داستان کریمخان زند و نوکر
گریز به حالات حضرت علی اصغر (ع) و زبانحال حضرت رباب (س)
.
✍️ زبدة الاشعار ✍️
?: @nohe_torki
.
احسان بدرخانی
.
خالقین گور نجه الطافی وار اوز بنده سینه
یول قویوب بنده لرین نادم شرمنده سینه
.
.
بشرین عشقینه بووسعت دنیا یارانوب
بشرین خلقتی بی نقصیدی زیبایارانوب
هر ندن جنس بشر افضل و اولا یارانوب
بشرین شأنینه باخ فاخر اولوبدور ملکه
دوز تلاش ایلسه انسان یتیشر نُه فلکه
.
.
خالقین قدرتی وار هر نیی ایجاد ائله سین
یا که بیر لحظه ده بو یر گوگی بر باد ائله سین
بلی وار قدرتی ویرانه نی آباد ائله سین
یر گوگون اهلی اونون سلطۀ فرمانینده
بیوروب خلقه همین مطلبی قرآنینده
.
.
ایستیه ناری گلستان ائلیه ایلیه جک
شهی مانندفقیران ائلیه ایلیه جک
ایستیه نوکری سلطان ائلیه ایلیه جک
ایستیه هر کیمه عزّت ویره عزّت ویرجک
یا که هر کیمسیه ذلّت ویره ذلّت ویرجک (1)
.
.
بیر حکایت یازیرام دفتره روشندی هدف
مثل آیینه دی انسانلارا تاریخ سلف
اوخیوب عبرت آلان سیر ایدر اللهه طرف
ایتدی منبرده بوعنوانی بیان «توفیقی»
ویرسون الله اونا عقباده جنان توفیقی
.
.
یازیر اخباری یازان صفحۀ اخبارینده
بیر کریم آدلی کیشی زندیه دربارینده
واریدی عشق علی چون دل بیدارینده
گر چه بیر نوکریدی خالقه دوز بندیدی
هامی جوینده ده اولسیدی او یابندیدی
.
.
بیر گونی شاه کریمخان چاغیروب نوکرینی
دیدی نوکر سو توکه تا که یووا اللرینی
گلدی نوکرده اودم راضی ایدوب سرورینی
موبه مو شاه کریمخان سوزون اجرا ائلدی
گیدوب اوّلکی یرینده گینه سکنا ائلدی
.
.
دیدی یارب بو کریم منده کریم سنده کریم
سن برازنده کریمسن ولی بو بنده کریم
منده که سن بلیسن نادم و شرمنده کریم
عمرومون گرچه گیجه گوندوزی بی حاصله دی
آرامیزدا ولی یردن گوگه تک فاصله دی
.
.
ایرانین ملکینی یکسر بونا بذل ایلمیسن
یر اوزینده بونی سن صاحب فضل ایلمیسن
منی امّا بیله بیر فضلیدن عزل ایلمیسن
بیلوسن بو سوزوم از روی صداقتدندی؟
ایستورم من بیلم آیا بو عدالتدندی؟
.
.
ایشیدوب نوکرینون شِکوَه لرین شاه زمن
بیله بیلّم دیدی قلبونده سوزون وار دیه سن
فاش ایله هر نه که قلبونده وارون درد و محن
سرّیوی فاش ائلسون دردیوه درمان ایدرم
سویله قلبونده اولان مشکلی آسان ایدرم
.
.
قورخا قورخا دیدی نوکر او شهه حاجتینی
او دیدی شکوه سین آرتیردی شهین حیرتینی
نظره آلدی اونون ایلدیگی خدمتینی
کرمین کاسه سی داشدی توکولوب سئللندی
ویردی بیر هدیه همان نوکره شاه زندی
.
.
آلدی نوکر صله سین حمد ائلیوب اللهه
ایلیوب عرض ادب آل رسول اللهه
صورا تعظیم ائلیوب محضر شاهنشاهه
دیدی الله سنه بذل ایلسین اون مین عوضین
پولوموش مرحم هر درد و دواسیز مرضین
.
.
نچه گوندن صورا شاه ایستدی اوز نوکرینی
گلدی نوکرده قویوب سینه سینه اللرینی
رسم تعظیم زمانیله اگوبدور سرینی
دیدی امر ایله نه امر ایلسون اجرا ایدرم
ایسته سون هر نه حضورونده مهیا ایدرم
.
