شهادت حضرت زهرا سلام الله علیها
#گریز به #غارت_خیام و #شام_غریبان حضرت اباعبدالله الحسین علیه السلام
.
.
.
مرحوم حاج حیدر خوندل
.
.
.
جان ویروب زهرا علی اولدی غمینده سوگوار
گوز یاشین رخساره توکدی شهر عشقه شهسوار
.
ایلموشدی چون وصیّت چرخ عصمت کوکبی
ایلسون اغیاریدن تکفین و دفنین استتار
.
عدل و انصافیله تطبیق اولسا گر بو ماجرا
حشره دین اهل ولانون قلبین ایلر داغدار
.
بیر نفر دنیاده یوخ زهرا کیمی مظلوم اولان
گورمیوبدور بیر بیله مظلوم دور روزگار
.
آل پیغمبر گرفتار اولدی دام محنته
شیر حقّی گور نجه محصور ایدوب رنج و فشار
.
ظلمت شبده بتولین مرتضا غسلون ویرور
ایستمور بیگانه لر تاپسون بو امره اختبار
.
نقل ایدر راوی که گوردوم صبر دریاسی علی
گلدی ناگه نالیه گیتدی الیندن اختیار
.
چوخ پوزولدی حالتی بیر شدتیله آغلادی
اشگینی جاری ایدوب رخساره چون ابر بهار
.
حالیمی پوزدی امامین حالتی عرض ایلدیم
ای هامی عالم سنون صبرونده حیران و فگار
.
فرقت زهرا سنی آیا بیله محزون ایدوب
واردی یا آیری بیر علّت ای امام بردبار
.
ائتدی فرمایش بتولین محنت هجرینده من
واردی حقّیم آغلاسام قیلسام ئولونجه آه و زار
.
وار ولی بیرآیری علّت صبریمی تاراج ایدوب
سنگ خارایه اثر ایلر بو شرح ناگوار
.
پیکر زهراده گوردوم تازیانه یرلرین
قمچیِ دشمن وجودین ایلمیشدی زخمدار
.
بوردا وار بیر نکتۀمبهم منی مبهوت ایدوب
مو کیمی باریک بیر مطلبدی چوخ اسراری وار
.
رتبۀزهرانی فاش ایلر همین بو ماجرا
گورمیوب زهرا نظیرین بو سپهر کجمدار
.
ئولدی دردین محرم اسرارینه بولدورمدی
اولمادی راضی ملول اولسون ولیِّ کردگار
.
وار عقیدم محضر پیغمبراکرمده هم
مرتضانین حفظ ایدر شخصیتون اول با وقار
.
یعنی اظهار ایلمز قمچی ویروب دشمن منه
قوللاریمدا تازیانه نقشینون آثاری وار
.
قنفذ و ثانی جفاسین غصب ملکین سویلمز
محسنون سقط اولماقین کشف ائتمز اول والاتبار
.
الغرض تغسیل وتکفینی تمام ائتدی امام
چشم خامه ناوک مژگانیله دفنین یازار
.
بولمورم نه طرزیله زهرا بقیعه حمل اولوب
بو قدر وار دفن اولوندی مصطفایه یادگار
.
واقعا یوخدور علی تک بیر نفر مظلوم اولان
چوخ اسفلی بیر حیاتی طیّ ایدوب اول شهسوار
.
دفن ایدوب زهرانی امّا آیریلانمور قبریدن
رشتۀ الفت کسیلمور گوز یاشی ایلور نثار
.
سلب ایدوب دلدن بتولین فرقتی آرامینی
جام صبرین ایلیوب لبریز هجران نگار
.
ئوز الیله تاپشوروب توپراقلارا محبوبه سین
هانسی عاشقده اولار بو قوّه ، بو صبر و قرار
.
هجر دلداره گرفتار اولسا هرکیمسه بولر
یاره نه اندازه ده تاثیر ایدر فقدان یار
.
قلبی چوخ یاندی علینون چوخ پوزولدی آغلادی
قصد ایدوب سیلسون سرشگ چشمیله دلدن غبار
.
دوندروب یوز مدفن پیغمبره عرض ایلدی
السّلام ای شاه یثرب ای رسول تاجدار
.
گور نجه مظلوم ایدوب سندن صورا امّت منی
حقّیمی غصب ایلدی ظلمیله قوم نابکار
.
بس دگول اقدام ایدوب یاندیرماقا درگاهیمی
ئوز قیزون زهرانی دشمن ایلدی درده دچار
.
محسنی ئولدی فشار غمدن اولدی غصه مرگ
ئولمدی ئولدوردولر زهرانی قوم کین شعار
.
آغلادی دردین دیدی سوندی اورکده نار غم
اولمادی راضی آناسیزلار چوخ اولسون انتظار
.
قبریدن آیریلدی بیر دنیا غم و اندوهیله
دودمان عصمته اولدی او سرور رهسپار
.
روحینی قویدی بقیع ایچره قیتدی منزله
دوتماقا ماتم بتوله حجت پروردگار
.
بوش گوروب زهرا یرین گلدی دوباره شیونه
چکدی دلدن آه گوزدن توکدی درّ شاهوار
.
گرچه بو محنت علینی ایلموشدی دل ملول
داغ زهرا قلبینه چکمیشدی داغ بی شمار
.
چوخ پوزوب احوالین امّا اهل بیتون شیونی
گوردی تاراج خزانیله سولوب هر گول عذار
.
مجتبانین حالتی حالین پریشان ایلدی
توکدی گوزدن عارضه اشگین چو درّآبدار
.
کربلا مظلومینین گوردی گوزونده اشگ غم
حالی چوخ پوزقوندی وار حالینده حال احتضار
.
زلفی تک بیر گوشه ده آشفته گوردی زینبی
چوخ پریشاندور اونون قلبینده قالمور اقتدار
.
آغلوری کلثوم سیل اشکینون طوفانی وار
گوزلری ابر بهاری ایلیوبدور شرمسار
.
شیر حقّون حالینی چوخ پوزدی پوزقون حالیلر
مجلس غم اشگیله زهرا ایوینده قوردولار
.
دوتدولار زهرا عزاسین توکدولر گوز یاشلارین
ویردیلر بیر سس سسه شوره گلوب آغلاشدیلار
.
بو عزا بو بزم غم بو ناله بو داد و فغان
بیر عزا بزمین ایدر عیناً گوزومده آشکار
.
کربلاده چون شهادت ختم اولوب یاندی خیام
غارته گیتدی جلال بارگاه زرنگار
.
امر سجّادیله آهولر حرمدن رم یِدی
زینبه باشلاندی محشر سخت اولوب چوخ گیر و دار
.
خانمانسیز پرشکسته قیزلارین حالین گوروب
بیر یانان خیمه ایدوب بر پا اوکان شرم و عار
.
بیر شهامت گوستروب دنیانی حیران ایلدی
حفظینه آل اللهین ظاهرده اولدی عهده دار
.
خیمیه کلثومی دربان ایلیوب امّا ئوزی
چولدن اطفالی یغوب پژمرده یورقون دلفگار
.
تا امانسیزلار امان تاپدی قاچانلار گلدیلر
زینبون اطرافینه جمع اولدولار خرد و کبار
.
.
نظر دهید