اوچ سه پر اوخ
.
✍️ #زبدةالاشعار ✍️
.
🆔: @nohe_torki
.
علیرضا عباسی (احسان تبریزی)
.
حرمله عالمه دولدوردی نوانی اوخولان
نالیه گتدی تمام ارض و سمانی اوخولان
.
کوفه دن عازم اولان وقتیده اول شوم ودغا
قلبیده چکمیشیدی نقش جفانی اوخولان
.
اوچ سه پر اوخ گتیریب کرب وبلایه او دنی
طیّ ائدیب مقصدینه راه خطانی اوخولان
.
کیمه قسمتدی او اوخلار هله معلوم دگیل
یاغدیرار عالمه باران بلانی اوخولان
.
بیر دیلی پاره لیر بیر بوغازی یاره لیر
یاراجاق سجده گه بدر دجانی اوخولان
.
باشلانوب جنگ وجدل یئتدی دم حساسه
تاپدی فرصت اگه بیر قد رسانی اوخولان
.
یولی کج نیتی کج الده کمان کج اوزی کج
ایستیور وورسون او میزان وفانی اوخولان
.
اولین تیرینی پیشانی عباسه ووروب
قان ائدیب دیده ده آغیله قرآنی اوخولان
.
اللری تنده یوخیدی چکه آلنوندان اوخی
اوجیده ووردی کانه او همانی اوخولان
.
شل اولیدی نئجه قان دولدی او حق بین گوزونه
عاجز ایلیبدی یل آل عبانی اوخولان
.
دومین تیرینی بیر طفل لبن خواره ووروب
لرزیه گتدی اودم عرش خدانی اوخولان
.
الی سنسین کی اوخ آتماقدا او چوخ ماهرمیش
هدف ائتسیدی وورارموش او هارانی اوخولان
.
پهلوانین ووروب آلنوندان اولوب بسکه جری
اوینادور الده کمان وئردی ادانی اوخولان
.
هنرین شمر وعمر سعده بئله گوستردی
آتانین ووردی قوجاقنده بالانی اوخولان
.
نرم ونازک بوغازی اوزدی آخوب باشی دالا
درده گتدی دل شاه شهدانی اوخولان
.
بیر اوخی قالدی اگه قدّ رسول اللهی
توکه صحرای غمه خون خدانی اوخولان
.
صولا گه صاغه گئچیب فرصتی سالسون الینه
یاندوروبدی اودل خیر نسانی اوخولان
.
داش دگیب آلنی سنوب قانی آخوب ایستدی تا
یاره لی شاهه وورا بیرده یارانی اوخولان
.
گوزده کی قانی سیله دامنینی آلدی اله
تئز نشان ائتدی دل میر هدانی اوخولان
.
اوخ کماندان قوتاروب سسلدی زهرا بالا وای
نالیه گتدی او دلخسته آنانی اوخولان
.
داغ ودردیله دولان قلبی بولوب اوچ یئره اوخ
سینه ده سندی دئنن کنز معانی اوخولان
.
اوخ نه اوخ اوخلادی عالم اوره گین بیر آندا
دئنن «احسان» او آلوب روح بقانی اوخولان
.
.
#حسینیه_شهادت
#عباسیه_شهادت
#اصغریه_شهادت
#حرمله_عالمه_دولدوردی_نوانی_اوخولان
#ترکی
.
✍️ #زبدةالاشعار ✍️
.
🆔: @nohe_torki
نظر دهید