حضرت علی(ع)و سخنوری از یمن
#گریز به #حیدریه_شهادت و #قتلگاه
ـ
✍️ زبدة الاشعار ✍️
?: @nohe_torki
ـ
علیرضا حضرتی(ناعمی)
ـ
حجت ذات خدا، محبوب جاناندی علی
جانشین حضرت ختم رسولاندی علی
سرور عالم، امام کون و امکاندی علی
صاحب شأن و مقام و عزّ و رجحاندی علی
ای جوانمردان عالم شاه مرداندی علی
ـ
هر داشی انگشتر زرّینه من قاش بیلمرم
ارزل الناسی اعزّالناسیدن باش بیلمرم
حیدرین منکرلرین ئولسمده قارداش بیلمرم
هئچ نه وحدت نه تقیّه باشیمه کئچمز منیم
دشمن شاه ولایت دشمنیمدی دشمنیم
ـ
دینیمی من حیدرین عشقیله تحکیم ائتمیشم
زندگی برنامه می عشقیمله تنظیم ائتمیشم
من علینون عکسینی قلبیمده ترسیم ائتمیشم
بیر دلاور قهرمانی چکموشم چوخ باوقار
بیر الینده واردی قرآن بیر الینده ذوالفقار
ـ
ذاتی مصداق ثبوتی قل هو الله احد
وصفی دور خلقتده شرح الذّیل الله الصمد
لم یلد بیرده وَ لم یولد مثالی تا ابد
لم یکن غیر از رسول الله لهُ کُفواً احد
باخ جلال مرتضایه سسله یاحیدر مدد
ـ
من علینون آدینه بو جانی قربان ایلرم
یاعلی ذکرین اورکدن هردم عنوان ایلرم
گونده اوچ دفعه اذاندا عشقین اذعان ایلرم
تا وار عمروم دشمن حیدرله پیکار ایلرم
سسلرم من یاعلی وهّابینی خوار ایلرم
ـ
راوی نقل ایلور ائلیکی حقّینه چاتدی علی
عدل و دادی برقرار ائتماقه باز اولدی الی
قویدی اجرایه قوانین رسول مرسلی
فاش ائدوب عالملره بو سرّی شاه لافتا
نه ابوبکر و عمر حقدی، نه عثمان دغا
ـ
دولت دینی اودم که قوردی سلطان ولا
ایستدی اسلامیاندان صدقیلن بیعت آلا
مملکتده تا نظامین پایه سی محکم اولا
حق طلبلر عزم ائدوب حیدر حضورین سر به سر
ائتدیلر تعظیم او شاهین اللریندن اؤپدولر
ـ
اهل تاریخ اولسا گر واقفدی کی اول عصریده
چوخ یئره تاپمیشدی ال اسلام فتح و نصریده
حاکمیدی شامیده، ایراندا، روم و مصریده
گسترش تاپمیشدی شرق و غربه مرز دولتی
کشور دینون اوجالمیشدی جلال و شوکتی
ـ
چون او شه اولدی خلیفه نامه یازدی هر یئره
والی لر بیعت ائدوب اؤز حُسن ظنّین گؤستره
تا امور امته آسوده تر سامان وئره
دولتین اوّلده مستحکم ائدوب شاه زمن
هر دیاره گؤندروبدی نامه از جمله یمن
ـ
نامه ده یازدی یمن والی سینه میر عرب
ترک ائدوب دنیانی عثمان،ایندی یابن منتجب
بیعت ایله حیدره حیدردن آل والی لقب
مرتضایه وئرمسون بیعت الی معزول سن
آستان دولت قرآندا نامقبول سن
ـ
بیرده منظوریم بودی بیعت گر ائتسون قیل عمل
ایستورم من اولمیا رکن حکومتده خلل
آختاروب ملک یمندن هر دِه و شهری اَول
اون نفر تاپ مرد تقوا، مرد ایمان،مرد دین
صاحب شخصیت و علم و کمالات و یقین
ـ
ایستورم اول اون نفر شخص برازنده اولا
آسمان علم و دینده ماه تابنده اولا
جانب خلق یمندن تا نماینده اولا
منله یثربده گلوب صدقیله بیعت ایلیه
خالق و مخلوقه بو دنیاده خدمت ایلیه
ـ
چونکه مکتوب همایونی یتیشدی مقصده
گؤردی والی حضرتین فرمانینی اول نامه ده
اؤپدی ال قویدی گؤز اوسته امرینی اجرا ائده
جمع ائدوب اطرافیانین فوری شورا ایلدی
فی الزّمان بیر هیأت اجرایی برپا ایلدی
ـ
سس دوشوب ملک یمنده ای گروه متقین
ایستیوب دیداره اون مؤمن امیرالمؤمنین
آرزو ائتدی چوخی اؤپسون او مولانین الین
امر اولوب کلّ یمندن جمع اولوبدی یوز نفر
یوز نفر شایسته عالم،یوز نفر فرزانه لر