.
شه دیدی هانسی کریم صاحب رجحاندی سنه
من کریم یا او کریم دهریده جاناندی سنه
دی گوروم هانسیمیزین لطفی فراواندی سنه
گر جوابین بو سوزون عین حقیقت دئمسون
آلارام ویردیگیمی پاسخ مثبت دئمسون
.
.
گوردی نوکر دیسه سن یاخشیسان آلله قالاجاخ
خالقی وصف ائلسه شه یره غوغا سالاجاخ
ویردیگی هدیه نیده جبریلن اوندان آلاجاخ
دیدی یارب گورورم غایت قدرتده سنی
دوز جواب عرض ایدورم سنده ملول ایتمه منی
.
.
دیله گلدی او زمان نوکر خوشبخت زمان
دیدی او یاخشی کریمدی بونا یوخ جای بیان
مهرباندور آتادان هم آنادان لطفی عیان
او کریم بنده سینی توش ائلمز گوز یاشینا
دهریده هر نه ویره بیر کسه چالماز باشینا
.
.
ولی سن زندگینون عاقبتین یوخ گوروسن
اودی بیر هدیه نی اوز نوکرووه چوخ گروسن
گوز قباقینده بو ارزان صله نی چوخ گوروسن
سن اوزون ایله قضاوت دیدیگیم عنوانه
مین کریم آدلی گور آیا یتیشر سبحانه؟
.
.
پوزدی شاهین حالینی نوکرینون گفتاری
قویدی حیرتده تمام اوردا اولان حضاری
دیدیلر ایندی ندور نوکریلن رفتاری
ایستدی محضرینه فوری قلم کاغذ امیر
یازدی بیر حکم همان نوکرینی ایتدی وزیر
.
.
بس خدا نوکری سلطان ائلیه ایلیجک
شهی مانند فقیران ائلیه ایلیجک
ایستیه موری سلیمان ائلیه ایلیجک
ایستیه هر کیمه عزّت ویره عزّت ویرجک
یا که هر کیمسیه ذلّت ویره ذلّت ویرجک (1)
.
.
گرچه بو واقعه لر ساده حکایتدی بیزه
ولی هرجمله سی بیر پند نصیحتدی بیزه
کل تاریخ سلف مایۀ عبرتدی بیزه
بیر گوزل جمله دیوب اوغلونا لقمان زمان
یعنی آلسین گرگ انسان ادب از بی ادبان
.
.
بنده گر خالقه یوز دوندره آزاده یاشار
ال چکر ثروت بی حاصله دن ساده یاشار
دوز بشر شاه شهیدان کیمی دنیاده یاشار
کسدیلر باشین اسیرایلدیلر عترتینی
قویمادی مسنده خاطرگئده حیثیتینی
.
.
یار و انصاری ئولوب عرصه ده تک قالدی حسین
خیردا رزمنده سین آغوشه اودم آلدی حسین
ولی اصغر آناسین درد و غمه سالدی حسین
گتدی میدانه دئدی یوخدی گناهی بالامین
سوسوزوندان گئدوری گوگلره آهی بالامین
.
.
باخون الله دیینه تابع قرآنسوز اگر
ساتمیون دینوزی دنیایه مسلمانسوز اگر
قویمیون بوبالا عطشان قالا انسانسوزاگر
اوندا سعد اوغلی اشاریله دئدی حرملیه
تا که بیر نحویله بو مسئله نی حل ائلیه
.
.
حرمله کچدی اودم صفلر ایچیندن قاباقا
باخدی دقتله ال اوستونده اودسیز اوشاقا
آتدی بیرتیر سه پر دگدی اوعطشان قوناقا
کاسه صبرحسینی اوستمگر جالادی
نجه اوخ دیلسیز اوشاقین بوغازین پارچالادی
.
.
آتا گوردی قیریلوبدور بالانون شاه رگی
چرپنور سینه ده بیر یاره لی قوش تک اورگی
سارالوب رنگی گل لالیه بنذور بلگی
دئدی یارب بو بالا تابع فرمانوندی
اصغر قانی دگول بو سنون اوز قانوندی
.
