وصیت حضرت صدیقه طاهره زهرای مرضیه (س) خطاب به حضرت علی (ع)
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
جان اوستیم گل ای منه جانان عم اوغلی
اگلش باشیم اوسته اوخی قرآن عم اوغلی
.
.
آغلار گوزوم وار دور منیم گیزلین سوزوم وار
بیر بیر سنه گل ایلیوم اعلان عم اوغلی
.
.
یوخ طاقتیم دردیم گران دور ناتوانم
قلبیم یانوب لاله کیمی من باغریقانم
بیر آز زمان اما سنه من میهمانم
تئز گئتسه خوشدور هر گئدن مهمان عم اوغلی
.
.
لطفون منه شامل شه گردون جلال ایت
قلبیم سنقدور سینه دن رفع ملال ایت
اؤز حقّیوه ویرّم قسم حقّون حلال ایت
ای عارضی آئینۀ ایمان عم اوغلی
.
.
من بیر گلم گلشن منه باغ رسالت
خار جفا اما آچوب دست عداوت
بو قوللاریمدا وار هله نقش جسارت
بو حالیله وئررم بوگونده جان عم اوغلی
.
.
وئردیم ملال و محنته یر گوز ایویمده
دشمن دیدی طعنیله بعضی سوز ایویمده
دؤگدی منی اهل عداوت اؤز ایویمده
سالدی ایاقدان ظلم بی پایان عم اوغلی
.
.
بیر اودلی دل مینلر غم و غصه گوتوردی
هر تازه غم کهنه غمی گلدی ایتوردی
غُصَّم چوخ اولدی دردیمی آخر یتوردی
دویدوم داخی جانه من نالان عم اوغلی
.
.
ووردی دیمم جانی منه ظلمیله سیلی
اولدی منیم بوحالیمین عمده دلیلی
واردور هله سولموش یوزومده رنگ نیلی
بو ظلم اولدی مرگیمه عنوان عم اوغلی
.
.
من بیر گلم غم رنگیمی ایتدی پریده
جانی جفاسی قدیمی ایلوب خمیده
ترک ایلرم بو عالمی آخر شهیده
درک ایلرم من محضر جانان عم اوغلی
.
.
گرچه اؤزوم بیر نوگل باغ صفایم
اما سولوب پژمردۀ باد جفایم
اؤز مرگیمه بوگون اؤزوم دلدن رضایم
تسلیم ائدم جانانه خوشدور جان عم اوغلی
.
.
گل گور نئجه گل تک منیم سولموش یوزوم وار
آغلار بولود تک بیر دولی آغلار گوزوم وار
لطف ایله سن عرض ایلرم نچّه سوزوم وار
تا قالماسون دلده سوزوم پنهان عم اوغلی
.
.
ال اوزمه لی اولدوم بوگون نچّه گلیمدن
خاصه حسن تک بیر گوزل نور دلیمدن
مشکلدی آیریلماق حسین تک سویگولومدن
آیریلّام اوندان دردیله بوآن عم اوغلی
.
.
ایستکلیدور زهرایه بو نور دو عینیم
دویدوم نه من اوندان اودور وار شور و شینیم
دویدی نه مندن سؤگلوم نازلی حسینیم
گل تک سولار بو نوگل رضوان عم اوغلی
.
.
من ایلرم مدفن بوشهر مصطفانی
اما حسینیم وادی کرب و بلانی
گر ایسته سه گوگلون سنون بو مه لقانی
بیرگون گئداخ منله اونا مهمان عم اوغلی
.
.
اوردا حسینون بیرگونی چوخ غمفزادی
عاشور آدی اما اؤزی پرماجرادی
اوردا اوگونده زینبه محشر به پادی
وار ئوزگه سرّ اوردا شه خوبان عم اوغلی
.
.
بیر گوندی کیم چوخ شورش و غوغاسی واردی
هر بیر غم اوسته محنت عظماسی واردی
تشکیل جانفرسای عاشوراسی واردی
اوغلوم اولار اؤز قانینه غلطان عم اوغلی
.
.
یانّام همین هنگامه نی قیلّام مُمَثّل
لمه الى بوش باشی اوسته شاه اعدل
احسان ایله الده گتور بیر جام سو گل
قویما حسینیم جان وئره عطشان عم اوغلی
.
.
گل باشی اوسته آغلاسن قان آغلیوم من
سن سینه داغلا شوریله دل داغلیوم من
سن باخ حسینون گوزلرینی باغلیوم من
سن نوحه باشلا من ائدوم افغان عم اوغلی
.
.
سن وای اوغول دئ وای غریب کربلا من
سن وا شهیدا دئ دیوم وا مُحجتا من
زینب دئسون ایوای حسین وا زینبا من
من آغلیوم اولسون قزیم گریان عم اوغلی
.
.
«تائب» یاز آغلا گز هامو بزم عزانی
آغلا خدادن آل برات کربلانی
گئت اؤپ نجفده قبر شاه لافتانی
زهرا دلینجه دئ سنه قربان عم اوغلی
.
.
#فاطمیه_تائب_تبریزی
#فاطمیه_شهادت
#جان_اوستیم_گل_ای_منه_جانان_عم_اوغلی
#ترکی
.
✍️ #زبدةالاشعار ✍️
.
🆔: @nohe_torki
نظر دهید