ـ
یوز نفردنده اوتوز مرد موثّق سئچدیلر
اون نفر اول جمعیدن دیندار مطلق سئچدیلر
عرصه ی علمیله تقواده موفّق سئچدیلر
اولدی گلچین اون نفر مردان علم و اجتهاد
هامّی اول اون عالمه وئردیله رأی اعتماد
ـ
اوللارا اهل یمن دست صداقت وئردیلر
ائتماقا مولاییلن بیعت ولایت وئردیلر
ایلیوب یعنی نماینده وکالت وئردیلر
قیلدیلار قصد مدینه دلده شور و اشتیاق
اولدولار چوخ چکمدی شهر پیمبرده قوناق
ـ
گؤردولر شهر مدینه حالت بیداری ده
شور و شادی موج ائدور هرکوچه و بازاریده
گؤرسنور شوق و طراوت چهره ی احراریده
گوئیا باشه چاتوبدی ظلم و عصیان ایللری
هم ابوبکر و عمر عصری،هم عثمان ایللری
ـ
حق چاتوب حقداره عدلین دولتی برپا اولوب
غاصبان مسند دین دهریده رسوا اولوب
شادیدی مظلومیلر عهد جفا ملقا اولوب
اگلشوب تخت ولایتده علی المرتضی
تا مسلمانلاره اولسون پیشوا و رهنما
ـ
مسجده وارد اولوب نوّاب احفاد یمن
گؤردولر منبرده دی شاهنشه عصر و زمن
صدقیلن دین اهلینه ایلوردی ایراد سخن
سینه ده دست ادب دیلده هامی عرض سلام
ائتدیلر سلطان عدل و داد، علیّه احترام
ـ
مسجدین صحنینده تا گؤردی اولاری بوتراب
آلدی اول جمعین سلامین ایلدی ردّ جواب
اندی منبردن دوتوب ئوز اوللارا قیلدی خطاب
خوشگلوبسوز ای یمن اقصاسینون جانانلاری
یورماسین الله سیزی ای مرتضی مهمانلاری
ـ
حق سیزه ائتسون مدد با نام حق گفتار ائدون
یاور اولسوز دولت اسلامه گر اظهار ائدون
واقفم مقصودوزه گرچه،اؤزوز تکرار ائدون
آشکارا ایلیون بیعت موافق سوز اگر
یار اولون بو یاور قرآنه صادق سوز اگر
ـ
مسجد اهلی گؤز تیکوب دقتله یکسر صحنیه
بیربیره باخدی اول عدّه کیمدی گفتارایلیه؟
پادشاه عالم ایجاده پیغامین دئیه
گؤردولر اول اون نفردن بیرنفر گلدی دیله
باشلادی اؤز سؤزلرین ابراز ائدور مین شوریله
ـ
سویلدی یامرتضی ای سرور مردان دین
ای امام اهل ایمان یا امیرالمؤمنین
ای یگانه نائب برحقّ ختم المرسلین
ییرمی بش ایل حقّینی اهل شرارت غصب ائدن
مسندینده جهل دوران اشقیانی نصب ائدن
ـ
ای شه ملک ولا ای جنّ و انسانه امیر
وی رسول مصطفایه هم وصیّ و هم وزیر
شأن و اجلالی گلن اظهاره فی یوم الغدیر
ای مقام و منزلتده نفس پیغمبر اولان
لایق امر امامت اللها مظهر اولان
ـ
سن امام المتّقین سن سن ولی الله سن
حجة اللّٰهسن رموز عالمه آگاه سن
آستان کبریاده مرد صاحب جاه سن
شأنوی مولا بیر الله، بیر رسول الله بیلر
کیمده وار ایمان سنی ارض و سمایه شاه بیلر
ـ
سن علی المرتضی عشّاقه سرورسن آقا
ذوالفقارین صاحبی فتّاح خیبرسن آقا
عمرو کُش، مرحب یخان، غیرتلی حیدرسن آقا
گر لیاقت یوخدی بیزده تا دوداقوندن اؤپک
وئر اجازه خم اولوب مولا ایاقوندن اؤپک
ـ
یاعلی بیز ملک احرار یمندن گلمیشوک
ایلیوب بیعت آلاق دستور سندن گلمیشوک
شوقیلن دیداره بیر دیللی وطندن گلمیشوک
گلمیشوک صدق دلی ابراز ائداق مولا سنه
باش و جاندان کئچمیشوق باش اگمگه تنها سنه
ـ
ثبت ائدوب تاریخ او شخصین موبه مو گفتارینی
گؤردی یکسر اهل مجلس شیوهٔ رفتارینی
مدح و وصف مرتضاده سویلین اشعارینی
مدح شاه لافتاده اؤزگه غوغا ایلدی
شوره گلدی اهل مجلس نطقینه احسن دئدی
ـ
دقتیله باخدی اول شخصه علی المرتضی
عالم الاسراریدی اسراری گؤردی برملا
گؤزلرینده بیلمورم نه گؤردی چشمان خدا
