جریان امان نامه
.
✍️ #زبدةالاشعار ✍️
.
🆔: @nohe_torki
.
معزی اردبیلی
.
حسین مدارس عشقه بیوک مؤسّس دور
تمام عاشق وارستیه مدرّس دور
.
حکومت ایله مسه عشقی قلب انساندا
نه قدر ثروتی اولسا الینده مفلس دور
.
مقام سیّد العشّاقی إتمین احساس
حقیقتاً اورگی، مغزی روحی بی حس دور
.
میسه وورولسا اگر کیمیا طلایه دونر
ولی وورولماسا مسگر الینده مس، مس دور
.
حسینون عشقیده بیر کیمیادی قلبه دولا
دونر طلایه مس اولسا چون عشقه مونس دور
.
نجه حسین نجه انسان نجه رئوف القلب
مقامینه آپاران غبطه نوح و یونس دور
.
آقام آقام نه آقام شمس برج مهر و وفا
مه منیری عربده اَبوالفَوارس دور
.
کورگی اَننی قولی قوّه لی، قدی رعنا
باخان دیر ایکی چشمانی مثل نرگس دور
.
حسین مکاتبی باغلانمیوبدی، باغلانماز
رئیس دفتری چون حافظ مدارس دور
.
مین اوچ یوز اللی بش ایلدور شهادته یتشوب
مبارک آدی هاچان گلسه زیب مجلس دور
.
.
علینون اوغلیدی باب المرادیدور عبّاس
مقامیده عربستانیده شجاع النّاس
.
.
نمونه اولدی عبادتده زهد و تقواده
سالاردی حیرته بدر تمامی سیماده
.
وفاسی اولدی مقدّم جمال و حسنیندن
همیشه تابع اولوبدور وفایه دنیاده
.
وفاسینون بیلونوب حدّی عصر تاسوعا
قیامت ایلدی خدمتده مرد آزاده
.
انوب خیامه اوگون تلى شمر بدفطرت
الینده نامه سی، گفتاره اولدی آماده
.
دیدی منیم باجیم اوغلانلاری هایاندا قالوب
گتورمیشم من امان نامه وقت دعواده
.
حسین بویوردی اباالفضله شمر گورنه دیور
ایکی الین ایکی گوز اوسته قویدی سقّاده
.
گلوب مقابلینه شمر صحبتی آچدی
امانی ویردی علمداره غملی صحراده
.
دیدی اوخی سنه کُرسیِّ مرتبت یازیلوب
امیر کوفه الیلن ورولمیش امضاده
.
منیم نصیحتمه ویر قولاق صلاحوندور
مقامون آزدی حضور عزیز زهراده
.
الینده نامه نی عبّاس پاره پاره ایدوب
عتابیلن بویوروب شمره ای زنازاده
.
.
توکل ایلمیشم کردگار ذُوالفَرَجه
ئوپوب الیندن امامیمدن آلمیشام درجه
.
.
حسیندی سرور و شاهیم، امین دربارم
خدا نکرده اگر غملی اولسا غمخوارم
.
اسیر عشقی منم، نه اسیر عزت و جاه
بهاسی جان اولا گر عشقینه خریدارم
.
هزار بار اولا، مرجانه اوغلینا لعنت
خیال ایدوب آقاما بی وفا علمدارم
.
حسین قالوبدی منه گوندروب امان نامه
بنی امیه نون ایمانی یوخدی بیزارم
.
یادوندا اولسا ابر مرد جنگ صفّینم
بابام على کیمی وقت جدلده کرّارم
.
شجاع ملک حجازم، حسینچی سربازم
نه قورخورام سپه شامیدن نه فرّارم
.
حسیندی نقطۀ زیبای بای بسم الله
گرامی نقطیه مدّتدی منده پرگارم
.
اجازه یوخدور آقامدان چکم سنه شمشیر
غلام خالص سلطان آل اطهارم
.
گیدک خیامه امام زمانون اللرین ئوپ
کیمی آپارسام اگر التماسه مختارم
.
دیسون باغشلا منی یا حسین باغشلیاجاق
کریمدور کرمیندن ئوزوم خبر دارم
.
.
یولا سالوبدور على أوغلی شمری شرمنده
گلوبدی خیمیه معبودینه گوزل بنده
.
.
امام عالمیان امر ایدوبدور اکبرینه
عموسینی چاغورا خیمه سینده محضرینه
.
جوان ماه دل آرا یولا دوشوب فی الحال
اوزون یتوردی حسینون امیر لشگرینه
.
گلوب بیانه عمو جان بابام سنی ایستور
قونوب غبار محن صورت منوّرینه
.
چاتوبدور عابد صالح امام خیمه سینه
ویروب سلامینی سردار نامی رهبرینه
.
دوزولدی آلننا خجلت تری قباقینده
حسین نظاره ایدوب مرتضایه بنذرینه
.
سنه بویوردی امان نامه کوفه ده یازیلوب
وئروب گتیرمگه مرجانه اوغلی نوکرینه
.
