زبانحال زینب کبری سلام الله علیها در وانفسای حیات
.
.
#سبک_حسین_جان_گل_علمدارون
#سبک_خداوندا_الیم_بوشدی
.
.
محمد علی مصیبی تبریزی
.
.
حسین جان آز قالور روحیم رواقِ تندن آیریلسون
غروبین وقتی غربتده گولون گولشندن آیریلسون
.
( گوزومده باخ بو اشک آله
گَه گور باجون قالوب نه حاله )
.
.
داشوبدی کاسه عمریم وئرور دست اجل جولان
گل اگلش باشیمین اوسته حضورینده وئروم من جان
منی گل قوی مزار ایچره ئوزون ای ناطق قرآن
اوخی قرآن بو مأواده بو جان مأمندن آیریلسون
.
.
حسین چوخ گویلوم ایستوردی ئورک دردیم دوااولسون
بو آخر دم سنون عطرون یانان قلبه صفااولسون
حسین والله چوخ ایستوردوم مزاریم کربلااولسون
ولی شام اولدی قبریم زینبون تا سندن آیریلسون
.
.
حسینجان باشیم اوسته گل منیم خواراولماسون یاسیم
چاغور گلسین بو ماوایه علیّ اکبر و قاسیم
غریبه بزم اولار گلسه بو بزمه قولسوز عباسیم
ولی کرب وبلا یاسی چتین سوسن دن آیریلسون
.
.
بلا دشتینده گوردوم چوخ فغان و ناله وشیون
سنان و نیزه گوردوم تیغ جوّال و عمودآهن
قالوبدور یادگار اول دشت غمدن قانلی پیراهن
ئوزون گل تا باجون بو قانلی پیراهندن آیریلسون
.
.
غریبین گورماقی غربتده اوجب دور آنام اوغلی
بهار دل اسیر صرصر شب دور آنام اوغلی
حضور یاره عازم ایندی زینب دور آنام اوغلی
یارالی ، گویلومی گل آل ئورک تا سندن آیریلسون
.
.
باجیم اولسیدی غربتده یارالاریمی باغلاردی
آنام بو بزمه گلسیدی من آغلاردیم او آغلاردی
رقیّم بوردا اولسیدی ئورکدن سینه داغلاردی
فلک قویسیدی قویمازدیم رقیّم مندن آیریلسون
.
.
چیخوب یثربدن اولدوق بیز وطن آواره سی قارداش
گلن ووردی گئدن ووردی بیزه دیل یاره سی قارداش
هله اگنیمده واردی یدّی قارداش قاره سی قارداش
فلک قویماز بو قاره، من ئولونجه مندن آیریلسون
.
.
بدندن جان چیخانداگوزباخوب یارآختارار قارداش
یاغار باران کیمی گوزیاشی دلدار آختارار قارداش
گوزوم بو غملی مأواده علمدار آختارار قارداش
دئنن عباسه بیر وقفه چیخوب مدفندن آیریلسون
.
.
بو دنیایه گلندن باشیم اوستونده بلا چوخدور
بوغربت یرده جان وئرماق حسینجان سینمه اوخدور
واریدی یدّی قارداشیم ولی داده چاتان یوخدور
اجل تئز گل کی زینب بی وفا مأمندن آیریلسون
.
.
بو رسم عالم ادنا دی قارداشی اُلن باجی
غریبانه وئرنده جان اولار مینلر غم آماجی
ئوزون گل دفن ائله تااولمیوم من ئوزگه محتاجی
دیز اوسته باشیمی آل مرغ جان مکمندن آیریلسون
.
.
گلیدی کاش آنام زهرا آلیدی گویلومی قارداش
اسیر کربلایه جان چیخان وقته چکیدی باش
نجف دن فاتح خیبر گلیدی باشیم اوسته کاش
شکسته گوهر جانیم یانان مخزن دن آیریلسون
.
.
منم شامین یولوندا قمچی دن جان قورتاران زینب
چوخور بیر یرده داشلار آلتدا یارین آختاران زینب
منم محمللراوستونده ووروب باشین یاران زینب
بو اللی ایلده کیم گوردی باجون شیوندن آیریلسون
.
.
«مُصَیب» نام زینبدن همیشه مشق عشق ایلر
گئجه گوندوز اونون آدین یازان اشعاره مشق ایلر
سرشک چشمینی تقدیم دربار دمشق ایلر
عجب دورعشق زینب تا بو جان وار تندن آیریلسون
.
.
#زینبیه_شهادت
#حسین_جان_آز_قالور_روحیم_رواق_تندن_آیریلسون
#ترکی
#زبدةالاشعار #زینبیه #مصیبی_تبریزی
نظر دهید