حالات طفلان مسلم (ع)
.
.
✍️ #زبدةالاشعار ✍️
.
🆔: @nohe_torki
.
#سبک_ای_باد_صبا … 7 سبک
.
مرحوم تائب تبریزی
.
حارث سارالان رنگیمیزه بیر نظر ایله
ئولدورمه بیزی قهر خدادن حذر ایله
.
.
گل ایتمه جفا ، مهر و وفا رسمینی آتما
شرم ایت ایکی قارداش قانینی بیر بیره قاتما
.
.
ظالم بیلوسن گلشن حیدر گُلییوخ بیز
ظلمیله دوشن گُلدن اوزاق بلبلیوخ بیز
مسلم کی شهید اولدی اونا سوگلیوخ بیز
اینجیتمه یتیموخ گوروسن غصّه نصیبوخ
ویرما وطن آواره سیوخ بوردا غریبوخ
.
.
بیز بلبلیدوخ بیر ایل اسیر قفس اولدوخ
زنداندا قالوب بیکس و بی دادرس اولدوخ
دائم ایکی قارداش غمیله هم نفس اولدوخ
گوز یاشیمیزی بیر برینه هر گیجه قاتدوخ
قویدوخ اوز اوزه گوشۀ زندانده یاتدوخ
.
.
آغلار گوزوموز سینه ده حسرت یارامیز وار
غربت زده یوخ گیتماقا آیا هارامیز وار
یثربده گوزی یولدا قالان بیر آنامیز وار
حسرتله یوزه گوز یاشی دائم آخار آغلار
آغلار گوزیله یوللارا دائم باخار آغلار
.
.
بسدور بو بیر ایلده چکوروق درد فراقی
مظلوم ایلمه گل بو ایکی ایلدن اوزاقی
ایو صاحبی سن شرم ایله ئولدورمه قوناقی
عالمده قوناق ساخلاماقین رسمین ایتیرمه
شرم ایت اوز ایونده قوناقی قتله یتیرمه
.
.
مظلومی گوروبسن گیده بیداد دالینجا
مقتولی گوروبسن گزه جلّاد دالینجا
نخجیری گوروبسن دوشه صیّاد دالینجا
بیز قاتل خونخواره قوناق غرق ملالوخ
صیّاد ستمکاره پناهنده غزالوخ
.
.
نه بیز کیمی مظلوم اولی نه سن کیمی بیداد
نه بیز کیمی مقتول اولی نه سن کیمی جلّاد
نه بیز کیمی نخجیر اولی نه سن کیمی صیّاد
انصاف ایله ای شوم ستمگر سنی تاری
صید ایلمه صیّاده پناهنده شکاری
.
.
اولدوق سنه ای شوم پناهنده ایوینده
ایتدون نه گوزل حرمت شاینده ایوینده
بیلدون قوناق ئولدورماقی زیبنده ایوینده
دیوان جزا حاکمینی یاد ایله حارث
ئولدورمه اماندور بیزی آزاد ایله حارث
.
.
آزاد ایله سن یثربه بیر باش گیدروخ بیز
ویرّوخ ال اله دیده ده قانیاش گیدروخ بیز
یول یولداشی اوللوخ ایکی قارداش گیدروخ بیز
یتساق وطنه اوز آنامیز گوگلنی آلّوخ
قول نازلی خدیجه باجیمیز بوینونا سالّوخ
.
.
آزاد ایلمورسن بیزی سال اللهی یاده
غیضیله باخوب قتلیمیزه ایتمه اراده
ئولدورمه بیزی زنده آپار ابن زیاده
شاید بیزه اوز کفرینی بولدورمیه حارث
بو حالیمیزه رحم ایده ئولدورمیه حارث
.
.
اولموش سنه دنیا مالی معلومیدی منظور
اینجیتمه بیزی ایلمه دلخسته و رنجور
هر چند که بیز هاشمیوخ دهریده مشهور
کَس زلفیمیزی ظالم آپار قول یرینه سات
ال قیمتیمیز وار نَقَدر کامِ دله چات
.
.
ظالم گوروروق گوزلریوی ایله دوتوب قان
قان قان دیوسن متّصل ای دشمن قرآن
اوز قانیمیزه ایله جاقسان بیزی غلطان
آماده سن ئولدورماقا باری ویر اجازه
جانانیله بیز حاضر اولاخ راز و نیازه
.
.
تا اذن صلاة اولدی توکوبلر یوزه قانیاش
مشغول نماز اولدولار با هم ایکی قارداش
آندیردیلا کای ظالم و سر دستۀ اوباش
شرم ایله اوتان گور بو نمازیله نیازی
مقتول ایلمز اهل نماز اهل نمازی
.
.
قورتاردی نمازین ایکی آزادۀ نالان
یوز دوتدولا درگاه ِ حقه گوزلری گریان
کای حکم قضا حاکمی وی داور دیوان
گور ئولدوروری بو ایکی بی جرم و گناهی
بو باره ده سن عدلیله حکم ایله الهی
.
