حق ایستدی بیر نوعیله دفع محن ایتسون

دفن شهدای کربلا
.
✍️ زبدة الاشعار ✍️

?: @nohe_torki
.
مرحوم صافی تبریزی

حق ایستدی بیر نوعیله دفع محن ایتسون
امر ایلدی سجاده حسینه کفن ایتسون
.

آرامینی سجادین آلوب حکم الهی
یتدی فلک اعظمه فریادیله آهی
یاندوردی حسینون یارالی باشی او شاهی
ایستردی گَتورسون اونی الحاق تن ایتسون
.

الهامیله سجاده یتیشدی بو کنایه
قویدی اسرانی، ولی تاپشوردی خدایه
بیر طرفة العین ایچره گلوب کرب و بلایه
تا سیر گل و سنبل و سرو و چمن ایتسون
.

گوردی که عجب طوریدی، افلاکه چخار نور
ربی ارنی سویلدی اول خسته و رنجور
گوستردی حسینین بدنین ایتمدی مستور
چون ایستمدی حق که مخاطب به لن ایتسون
.

بیر باخماقیله عالم اسرار غیوبات
بولدی او مجاهدلر ایدوب یاخشی مواسات
جاناندان آلوب نعمت وصلیله مجازات
ممکن دگی بیر جمعه بیله انجمن ایتسون
.

هم ناله اولوب اهل قبیله او دلیله
بیر قبر قازوب تاج سر آل خلیله
مدفون ایده گلمیشدی حسینی اوز الیله
ایلردی تفکر کفن آیا ندن ایتسون
.

اول جمع که محکومیدیلر حکم اسیره
بیر اوزگه کفن تاپمادیلار باشسیز امیره
آخِر باباسین چولقادی بیر پاره حصیره
زهرا یری وار جنتی بیت الحزن ایتسون
.

قویدی اوزی قبره ولی قبر اوستین او ساعت
یازدی بو حسیندور باباسی ختم رسالت
محبوب علیدور، اوزی مقتول محبت
بو شرعیده کیمدور بیله رفع فتن ایتسون
.

پیغمبرین اوغلی دیمم آسوده ویروب جان
ئولدوردی رعایاسی اونی جائع و عطشان
قالدی یارالی اوچ گونه تک پیکری عریان
تا شرعی ملبس به لباس حسن ایتسون
.

الله قانیدور ناحق آخان قانی بو چولده
خوشنود ایلیوب حضرت سبحانی بو چولده
انی دیته دولدوروب هر یانی بو چولده
بو قانی طلب وعده ویروب ذوالمنن ایتسون
.

قارداشینه باخجاق دوتوب اود نالیه گلدی
گوردی ایاقی آتدا قویولماقی گوزلدی
بیر اکبریله مرقد شش گوشه دوزلدی
تا حشره کیمی آه و فغان هر گورن ایتسون
.

مدفون ایلدی اصغریده گوز قاباقیندا
اولسون آتاسی حشره گَلنده قوجاقیندا
وار ایمدیده آثار عطش گل دوداقیندا
آند اولسون او بیماره که گلدی کفن ایتسون
.

دقتله باخاردی قالان ابدان شریفه
ازبس یارا دگمیشدی او اجسام لطیفه
شیرازه دن اولموشدولا مانند صحیفه
تا این که ثبوت حقی فاش و علن ایتسون
.

مستغنی گوروندی هامی اقسام حللدن
اولموشدیلا باش ویرماقیله دل خوش ازلدن
گیچمیشدیله بعضی همی باشدان، همی الدن
اونلار کیمی کیمدور ایله ترک وطن ایتسون
.

مین حسرتیله پاره بدن قاسمه باخدی
جان محنتیله دولدی، گوگل آتشه یاخدی
قانیله یاخوب گوردی حنا، گوز یاشی آخدی
بو غمده گرک ناله امام حسن ایتسون
.

دفن ایتدی حسینون قوجا اصحابی حبیبی
شه درگهینه ایلدی دربان او غریبی
باخ شانه که بیمار آدی، مین درد طبیبی
ایستر که اوزین زائر بیر ممتحن ایتسون
.

بولموشدی چون اول واقف اسرار حسینی
معدوم گرک اولمیه آثار حسینی
بیر قبریده قویدی هامی انصار حسینی
بولسونله نه حکم ایسته سه شاه زمن ایتسون
.

عرض ایتدیله سجاده او بیر دسته وفادار
چوخ غصه لی سن، یوخسا گینه یرده قالان وار
فریاده گلوب سویلدی بیر قالدی علمدار
حیران منی آز قالدی او قولسوز بدن ایتسون
.

ای اهل قبیله داخی دورمون، گلون آخِر
اینجیر عموم عبّاس دیمم دینجلون آخِر
بولمم ندی اجری او کسیلمیش الین آخِر
محشرده اگر ایسته سه اخذ ثمن ایتسون
.

سقا بدنین اولدولا جویا هامی باهم
بیر یرده یتوب تاپدیلا شمشاد قدین خم
کیمدور دیدی سن تک شهدادن ئوله یاعم
اوز توپراقینی، قانی عقیق یمن ایتسون
.

عباس نه عباس دوشوب سرم سمن تک
اوخدان بدنی گل لر آچوب صحن چمن تک
سسلندی امام اول قد موزونی گورن تک
انصاف اوزی اوز ظلمینه چرخ کهن ایتسون
.

قبری یارالی نعشی دوشن یرده قازیلدی
دفن اولدی عموسی اوزی قبر اوسته یازیلدی
آز قالدی اولا مین اوچوز ایل سانما آز ایلدی
هر یرده گرک ناله اونا مرد و زن ایتسون
.

نه سریدی بولمم بو که فاش اولدی امامه
گَلدی شهدا نعشلری اوسته سلامه
بیر اَل که او گون خیری یتوب حرّه، غلامه
شمره نه روادور اونی بند رسن ایتسون
.

#صافی سنی ارشاد ایلیوب مرشد کامل
واضحدی که تایید حسینی دگی باطل
هر شاعره دل صاحبی بیر نوع ویروب دل
ممکن دگی هر کس بیله نظم سخن ایتسون
.

#سبک_ای_باد_صبا … بیش از 7 سبک

.
#دفن_شهدا
#حق_ایستدی_بیر_نوعیله_دفع_محن_ایتسون
#صافی_تبریزی
#ترکی
.
✍️ #زبدةالاشعار ✍️

?: @nohe_torki