وداع
.
✍️ زبدة الاشعار ✍️
?: @nohe_torki
.
مرحوم شبخیز
.
حسین آمادۀ درد و مصائب دور باجون زینب
طریق عشقیده هر درده طالب دور باجون زینب
.
مرید سالک عشقم نه باکیم وار ریاضتدن
تحمل ایلرم هر ابتلایه فیض همتدن
دایاننام هر بلاده چیخمارام هرگز طریقتدن
طریقتده آنان زهرایه نایب دور باجون زینب
.
محبت جاده سین سیر ائتماقا مردانیَم قارداش
شرار شمع حسنینده یانان پروانیَم قارداش
ازل گوندن غم و اندوهیله هم خانیَم قارداش
غمه الفت دوتان ام المصائب دور باجون زینب
.
شتابیله بو میدان بلایه سالموسان مرکب
اگر ممکن دی بیر لحظه دایان ای حافظ مذهب
سنه تا آشکار ایلیم اورکده واردی بیر مطلب
بو دم ئوپسون بوغازیندان مناسب دور باجون زینب
.
سن ای پشت و پناهیم ای هامی عالملره سرور
باجون سنسیز بو صحراده قالار بی همدم و یاور
روا قیلما قالایالقیز سنه بیر عمردور آخر
انیس و مونس و یار و مصاحب دور باجون زینب
.
بو صحراده گئدر جاه و جلالیم گر چه یغمایه
ولیکن وئرمرم فرصت اگر ئولسمده اعدایه
مگر قویام ائده دشمن اهانت آل طاهایه
اوزون تک آل طاها دن مراقب دور باجون زینب
.
سپاه کوفه نین فکری مشخص دور جدالیندان
اگر فکر چپاوول گئچسه بو قومونو خیالیندان
خیالون راحت اولسون تا وارام اهل و عیالیندان
نچون آمادۀ هر بیر نوائب دور باجون زینب
.
علیدن ارث دور سهم و صلابت آل اطهاره
مگر زهرا قیزی معجر وئرر بو قوم کفاره
ئولر زینب ولی حاشا وئره فرصت ستمکاره
حریم عصمت کبرایه حاجب دور باجون زینب
.
هراسیم یوخ حوادث سیل اولا داغ تک دایانّام من
دل اعدانی یاندیرام ولی هجرینده یانّام من
اگر مین هنگ اولا لشگر نه باکیم،سهل سانّام من
گورللر عاقبت کفاره غالب دور باجون زینب
.
خیالون اولماسون آشفته اطفال پریشاندان
داغیلسا چوللره گر وحشت بو قوم عدواندان
یغار اطفالیوی بیربیر تلاش ایلر بیاباندان
گوزوندن چوخ اوشاقلاردان مواظب دور باجون زینب
.
بویون قربانیم لطف ائت ئوپوم قارداش رکابیندن
خیامه رجعتون اولماز مشخص دور شتابیندن
دایان بیر ذره آلسون نور حسن آفتابیندن
که اوّلدن او نور حسنه طالب دور باجون زینب
.
سنی یالقیز گوروب قارداش گلوبدور جرعته لشگر
سالوب سن ئولمه میش اهل ولانی وحشته لشگر
ترحم قیل منه سن سیز آچار ال غارته لشگر
بو غربت چولده محصور اجانب دور باجون زینب
.
اولان ای سلسبیل لعلینه آب بقا تشنه
اولوب آل علی نین قانینه اهل جفا تشنه
آخیر سو چوللره اما قالیب آل عبا تشنه
بو بابتدن هراسانِ عواقب دور باجون زینب
.
کسیب دور چاره می لشگر غم و درده گرفتارم
گرک دامان وصلوندن اوزوم ال چونکه ناچارم
ولی ظلم بو لشگردن ائله آشفته افکارم
که قارداش ئولماقا هر لحظه راغب دور باجون زینب
.
اولوب شعری بهانه الده #شبخیز دل افکارون
قویوب دور آستان لطفیوه صدقیله رخسارون
عنایت قیل قبول ایله منه خاطر بو اشعارون
سنون مدّاحیوه محشرده صاحب دور باجون زینب
.
#سبک_علی_اصغر_مه_انور (بیش از 7 سبک)
.
#وداع
#حسین_آماده_درد_و_مصائب_دور_باجون_زینب
#شبخیز
#ترکی
.
✍️ #زبدةالاشعار ✍️
?: @nohe_torki
نظر دهید