.
بواوخون بیر تایی علقمده دگوب بیر نفره
سو کنارینده یخوب یعنی اباالفضلی یره
نیلر عباسی یخان اوخ دگه گرصود امره
نجه اوخ دگدی دییرسن شرف آیینه سینه
بولدی نازک بوغازی کچدی حسین سینه سینه
.
.
چکدی مولا او زمان تیری آخوبدور قانی
اووجونا دوتدی سپوب گوگلره یر سلطانی
دیدی سن شاهد اول ای خلق الیین انسانی
تشنه مظلوم بالادا تابع فرمانوندی
اصغرین قانی دگول بو سنون اوز قانوندی
.
.
سنون عشقونده خدا واریمی یکسر ویردیم
نوجوان قاسم عباسیله اکبر ویردیم
قالمادی آیری کسیم صودامر اصغر ویردیم
چوخ حساب ایله خدایا منیم آزخدمتیمی
عفو ائله اولسا بو نهضتده اگر غفلتیمی
.
.
بیر نفر یوخدی که مندن آلا عطشان بالامی
آپارا خیمه لره بی سر و سامان بالامی
سالا گهواره سینه قانینه غلطان بالامی
وئره باش ساغلیقی امّیدیله یول گوزلیینه
ترپدوب بوش بشیگین اصغره لایلای دیینه
.
.
بیلمورم خیمه لره گلدی نه حالیله حسین
روبرو اولدی نجه اهل وعیالیله حسین
گوئیا اولدی مواجه بو سؤالیله حسین
نجه گتدون بو قُشوندان طلبِ آب ائلدون
دی گوروم اصغریمی سن نجه سیراب ائلدون
.
.
ویرمدی شاه شهیدان بو سؤالاته جواب
ناگهان بیلدی نهان مطلبی دیل خسته رباب
قانلی قنداقی گورنده اورگی اولدی کباب
دیدی صبریله حسین دردیمه درمان ایدرم
مین بیله اصغریم اولسا سنه قربان ایدرم
.
.
دوزدی من اصغره خاطر گیجه لر یاتمامیشام
صبحه جک آغلامیشام لیک اونی آغلاتمامیشام
ولی باشدان هله وار عشقووی من آتمامیشام
گرچه ووردی اورگیمدن بوفلک یاره حسین
دوزه رم هرنه بلا گلسه ندور چاره حسین
.
.
دوغرانوب عرصه ده اکبر کیمی بیر شهزاده
اوز الیلن آناسی بیچدی کفن داماده
چوخی قوچ ویردی من املیک قوزی بوسوداده
بیوک اوغلوم یوخودی نیلیوم حسرت چکیرم
خدمتیم آزدی حضورونده خجالت چکیرم
.
.
اصغرین قانه حسین باتماقینا آغلامیرام
قوجاقوندا یارالی باتماقینا آغلامیرام
منی گوزدن بو سیاق آتماقینا آغلامیرام
آغلارام بو غمه کی بیریول آناسسلمه دی
اون گون عرضینده دویونجا بو بالا صود یئمه دی
.
.
ایشی مشکلده قالاندا علما سسلر اونی
دردمند و فقرا و صلحا سسلر اونی
هرکمین اولماسا دردینه دوا سسلر اونی
چونکه مایوس ایلمزبحر محنده قالانی
سنده #احسان چاغیر امداده او دیلسیز بالانی
.
(1) آل عمران آیه 26 :
قُلِ اللَّهُمَّ مالِکَ الْمُلْکِ تُؤْتِی الْمُلْکَ مَنْ تَشاءُ وَ تَنْزِعُ الْمُلْکَ مِمَّنْ تَشاءُ وَ تُعِزُّ مَنْ تَشاءُ وَ تُذِلُّ مَنْ تَشاءُ بِیدِکَ الْخَیرُ إِنَّکَ عَلی کُلِّ شَیءٍ قَدیرٌ
.
#پندیات
#اصغریه_شهادت
#حضرت_رباب
#خالقین_گور_نجه_الطافی_وار_اوز_بنده_سینه
#احسان_بدرخانی
#ترکی
.
✍️ #زبدةالاشعار ✍️
?: @nohe_torki
نظر دهید