عطش قورودوب
بالا ایدردی شرار عطشدن آه و نوا
.
آتاسی آلدی گتوردی او طفلی میدانه
حزین سسیله خطاب ایتدی کی گروه دغا
.
گلون آلون آپارون ایلیون بونی سیراب
پیمبر عترینه ایتمیون بو قدر جفا
.
آنام بتولدن ارثیه دور بیزه بو فرات
بالام اُله سوسوزوندان اولور گورون بو روا؟
.
امام دل دیدی از بس که دللّری آلدی
باخوب او حاله چکوب ناله لشگر اعدا
.
چاغوردی محضرینه ابن سعد حرمله نی
دیدی یاخوندی دونوک لیق ایده بو اهل دغا
.
حسینی ساکت ایله قویما چوخ تکلّم ایده
علوم رَمی ده یوخدور سنون کیمی دارا(4)
.
الین قویوب گوزی اوسته دیزین یره وردی
نه حقّدن نه پیمبردن ایتدی شرم و حیا
.
سو ویردی اصغره بیر تیر زهر داریله
بهشت عدنده باش آچدی حضرت زهرا
.
ازلکه حالی علی اصغرین تاپوب تغییر
دیمم نه حاله ولی قالدی سیّد الشهدا
.
بو یرده ذکر مصیبت دگول منیم نظریم
علی آدیله ازل باشلانوبدی بو طغری
.
(1)منظور بیت المقدس است
(2)منتهی الآمال –ص 104
(3)مظاهر الانوار – ص 84
(4)رَمی = تیر انداختن
.
.
#حیدریه_مدح #پیامبراسلام_مدح
#معراجیه
#تمام_عالمه_مشکل_گشا_علی_الی_دور
#چهارده_معصوم_حسینی ص29
#ترکی
.
✍️ #زبدةالاشعار ✍️
.
🆔: @nohe_torki