امیر لشگری اولسُون یزید بن سیرین
جدلده امر ایلیرسن تمام افسرینه
.
بولار گلوب منی قتله یتورمگه قارداش
اَوَلده شمر اوزی صیقل وئروبدی خنجرینه
.
بیری اورگیمی اوخلار، بیری کسر الیمی
دولوب بو چولده اولار حربه الده سنگرینه
.
اوزیوی ورطۀ محنتده زحمته سالما
منیله قالسا کیمیم اوخ ورالّا پیکرینه
.
.
دولار سنون اورگون قانیلن مگر گیتسون؟
ملالین قوتارارسان یقین اگر گیتسون
.
.
بلای عرصۀ کرببلانی گورمزسن
بالالاریمدا فغان و نوانی گورمزسن
.
منای عشقه گیدنده گوزللرین گوزلی
دالیجا من توکن اشک روانی گورمزسن
.
بولنده باشینی خنجر یخاندا نیزه و اوخ
ستاره لر کیمی سایسیز یارانی گورمزسن
.
دیزیمون اوسته قویاندا یارالانان باشینی
یوزون ئوپنده دوداقیمده قانی گورمزسن
.
دوتاندا کاکلینی قتلگاهیده جلاد
ئولنده قاسم نو کدخدانی گورمزسن
.
باشین یولاندا سریه جنازه سی اوسته
دیینده وای بالا گریان آنانی گورمزسن
.
بو گیجه صبحه کیمی شیرخواره میز چوبالار
ئولوم حالیندا لب عطشان بالانی گورمزسن
.
قاپی قاپی دولانار قیزلاریم سووا خاطر
اورکده اللری آل عبانی گورمزسن
.
شهید ایده لَّه باجیم زینبون بالالارینی
بدنلرینده کی زخم سنانی گورمزسن
.
منیم کیمی ورولار قلبینه اوغول داغی
گلنده نالیه زهرای ثانی گورمزسن
.
.
دیدی حسینه اباالفضل نامدار و غیور
کمال و خلقووه یوخ من تک عاشق پرشور
.
.
قاپوندا نوکرم ای منبع کرم قووما
عنایتونله منی ساخلا محترم قووما
.
جهان عشقیده بیر یول سنه آقا دیمیشم
ئولونجه محضر پاکونده نوکرم قووما
.
سنون آنووین ایوینده آنام شرفلندی
منم محافظ کاشانه و حرم قووما
.
بابام منی سنه نوکر ویروبدی ماه صیام
همیشه تابع فرمان حیدرم قووما
.
علمووی آل الیمدن ولی جواب ایتمه
دیوم سپاهیده بیر ساده افسرم قووما
.
قاپوا دوز گلوب هر کیم تاپوبدور عز و شرف
سنون قاپوندا شرفلی دلاورم قووما
.
شرافتین ویرر الدن قاچان حضوروندن
قسم رقیّووه قؤسوندا گیتمرم قووما
.
سِنا او اللرى یازدی منه امان نامه
نه قدری منده بیلورسن مکدّرم قووما
.
او تاندیروب منی شمرون یوزی قرا اولسون
مقابلونده پریشان و مضطرم قووما
.
دوشوم قدملرینه اکبرون باغیشلا منی
دیوم بو باره ده مدیون اکبرم قووما
.
.
حسین اورکدن ایدوبدور دعا اباالفضله
یوزوندن توپدی دیدی مرحبا اباالفضله
.
.
دیدی مگر غمووه تاجدارووم دوزرم؟
آنام گورر نجه من اشکبارووم دوزرم
.
دیدی قلم اولونار قولارون نیستاندا
دیدی سنه گوره دور جان نثارووم دوزرم
.
دیدی ورالار اوخی مشکووه سویی جالانار
دیدی نه اولسا اولوب ریزه خوارووم دوزرم
.
دیدی باشووا دگر قتلگهده آهن عمود
دیدی علیدن آقا یادگارووم دوزرم
.
دیدی ورار سنه دل یاره سی عدولردن
دیدی اورک یانار اما نگارووم دوزرم
.
دیدی گوزل گوزووه قتلگهده صدمه دگر
دیدی همان گوزولن انتظارووم دوزرم
.
دیدی مبارک اولان آلنوا دگر پیکان
دیدی چون عشقیدن هر آن خمارووم دوزوم
.
دیدی دیزونلن أُوخی ردّ ایدرسن آلنوندان
دیدی من عاشق بی اختیارووم دوزرم
.
دیدی گوزووه دولار قان قباقی گورمزسن
دیدی قیامیده خدمتگزارووم دوزوم
.
دیدی باشووی کسللر مناده قربان تک
دیدی فدای خود کردگارووم دوزرم
.
.
«معزّی» اولدی حسینه وفاسی عبّاسون
سنه ده گلدی مبارک عطاسی عبّاسون
.
.
#امان_نامه #معزی_اردبیلی
#عباسیه_شهادت
#حسین_مدارس_عشقه_بیوک_مؤسس_دور
#ترکی
.
✍️ #زبدةالاشعار ✍️
.
🆔: @nohe_torki
نظر دهید