زبانحال حضرت ابوالفضل العباس (ع) به امام حسین (ع)
.
.
.
حاج علیرضا امانی اردبیلی
.
توکمه گوز یاشووی ای سیّدِ محشر قارداش
شاهی زیبنده دگول آغلادا نوکر قارداش
.
خاک پایونّن اوپن باش دیزون اوستونده قالوب
باشما اولدی مقام عرشه ی منبر قارداش
.
منی مأمور اِئله میشدون یتیرم قیزلارا سو
اِئتدی شرمنده حَرَمنن ولی لشگر قارداش
.
هر چتینیکله فرات اوسته یئتیردیم ئوزومی
سو آخوردی چوله تشنیدی حرملر قارداش
.
اوچ گونوز اوچ گجه لب تشنه ، یانوردی جگریم
تشنه لب تاپسا سویی دشتیده نینیر قارداش؟
.
بوشلادوم مرکبی علقمده دویونجان سو ایچه
چون عقابه یوخود ی حُکمِ مقرّر قارداش
.
سن دئدیم ایچ بو سودان مشگی آپارخیمه لره
با وفا مرکب اِئدوب گور نجه محشر قارداش
.
باخدی باخدی سوآ دوندردی یوزون ایچمَدی سو
گوزلرین گوز یاشی گوردوم اِئلیور تر قارداش
.
اوندا بیلدیم کی عقابیم اوتانور اصغردن
ئوزونه بیلمه دی بو امری میَسَّر قارداش
.
ایسته دیم مرکبی سو ایچمه گه وادار ائلییَم
چون بیلوردوم حرمون مشگیمی گوزلر قارداش
.
سویی اوجومدا نشان وِئردیم عقابیم گورسون
اِئدورم یعنی قوری دیل دوداقی تر قارداش
.
ولی ای کاش او سویی اوجومادا آلمیدوم
بو خطا قلبیمه اود وُردی مکرّر قارداش
.
الیم ایستانماغی ئوز غیرتیمی یاره لَدی
بند بندِ بدنیم اسدی سراسر قارداش
.
اللریم تیتردی اوجومدا گوزوم دوشدی سوآ
داشا دونموش سودا گورسندی بو منظر قارداش
.
گوردوم آغوشه آلوب اصغری بیچاره رباب
چوبالوردی قانادی باغلی کبوتر قارداش
.
من ئوزوم گوردوم او شش ماهه دیور یاندم عمو
هاردا گور آچدی دیلین سود امر اصغر قارداش
.
بّله احساس اِئله دیم پرده ده بیر سس گلدی
لحنیدن گوردوم آتام حیدره بَنذَر قارداش
.
دِئدی نهراوسته یوبانما بالامون فکرینه قال
باشیما اِئتدی بو سوز دشتی مدوّر قارداش
.
بیلمه دیم هچ نئجه دولدوردوم او ساعت مشگی
خیمه لر سمتینه دوشدوم یولا مضطر قارداش
.
نهریدن خیمه لرین فاصله سین آل نطره
اوخ وُرانّان داش آتانّان دولی یکسر قارداش
.
یاریدان چوخ بو یولی شوقیله من گلمیشدیم
سالدلار تنگه ولی قوم ستمگر قارداش
.
هر قدم آتدی عقابیم منه بیر اوخ دگدی
سپر ائتدیم سوآ دوغراندی بو پیکر قارداش
.
گینه قویمازدوم آقا مشگیمه دگسون صَدَمه
سالدلار قولاّریمی تپراقا لشگر قارداش
.
گیزلننّرده قاچانّاردا هجوم ایله دیلر
گوردولر یِئردَ دی حیدر اوپن اَ للر قارداش
.
اَ للیلَر اَ لسیزه اَل آچدلا بو صحراده
نه چکوب بیلدیم عموم حضرت جعفر قارداش
.
کسلینّن سورا قولاّر دگوب اوخ مشگیمنن
وُردولا ر فکر ائله دیم روحیمه آذر قارداش
.
مرکبین اوستی آخوردی یئره سو ، من اَل سیز
دئسم اولدوم سو آخاندا ، اِئله باور قارداش
.
حرمله گوردی بو حالی گوزومی دوتدی هدف
گوزومه فکر اِئّدور اوخ وُردی او کافر قارداش
.
اوخ دِئدی ساغ گوزُوی گوزله دِئدیم قوی چخسون
حاضر اولدوم سه پر اوخنان اولا پرپر قارداش
.
دییورم علّتینی عشقیمه معیار اولسون
منده وار تربیت فاتح خیبر قارداش
.
سنه بیر گوز کی باخاندا اوتانوب شرم اِئدَجک
قالماغنّان داغلوب چخماغی بهتر قارداش
.
ساغ گوزوم چخدی ولی چخمادی گوزدن پیکان
قالدم ال سیز بو اوخا نِینیوم آخَر قارداش
.
باشیمی سالدم اشاقه اوخی دیزلر چکدی
بیلمه دیم باشدی و یا اوخدوکی تیترر قارداش
.
اَ لیم الدن ئوزولنّن سورا نوفَل گلدی
گلدی پیکاریمه گور هانسی دلاور قارداش
.
او شجاعتله گَلَن وُردی منه دیل یاراسی
یاندروب قلبیمی یانسون او سبک سر قارداش
.
گوردی یوخ منده توان ایله دی دعوت جنگه
سنماسون من کیمی هچ جنگیده افسر قارداش
.
دئدی امداده چاغور گلسون اوگی قارداشووی
اولا مشکلده گرک قارداشا یاور قارداش
.
نچه ساعت قاباق ای سفله دِئدیم هاردیدون؟
منه وِئردی بو جوابی او ستمگر قارداش
.
باشما وُردی او نامرد اِئله بیر آهن عمود
پیکریم گوردوم اِئدور ساغ سولا لنگر قارداش
.
عرش زین اوستن اگر دوشسه یئره بیر یارالی
بدنینده ایکی اَل اولماسا نینر قارداش؟
.
یئره دوشدوم یوزی اوستونده عقاب اوستونن
گوردوم آغلور منه زهرای مطهّر قارداش
.
منی عفو ایله سنی چولده کمک سیز قویدوم
قارداشین قویسا کمک سیز اوتانار هر قارداش
.
نوکرون باخما پریشاندی پشیمان اولماز
یارالار ایلیور ایثاریمی خوشتر قارداش
.
بیر سوزوم وار ئورگیمده دِئمَسَم پارچالانار
دییورم تا آچا ا َمّامه پیمبر قارداش
.
سن بویوردون کی شهید اولمالیدی اصغرده
اوچ پر اوخنان بیچیلر حنجر اصغر قارداش
.
باخ منیم ساغ گوزومه سود امرین فکرینه قال
اصغره من بیلورم نِینیَر اوچ پر قارداش
.
#عباسیه_شهادت
#توکمه_گوز_یاشووی_ای_سید_محشر_قارداش
#امانی_اردبیلی
#ترکی
.
نظر دهید