احوالات حضرت علی اصغر علیه السلام
.
.
✍️ #زبدةالاشعار ✍️
.
🆔: @nohe_torki
.
#سبک_زینبم_جان_اوستیم …4 سبک
مشابه
.
مرحوم رجائی تبریزی
.
حرمله بیر ظلم ایدوب دور اشقیا حیراندیلار
ظلمه باخ بیر تیرله شمس و قمر اوخلاندیلار
.
.
سالدیلار نظم و نظامه لشکری فرمانله
جنگه ترغیب ایتلر سرکرده لر سلطانله
سس اوجالدی خیمه لردن ناگهان افغانله¬
شیونه میداندا اشرار اود دوتوب اودلاندیلار
.
.
فکر ایدوبلر وار نه علّت نالیه طفلان گلور
بی‌سبب هرگز دگول بو شورش و افغان گلور
گوردولر زهرا عزیزی اَلده بیر قرآن گلور
بو خیالیله که لشکر عامل قرآندیلار
.
ایستدی مقصودین آندیرسون همین عنوانله
من مسلمانم گورورسوز گلموشم قرآنله
کیم بیله رفتار ایدور عالمده بیر مهمانله
آل پیغمبر بو چولده سیزلره مهماندیلار
.
.
بو همان قرآن¬دی تاپشوردی شه بطحا سیزه
توصیه اولدی او گون کی حبّ ذوالقربا سیزه
نیلیوب دور عترت پیغمبروز آیا سیزه؟
برگ گل تک قورخودان آل علی لرزاندیلار
.
.
بیله تاپشوری مگر پیغمبر رحمت بیزی
ایلدوز مهمان آدیله بو چوله دعوت بیزی
قویموسوز اوچ گوندی بیر شَرْبه سویا حسرت بیزی
الده سو جامی اوشاقلار العطش گویاندیلار
.
.
احتجاج ایتدی نقدری لشکره قرآنله
گوردی شام اهلی آیلمور بیر بیله برهانله
خیمیه گیتدی قِیِتدی سوداَمَر قربانله
وادی حیرتده لشکر گوردی سرگرداندیلار
.
.
چوخ وقاریله گلوب دور شهریار انس و جان
مرکز لشکرده دوردی مطلبین ایتسون بیان
ایتماقا اِتمام حجّت اصغری ویردی نشان
ماجرایه کوفه و شام اهلی دلدن یاندیلار
.
.
سسلدی هر نه بلا گلسه بولورسوز یوخ سوزوم
ویرموسوز سو ایچمرم لب تشنه جان ویرّم اوزوم
سوداَمَرده اوچ گون عطشان قالماقا اولماز دوزوم
گُللریم سوز عطشدن غنچه‌ده خنداندیلار
.
.
من قالام دنیاده اکبردن صورا هیهات و هی
مرگ عبّاسیله ایتدوم ناقة امّیدی پِی
ایلوری عمروم گونی برج غروبه ایندی طِی
یار و انصاریم گورورسوز قانیله غلطاندیلار
.
.
اَلدن آلدوز بیر به بیر انصاریمی اعوانیمی
من مقّدس دینمه وقف ایتموشم اوز جانیمی
ایلیون سیراب اَقلّاًً بو قوزی قربانیمی
جان ویرور بی کس عیالیم حالنه گریاندیلار
.
.
خیمه گاهی دولدوروب دور شور و غوغا گورموسوز
بو سودان سیراب اولور گبر و نصارا گورموسوز
ایچماقا حسرت قالوب دور آل طاها گورموسوز
عترتیم دریا کنارینده نجه عطشاندیلار
.
.
مقصدین بو سوزلریله پخش ایدردی عالمه
سوز بورا منجرّ اولاندا لشکر ایلوب همهمه
بیربیرین ایتدی ملامت باشلانوب دور زمزمه
غافلوخ بیز بو عمللر حجّت و برهاندیلار
.
.
سعدون اوغلی بیر حسینه باخدی بیرده لشکره
سسلدی ایمدی پوزار آمالمی بو منظره
هاردا دور بس حرمله گلسون سو ویرسون اصغره
امرینه تابع اولانلار مُجری فرماندیلار
.
.
حرمله قویدی کمانه آتدی بیر تیر سه پَر
اوخ کماندان قورتولاندا ویردی اعلان خطر
گوردولر قانه بویاندی آیت قرص قمر
بیر آتا بیرده بالا اَلقانیله الواندیلار
.
.
اهل کوفه بیر سه شعبه تیرله کام آلدیلار
گون اَلینده شامیان مِهری مُحاقه سالدیلار
آی باتوبدی خیمه‌ده اولدوزلار آغلار قالدیلار
اشک چشمیله یوزه خوناب دل ریزاندیلار
.
.
خطِّ سیرین گون دگیشدی واضح اولدی مسئله
آغ لباسین گوردولر الوان ایدوب دور حرمله
آلدیلار نعشین خانملار ویردیلر اَلدن اَله
هر گورن بولدی نجه شام اهلی بی‌ایماندیلار
.
قانلی قونداقین گوروب گلدی اوشاقلار شیونه
بویلانوب باخدی رقیّه سسلدی ایوای منه
دور باجون گوز کاسه‌سنده ساخلیوب دور سو سنه
سوزش قلبه آخان گوز یاشلاری میزاندیلار
.
.
چولقادی ظلمت خیامی لیلة یلدا کیمی
بیر بیره دگدی حرملر محشر کبرا کیمی
سس چکوب اصغر آناسی آغلادی لیلا کیمی
دین یولوندا اکبر و اصغر سوسوز قرباندیلار
.
.
بارالها! لطف ایله اولسون «رجائی» مفتخر
ایلسون یولداشلاریله کربلایه بیر سفر
شاه دین قبرینده اولسونلار عموماً نوحه¬گر
هر کسون بیر دردی وار دور طالب درماندیلار
.
.
.
#اصغریه_شهادت
#حرمله_بیر_ظلم_ائدوبدور_اشقیا_حیراندیلار
#ترکی
.
✍️ #زبدةالاشعار ✍️
.
🆔: @nohe_torki
نظر دهید