.
بو حالده حارث گتوروب ظلمین عیانه
غلطان ایدوب اوّلده بیوک قارداشی قانه
حسرتله باخوب خیرداجا قارداش یانا یانه
بیردن اوزونی سالدی او باشسیز بدن اوسته
بلبل تک ایدوب ناله او گول پیرهن اوسته
.
.
اوخشاردی بیوک قارداشینا خیرداجا قارداش
قارد اشین آدی دیلده توکردی یوزه قانیاش
سویلردی که ای غملریمه غم گونی یولداش
خوش حالیوه قارداش ئولومون گورمدون ئولدون
هر غصّه ده یولداش ئولومون گورمدون ئولدون
.
.
قارداش ئولومی قارداشا مشکلدی برادر
بخصوص گوره کشتۀ قاتلدی برادر
آرتوق هامی نسکلدن او نسکلدی برادر
من باخدیم او ظالم یره یخدی سنه قارداش
کسدی باشیوی آرخاسیز ایتدی منی قارداش
.
.
بو شوم ستمگر سنی مذبوح ایلینده
یاندی اورگیم طاقت دل قالمادی منده
یومدوم گوزومی خنجری حلقونده گورنده
مین حسرتیله دانۀ اشگی یوزه دوزدوم
الله ئوزی عالمدی که دوزدوم نئجه دوزدوم
.
.
هر چند باشون ظلمیله آیریلدی بدندن
مشکلدی ولی مهر و وفا آیریلا مندن
قویماز او محبت منی آیریلماقا سندن
بو سینه دن آیریلمارام اول قدر دایانّام
سینونده یوزوم سن کیمی القانه بویانّام
.
.
حارث گوروب او بلبلی شیرین سخن اوسته
آیرلماز دوزون سالموش او گول پیرهن اوسته
کسدی دالیدان باشین او باشسیز بدن اوسته
گُول اوسته ایدوب بلبل شوریدنی خاموش
یرده ایکی قارداش بدنی اولدی هم آغوش
.
.
حارث ستمین پایه سینی عرشه اوجاتدی
یرده ایکی قارداش قانینی بیر بیره قاتدی
هر تک تکینون نعشینی گوتدی سویا آتدی
چون غنچۀ دل آب قیزیل قانیله دولدی
گلدی سو یوزونده ایکیسی قول بویون اولدی
.
.
ناگاه باخوب حارث بد فطرت و ناکس
گوردی سویا باتدی ایکی مظلوم ایکی بی کس
بیردن سویون آلتیندا آولاردان اوجالوب سس
عالِمسن الهی بیزه نیلوبدی بو گمراه
دیوان ایله بوندان آرامیزدا اوزون الله
.
.
حارث اَلَه منظورینی ظاهرده گتوردی
بیر فاصله بیر جفت گوزل باشی گوتوردی
فرزند زیاده اوزونی گلدی یتوردی
گُل تک ایکی باشی او جنایت اطاقیندا
قویدی یره فرزند زیادین قباقیندا
.
.
پاک ایلدیلر رأس ایکی ماه جمالی
گورجک ایکی سولموش گُل گلزار کمالی
فرزند زیادین دگیشیلدی ایله حالی
قلبین او قساوتله مصیبت اوخی دلدی
سس چکدی توکوب گوز یاشینی نالیه گلدی
.
.
مجلسده اولانلار او گوزل باشلارا باخدی
یاندیردی هامی دیللری حسرت اودی یاخدی
بیردن هاموسی آغلادی گوز یاشلاری آخدی
آغلار گوزیله سس سسه ویردی او جماعت
مجلسده قیام ایلدی اوضاع قیامت
.
.
مرجانه نین اوغلی دیدی یوخ عاطفه سنده
بو ایلدیقون ظلم توان قویمادی منده
سالدون حرم آهولرینی هاردا کمنده
سن هاردا شقاوت اودون افلاکه اوجاتدون
هاردا ایکی قارداش قانینی قانینه قاتدون
.
.
عرض ایتدی زیاد اوغلونا کای منکر قرآن
اولموشدی پناهنده منه بو ایکی نالان
رحم ایلمدیم ساخلامادیم حرمت مهمان
دوتدوم ایکی آزاده قوناقی گوز ایویمده
دوگدوم اولاری چوخ دل شبده اوز ایویمده
.
.
یالواردیلار ظالم گوروسن ئیلدن اوزاقوخ
چوخدان وطن آواره سی نالان فراقوخ
رحم ایله ایوینده بیزی ئولدورمه قوناقوخ
یا قیل بیزی آزاد اوزون آزاده لره قات
یا سن بیزی بازاره آپار قول یرینه سات
.
.
گاهی دیدیلر ویرما گتورمه بیزی داده
گاهی دیدیلر قتلیمیزه ایتمه اراده
گاهی دیدیلر زنده آپار ابن زیاده
چوخ سوز دیدیلر هیچ بیریسی اولمادی مقبول
وقت آلدیلا آخر نمازه ایکی مقتول
.
.
ویردیم او نمازه ایکی آزادیه مهلت
قورتاردی نمازین او ایکی خستۀ حسرت
یوز دوتدولا درگاه خداونده او ساعت
عرض ایتدیلر گوز یاشلی که ای قادر منّان
ایله آرامیزدا سن اوزون عدلیله دیوان
.
.
چون چکدی سوزون بو یره اول شرم ستمگر
شوریله گلوب نالیه آغلاشدیلا حضّار
همناله اولوب زاده مرجانۀ خونخوار
یوز حارثه دوتدی دیدی ای ظالم گمراه
بو باره ده باخ گور نجه حکم ایلیوب الله
.
.
بیر مجلسینه باخدی او سر دستۀ باطل
کیمدور دیدی اولسون بو شقی قاتله قاتل
فی الفور یریندن آیاقا دوردی مقاتل
حارث یقه سین دوتدی یانان دیلده شراره
قول باغلی او مجلسده اونی چکدی کناره
.
.
بیر طشته قویوب باشین ایکی ماه عذارین
باشلار نجه باش تک تکینون رنگی انارین
طشت الده سالوب کوفده بازاره گذارین
حارث ایلین ظلمی بیان ایتدی مقاتل
تیر غمه هر قلبی نشان ایتدی مقاتل
.
.
الده ایکی گُل تک باش او دیندار مسلمان
سویلردی بولار حارثه اولموشدولا مهمان
کیم بیله قوناقی ایدر اوز قانینه غلطان
باخموب بولارین وار گُل اوزی غنچه دوداقی
مقتول ایلیوب ظلمیله بیر بیله قوناقی
.
.
بو رسمدی ساخلالا گوز اوستونده قوناقی
خاصه قوناق اولسون گل اوزی غنچه دوداقی
حارث آتوب انصافی دوتوب بیله سیاقی
هر قدر بونا عجز ایلیوب بو ایکی نالان
مقتول ایلیوب ساخلامیوب حرمت مهمان
.
.
بیله ایشیدنده دایانوب دوردی جماعت
رقّتله گوزون اشگیله دولدوردی جماعت
آغلار گوزیله یوزلرینه ویردی جماعت
ضجّه اوجالوب عرشه چخوب نوحه صداسی
بازارین ایچینده قورولوب ماتم اساسی
.
.
ایتدیقجا نظر حارث ملعونه جماعت
ایلردیلر مین لر دیلیله طعن و شماتت
سویلردیلر الله سنه ایلیه لعنت
بس سن دیمدون بو ایکی آزاده قوناقدور
ئولدورماقون انصاف و مرّوتدن اوزاقدور
.
.
چوخ یرده او ملعونی دولاندیردی مقاتل
ظلمین هامویه بولدوروب آندیردی مقاتل
یاندی هامونون قلبینی یاندیردی مقاتل
آخر یتوروبلر اورا کی حارث مَخذول
ایتمیشدی ستمله او ایکی قارداشی مقتول
.
.
بولدی کی او یردور اولارون قانی آخان یر
بیر بیرلینه هر ایکی مظلوم باخان یر
قارداش قانینی قارداشی رخساره یاخان یر
ازبسکه آخوبدور بوغازیندان اولارین قان
توپراقلار اولوب قرمزی چون لعل بدخشان
.
.
ناگاه مقاتل ایشدوب ناله صداسی
گوردی که بیر عورت اوتوروب دلده نواسی
اوخشار دیه سن واردی جوان مُرده بالاسی
کیفیت حالی او دم اوندان خبر آلدی
ایتدیقجا بیان گوزده کی گوز یاشی چوخالدی
.
.
عورت دیدی بو شرم دنی دور منه داماد
گلمز ولی دنیایه ایدن بیر بیله بیداد
هرچه دیدیم ئولدورمه قوناقون ایوی برباد
رحم ایتمدی ظالم بویادی ظلمیله قانه
بو سوزده مقاتل دوتوب اود چکدی زبانه
.
.
خنجر آجیسین حارثه آندیردی مقاتل
ئولدوردی اونی قانه بویاندیردی مقاتل
اوددا بدن نحسنی یاندیردی مقاتل
دنیانی آتوب دلده رضای حقی دوتدی
واقعده دل مسلم نالانی سوتدی
.
.
«تائب» سنه تایید ایلدی حیّ قدیمی
بو رشتیه دوزدون بو گوزل دّرُ یتیمی
یاد ایتدون ایکی غصّه لی مظلوم یتیمی
دی دردیوی چون باب حوائجدی بولار فاش
ایللَّه نه دردون اولا درمان ایکی قارداش
.
.
.
#حارث_سارالان_رنگیمیزه_بیر_نظر_ایله
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید