زبدةالاشعار

حمد لله نوبهار اولدی به توفیق خدا #غدیریه_دلریش

در حالات غدیر خم و مدح امیرالمؤمنین (ع)
.
.
.
.
.
مرحوم دلریش
.
حمد لله نوبهار اولدی به توفیق خدا
قدرتین ائتدی عیان اول قادر قدرت نما
.
ابر نیسان چشم عاشق تک توکر گلزاره اشک
مهرلر جاری اولور چون چشمه آب بقا
.
دانه لر خاک مذلتدن اوزین ایلوب کنار
گییدی صحرا و چمن یكسر زمرددن قبا
.
شاهد غنچه آچوب یاران گینه بند نقاب
روضه خلد برین تک گلشن اولموش دلفزا
.
باغ جنت تک آچیلمیش جمله گللر رنگ رنگ
چون گئدوب آثار دی گلزار اولوبدور غم فزا
.
چشم نرگس چشم مست یار تک بیدار اولوب
لالۀ حمرا الینده جام می ایلر صدا
.
عندلیبان چمن آچمیش زبان مین شوریلن
قمریلر کوکو زنان شام و سحر صبح و مسا
.
هر گل اوز محبوبینی گلشنده یاد ایلر گینه
ضیمران و نسترن اولموش غریبه دلربا
.
سوسن و شب بو گل مرجان قوروب بیر بزم عیش
یاس باتمیش یاسه بو عشرتده یاران برملا
.
زنبق و نیلوفر وهم عطر گل گلزار آرا
اولموش عشرت خیز ایلَر لَر عجب نشو و نما
.
رحمت حق دمبدم گوگدن نزول ایلر یره
موسم عشرت دی چون عالم اولوب غمدن رها
.
نغمۀ جاء الحق اولموش هر طرفدن آشکار
هاتف غیبی دمادم غیبیدن ایلر ندا
.
ایّها الغافل بو عشرتده اویان بیر خوابیدن
گور سنه نه فیض عظمی ایلیوب خالق عطا
.
زنگ ظلمتدن اولوب آیینۀ اسلام پاک
اگلشوب تخت خلافتده بو گون شیر خدا
.
فرقۀ ناجی اولوب یکسر بو گون غمدن خلاص
دوزخه اولموش روان اول اوچ لعین بی حیا
.
دین حق ظاهر اولوب بیداق کفر اولموش نگون
تاج بلّغ چون قویوب باشه ولیّ کبریا
.
گورمیوب بیر بیله #عید اصلا به چشم روزگار
غمزدادور جانفزادور دلگشادور دلگشا
.
کفر اولوب باطل ائدوب شامل خدا لطفین بیزه
شیعه نون تاپموش بو عیدیله گوزی نور و ضیا
.
بحر حیرتده قالوب سرگشته غوّاص خیال
عالمون جانی اولا بو صاحب عیده فدا
.
بیر زمان گوش ائت منه ای شیعه مسرور اولگیلان
بو آیون مثلینده بطحادن او ختم انبیا
.
مكّیه اولدی مشرّف جملۀ اصحابیلن
ایلدی اول رحمةً لِلعالمین حج الودا
.
قویدی یوز بطحایه یولدا جبرئیل ائتدی نزول
یامحمد امر ائدوب اول خالق ارض و سما
.
ایلسون شأن ولینی ایندی خلقه آشکار
ظاهر اولسون خلق ایچینده شأن شاه اولیا
.
چون ولایت اولماسا اولماز رسالت برقرار
دین حق بونان اولور کامل یقین یا مصطفی
.
چون ائشیتدی بو پیامی اول شه دنیا و دین
امر ائدوب اصحابه دوشدی تیده اول پیشوا
.
قوردیلار بیر منبری اشتر جهازیندن او دم
چیخدی منبر اوستینه اول منبع جود و سخا
.
گوتدی ال اوستینه مولانی او مولای جهان
اول قدر قالخیزدی گوردی خلق جمله برملا
.
سویلدی من هر کیمون مولاسیم مولاسیدور
بو امیرالمؤمنین بی شک و بی چون و چرا
.
ایلیه هر کیم بونی انکار ائدوب انکار حق
جانشینیمدور وزیریم دور بو شاه لافتا
.
ذرّه جه اولسا على مهری اگر هر سینه ده
نار دوزخدن اونون پرواسی یوخ روز جزا
.
دوتدی هر کیم دامن مولانی اولدی سرفراز
اسمی بیر اکسیر دور اولماز بو نوعی کیمیا
.
وصف ائدوب قرآنده خالق بو مولانی ازل
وصف ائدنمز شمهای گر واصف اولسا ماسوا
.
آیه به آیه علی اوصافی دور قرآن تمام
سویلمه منکر گلوب یالقوز بو شاهه انّما
.
دورت کتابی بول تلاوت ایلدی پیغمبره
عین مولودینده ازبردن بو شاه اولیا
.
عقل قاصردور سنون وصفونده یا شاه نجف
لیک ال چکمک گینه مدحوندن امریدور خطا
.
چون مبارک اسمیوون عاشقلره وار جذبه سی
ذکر اولان وقته چکر گویا که گاهی کهربا
.
چون مسمّی دور آدون اسم خدائیلن سنون
اول سبب دندور اولوب آدون بئله مشگل گشا
.
دوشدی انشادن قلم آز قالدی دفتر اودلانا
یادیمه دوشدی بو سؤزدن داستان کربلا
.
هاردا قالمیشدون او گون اوغلون حسین تشنه لب
قالدی میدان بلاده بیکس و بی اقربا
.
قویدی خنجر حنجرینه شمر کافر ظلمیلن
کسدی باشین یاعلی اولدی ذبیحة من قفا
.
سو کنارینده سوسوز ئولدوردیلر اولادینی
انتقام بدر آلوب اوغلون حسیندن اشقیا
.
طوی دوتاندا قاسمه باتدی قرایه نوعروس
قاسمون گل دستینه یاخدی عدو قاندان حنا
.
فرقت اكبرده لیلى اولدی مجنون یاعلی
قوملار اوسته قالدی بی سر اول جوان مه لقا
.
آخدى قان جسم حسیندن چشمۀ زمزم کیمی
روز عاشورا اولوب کوه منا کرب و بلا
.
خاک و خون ایچره یاتوب یتمیش ایکی باشسیز بدن
کسدی اوغلون اللرینی ساربان پور جفا
.
ووردیلار اود خیمه گاهه کوفیان کینه جو
اولدی شاه کربلا اول چولده محروق الجنا
.
باغلادیلار قول قولا آل رسولی صبح و شام
ایلدیلر عاقبت ظلمیله مسبیّاً النّسا
.
شمر فرصت وئرمدی زینب حسینه آغلاسون
چکدی نه محنت گورون اول زینب بخت قرا
.
نه مروّت دور گئده بزم یزیده شیعه لر
قول قولا باغلى تماماً دیده نم آل عبا
.
حجة اللهون آدین قویدیلا یاران خارجی
یتدی آل حیدره شام ایچره هر نوعی بلا
.
ایستدیلر شامیان ظلمیله کلثومی کنیز
ائتمدیلر حشرده ختم پیمبردن حیا
حشره دین یازسا قلم یتمز تمامه ظلم شام
یتدی اوردا اهلبیته محنت بی انتها
.
وار حیاتون یاز على مدحینی «دلریش» ائتمه غم
بیتیوه بیر بیت خالق بول یقین ایلر عطا
.
#حمد_لله_نوبهار_اولدی_به_توفیق_خدا
#ترکی #حیدریه #غدیریه
#زبدةالاشعار

متن پیشنهادی:  بسترمرگیده بوگون خاتم الانبیا یاتوب #پیامبراسلام_تفاخری_اردبیلی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی