احوالات امام سجاد (ع)
.
✍️ #زبدةالاشعار ✍️
.
?: @nohe_torki
.
مرحوم تائب تبریزی
.
.
حضرت سجاد قرخ ایل شادوخندان اولمادی
دردینه جز درد دین بیر اوزگه درمان اولمادی
.
.
کربلاده کربلانین گوردی عاشورا سینی
فاطمه اوغلی حسینین محشر کبراسینی
قانه غرق اولموشلاری پر موج قان دریاسینی
سانما احساساتی دریا تک خروشان اولمادی
.
.
بیرطرف قانلار سپیلدی ایتدی گلگون داشلاری
بیرطرف جام شهادت نوش ایدوب یولداشلاری
بیر طرفده قانینه غلطان دوشوب قارداشلاری
ایلدی حسرت اولار تک قانه غلطان اولمادی
.
.
ایتدی اقبال شهادت دین یولوندا اهل دین
چاتدیلار بو فیضه یتمیش بیر نفر مرد آفرین
اولدی بیله فیضدن محروم فخر الساجدین
چوخ چتین گلدی اونا بو امر آسان اولمادی
.
.
بیرطرف فیض شهادتدن اولوبدی بی نصیب
دردی درد اوسته گلوب نه بیر دوا نه بیر طبیب
دور و بر بی شرم دشمن ایل اوزاق قالموش غریب
دردینه جز درد دین بیر اوزگه درمان اولمادی
.
.
چوخ سوَردی توپراقا دین اوسته قانی آخماقی
سرخ رو قان ایچره قانین چهر دینه یاخماقی
چون چتین گلدی دوروب جنگاهه ساکت باخماقی
حیف خستیدی قیامه اوندا امکان اولمادی
.
.
گوردی دشمنلر نجه قلب بتولی اویدولار
قزلاری نه وضعیله غارت گونونده سویدولار
چوللره یانمیش چادرلاردان چخوب یوز قویدولار
هامّی قاچدی سانما بیر فردی گریزان اولمادی
.
.
خیمه گاه دین یاناندا دوندی شامه گوندوزی
ایستدی بوگیروداری گورمه سین حق بین گوزی
امر ایدوب قاچدی هامی قالدی یانار اوددا اوزی
عمه سی اوددان چخاتدی اوددا سوزان اولمادی
.
.
گوردی قان دریاده غرق اولموش یارالی نوحینی
سو یانیندا تاپدی دینین کشتی مطروحینی
ویرمدی الدن گنه روحیۀ پر روحینی
ظاهرا پوزقون ولی باطنده پژمان اولمادی
.
.
خاک و خونیله هم آغوش اولدی جانبازان دین
قالدیلار بی سراو خونین چولده سربازان دین
سرفراز اولدی جدالرده سرافرازان دین
گوردی بو حالی گنه دل صبری تالان اولمادی
.
.
گوردی غوغائیله دولموش سرزمین کربلا
قتل عامیله اولوب خاموش مطلق برملا
هر طرف آچمیش گل سرخ شهادت جابجا
سانما سونلار کربلا دینی گلستان اولمادی
.
.
دور ایدوب هربلبل شوریده بیر گل باشینه
هر آنا اوغلون تاپوب ویردی خبر گوزیاشینه
هربالا اوخشار آتایه هرباجی قارداشینه
نینوا دشتی نواسیزبی نواخوان اولمادی
.
.
خون طاها وعلی و خون زهرا و حسین
رگ لرینده جابجا جاری حسینه نور عین
ترک ایدوب قانلو بیابانی امام نشأتین
بو حیاتی مرگدن واقعده آسان اولمادی
.
.
بیر طرفدن دست بسته دل شکسته قلبی پاک
بیر طرفدن وار قاباقدا سرنوشت هولناک
قرخا دین همره یتیم داغ دیده سینه چاک
سانما بو مولا اوزی جزه اسیران اولمادی
.
.
نه اسارت قید کین قوللاردا گوزده اشگ تر
بیر حیات مرگبار و محنت افزا بیر سفر
نه سفرآدی سفر باشدان باشا خوف و خطر
بو اسارتده اونا امنیت جان اولمادی
.
.
نه سفر دوشموش یول اوسته چوخ غم آور شهرلر
هر طرف اهل جنایات خِفا و جَهرلر
طعن بیگانه شماتت لر عتاب و قهرلر
روبرو وحشی لر اونلان اولدی انسان اولمادی
.
.
کوفه شهرین دولدوروب باشدان باشا جوش و خروش
روبرو حقی دانان دنیاپرست وخود فروش
قول قونادسیز قوش کیمی آل پیمبر سربدوش
کیم دیر قلب شریفی غنچه تک قان اولمادی
.
.
ناقۀ عریان لار اوسته پیکر تبداریله
روبرو ایله آییلماز یوخلیَن افکاریله
یوخلیَن خلقی اویاتدی آتشین گفتاریله
اولمیه بیدار او گون روشن مسلمان اولمادی
.
.
نقطۀ پرگار ایمان اهل کفره دستگیره
شیریدی روباه لر مکریله ایتمیشدی اسیر
بسته زنجیر اولا عار ایلمز شیر اوغلی شیر
دوزدی زنجیره قولی باغلی پریشان اولمادی
.
.
ویرمدی روحیه سین الدن امام دادخواه
گوردی تهدیدات خصمی خسرو اقلیم جاه
دشمنه دشمن لر ایچره ووردی ضربه گاه گاه
اوز وقارین ساخلادی پابند خذلان اولمادی
.
.
مجلس ابن زیاده گیتدی قولدا قید کین
قتلینه شمشیر کینه چکسدی جلاد لعین
وقرینی سندیرمادی اول حجت روی زمین
ذره جه دین اوسته اؤلماقدان هر اسان اولمادی
.
.
اوتدان الهام آلدی زینب بانوی مهدِ وقار
ویردی فرمان دوردی آل الله یریندن بیقرار
آلدیلار جلاد الیندن عابدی پوزقون قطار
عابدین قتلینده اجرا قانلو فرمان اولمادی
.
.
کوفه ده دللرده قویدی انقلابی بیر اثر
پای تخت آل هنده باغلادی بار سفر
وارد اولجاق گوردی نه شامات یکسر شور و شر
اؤلدوره روحیه سین بو وضع عنوان اولمادی
.
.
چوخ چتین گلدی اونا شام جفا هنگامه سی
دلخراش اولدی اونون شاماتده برنامه سی
باشینه اود یاغدیراندا دوتدی اود عمامه سی
قوللاری باغلیدی خاموش ایتسون امکان اولمادی
.
.
چوخ جفا شام ایچره گوردی فرقۀ بیداددن
چوخ شماتتلر ایشیتدی قوم بد بنیاددن
بارها قورتولدی شَرِّ قان توکن جلاددن
استقامتله دایاندی حالی پژمان اولمادی
.
.
درد و رنجه آشنا ایتدی اونی بیگانه لر
گه یری زندان اولوب گه گوشۀ ویرانه لر
شمع تک دورین آلوب پرسوخته پروانه لر
ایله هیچ پروانیه شمع شبستان اولمادی
.
.
اول شهه قزلارباخاردی او باخاردی قزلارا
سینه دن قزلار یارالی بو اوزی دلده یارا
پیشوای دین گیدوب دین اوسته گور هاردان هارا
غیر ویرانه اونا بیر جای اسکان اولمادی
.
.
ویرمدی سُستی نشان مشروع اقداماتده
دشمنی سندیردی یخدی طرز تبلیغاتده
وقردن سالدی یزیدی مسجد شاماتده
منبرینده کیم دیرمحشرنمایان اولمادی
.
.
منبرینده واقعا محشر نمایان ایلدی
خلقی ووردی بیر بیره افکاری حیران ایلدی
زادۀ هندی ایله رسوای دوران ایلدی
هیچ کیم عالمده ایله رسوای دوران اولمادی
.
.
خلقه بولدوردی حسین ابن علی شخصیّتین
قویدی هر بیر دلده تاثیرات حقّانیّتین
ایلدی اثبات او شاهین حق موجودیّتین
هیچ موجودیت ایله خلقه اعلان اولمادی
.
.
ایتدی شاماتی مُسَخَّر خسرو والا تبار
بیر سه ساله قز ایدوب مدفون او یرده دلفگار
قبری اوسته ووردی بیر پرچم حسینه یادگار
یعنی حاکیدور بو پرچم حقّ کتمان اولمادی
.
.
باشدا بیر یاسلی عزالی کاروان دلسوخته
ظاهراً اولموش عزا رختی او جمعه دوخته
امتحاندان باطناً چخموش تمام آموخته
ایلدی عزم وطن آرام بیر آن اولمادی
.
.
نچّه ایل عمر ایلدی عمرینده سینه داغلادی
هاردا گوردی بیرقویون ذبح ایلیوللرآغلادی
سویلدی سو ویرمیسیز اشگین عذاره باغلادی
یعنی مظلوم اوز بابام تک اوزگه انسان اولمادی
.
.
گون ایوینده یخدیلاراشرار شام ئولدوردولر
ظلمیله گوندوز گوزی قوم ظلام ئولدوردولر
ویرمیوب سو سویانیندا تشنه کام ئولدوردولر
قانینه غلطان بابام تک هیچ بیر عطشان اولمادی
.
.
یاد اولور عطشان بابام هاردا دوشنده سو سوزی
آب حیوان صاحبیدی تشنه جان ویردی اوزی
جان ویروب حسرتله نهر اوسته سود قالدی گوزی
بس ندن آب فرات بی وفا قان اولمادی
.
.
چون بابام دل داغلی جان ویرمیش اودور دل داغلارام
داغلی قلبیم اودلانار اشگی عذاره باغلارام
اغلاماقدان دویمارام تا جاندا وار جان آغلارام
نیلیوم جز آغلاماق بو درده درمان اولمادی
.
.
آغلادی گوز یاشینی ائتدی مُبَدَّل قان یاشا
وا اَبَاالعَطشان سسی اوج ایتدی دوشدی داغ داشا
ویردی بو منوالیله اوز گونلرین عمرین باشا
حسرت اوندان بر طرف بیر لحظه بیر آن اولمادی
.
.
ویردی فخرالساجدین پایانه اوز پیمانینی
پشت سرده قویدی عمرینده داخی دورانینی
جان ویروب جانانینه قورتاردی غمدن جانینی
ویردی جان نسگل لر عالمده نسیان اولمادی
.
.
ویردی غسلین باقرآل محمد باغریقان
باشلادی روضه اوزی اولدی امامه روضه خوان
آلدیلار اطرافینی شوریله سانسیز نوحه خوان
ماتمی بی روضه خوان و بی نوا خوان اولمادی
.
.
ای صبا ایله گذر کرب و بلا صحراسینه
دی حسینه بیر علم ویرسون سوسوز سقاسینه
ماتم سجاددور گلسونله باهم یاسینه
اوغلونی گورسونله بی شام غریبان اولمادی
.
.
«تائبا» شاگرد آلار درسین گوزل استاددن
سنده آل درس شهامت حضرت سجاددن
گیت او یولدا ایله برخورداراوزون ارشاددن
دوتدی هر کس بو یولی گیتدی پشیمان اولمادی
.
#سجادیه_شهادت
#حضرت_سجاد_قرخ_ایل_شاد_و_خندان_اولمادی
#تائب_تبریزی
#ترکی
.
✍️ #زبدةالاشعار ✍️
.
?: @nohe_torki
نظر دهید