اولمادی اغفال اول شعر و شعاریندن اونون
ئوز دوتوب آلدی خبر ایل و تباریندن اونون
ـ
قیلدی فرمایش مرادی سن؟منه ایله بیان
عبد رحماندی آدون؟کشف ایله حضّاره عیان
عرض قیلدی سن اؤزون آگه سن ای جان جهان
فاش ائدوب اصحابه آدین چون او شاهنشاه اونون
باخدی عرشه سسلدی انّا الیهِ راجعون
ـ
بو قضادن حیرته دوشدی او مجلس یکسره
خیره خیره باخدی مردان یمانی بیر بیره
بو نه جریاندی،نه ایش،یاللعجب نه منظره؟
ابن ملجم حضرته عشق و ارادتدن دئیور
حجت یکتا گؤرن هانسی حکایتدن دئیور؟
ـ
گلدی گفتاره دئدی مرد یمانی یاعلی
قویدون حیرتده ندن بو خسته جانی یاعلی
فاش ائله انصاروه سرّ نهانی یاعلی
محضرونده گرچه مولا بنده ی نالایقم
باغریمی یاردون سنه منکه اورکدن عاشقم
ـ
قیلدی فرمایش گؤزومده بیرگون اولدی جلوه گر
کوفه ده،مسجدده،محراب ایچره،هنگام سحر
تیغ اشقی الاشقیا ظلمیله فرقیمدن دگر
ئوز گوزوم قانه باتار من کامکار اوللام اوگون
قورتاروب غم غصه لردن رستگار اوللام اوگون
ـ
سویلدی یاسیدی بو سؤز منی خوار ایلدی
منقلب ائتدی بو رازون قلبیمی زار ایلدی
هامّینی حیران، منی درده گرفتار ایلدی
گر من ای جان جهان مجرم همین سوداده یم
قتلیمون یاز حکمون الان ئولماقا آماده یم
ـ
قیلدی فرمایش که حاشا عبد کاملدی علی
الله عالمدی کی امراللهه عاملدی علی
بیلموسن آیا مگر سلطان عادلدی علی؟
جوهر عدلین فنا دنیاده معدوم ایلمز
هئچ کیمی جرم ائتمه میش عالمده محکوم ایلمز
ـ
عرض قیلدی قلبیمی قان ائتدی مولا بو سخن
ایلرم ئوز عشقیمی اخلاصیمی اثبات من
محضرونده قاللام ای شه ائتمرم عزم یمن
درگهونده خدمت ای سلطان دوران ایلرم
مقدمونده جانیمی عشقیله قربان ایلرم
ـ
الغرض کچدی اوگون یاران دولاندی روزگار
ایلیوب بیعت یمن اهلی او شاهه استوار
دوقّوزی اوردان قاییتدی قالدی بیر تزویرکار
قالدی خدمت ایلیه اما نه خدمت ایلدی
زینب مظلومه نی غرق مصیبت ایلدی
ـ
بیلمورم صفّینیده دوتدی نجه غفلت گوزون
نیزه اوسته گوردی قرآنی ایتیردی تئز اوزون
مکر کفره آللانوب درک ائتمدی مولا سؤزون
راه حقّی تاپمادی جهل و تعصّبدن بلی
دولدی اشقی الاشقیانین قلبینه قهر علی
ـ
گوردی بیر ایش عالم امکانه دوشدی ولوله
تیتره دی عرشین ستونی فرشه دوشدی زلزله
روضه ی رضواندا زهرا معجرین آلدی اله
نقش اولوب محرابه علم و عدل و دادین هیکلی
سسلدی جبریل گویده شیعه لر ئولدی علی
ـ
بیلمورم زینب نجه دؤزدی اودم باش آچمادی
تیر آهین کوفه ده قلب جهانه ساچمادی
ال باشیندا مسجده ساری هراسان قاچمادی
کربلاده قؤپدی اما بیر قیامت زینبه
قویمادی قالسون اورکده صبر و طاقت زینبه
ـ
تلّیدن باخدی قیامت صحنه سین گؤردی عیان
قانلی گوداله ییخوب عطشان حسینی کوفیان
دسته دسته حمله ایلور اوخ ویران نیزه ویران
نیزه لر اوخلار هواده سرعتیلن سان وئرور
قانلی گوداله دوشوب شاه شهیدان جان وئرور
ـ
دوره سین دشمن آلوب یوخ فکرینه بیرکس قالان
نیزه سین آماده ایلور حضرتی آتدان سالان
یوخدی زهرا اوغلونی میداندا اللردن آلان
بیربیره سبقت ائدور مقتلده اشرار دغا
قانلی میداندا قیامتدی امام ئولدورماقا
ـ
#حیدریه_مدح #حیدریه
#حیدریه_شهادت
#حجت_ذات_خدا_محبوب_جاناندی_علی
#حضرتی_ناعمی
#ترکی
✍️ #زبدةالاشعار ✍️
?: @nohe_torki
نظر دهید