خبر یتیشدی حضرت طاهایه #حسینیه_تائب_تبریزی

در ولادت امام حسین و قمربنی هاشم (ع)
.
.
.
مرحوم تائب تبریزی
.
.
خبر یتیشدی حضرت طاهایه
زهرا ایوی تاپموش عجب پیرایه
بیر تازه گل آچوب علی باغینده
یعنی حسینون گلدی بو دنیایه
حسینوین تولدی مبارک
مبارکدی مبارکدی مبارک
.
.
یا محمّد آیدین اولسون دوعینون
احسان ایدوب خلّاق مشرقینون
زهرایه بیر گل اوزلی تازه مولود
هامی گوزللردن گوزل حسینون
حسینوین تولدی مبارک
مبارکدی مبارکدی مبارک
.
.
یتدی فرح رسول بی همتایه
اولدی روان دودمان مولایه
حسینین آلدى عطرین لبخندیله
سلامدن صورا دئدی زهرایه
حسینوین تولدی مبارک
مبارکدی مبارکدی مبارک
.
.
حسین و زهرایه سالوب تا گوزین
مخاطب ایلدی رسول اوز قزین
آلوب کناره گون سهیل اولدوزون
سروریله تکرار ایدوب بوسوزین
حسینوین تولدی مبارک
مبارکدی مبارکدی مبارک
.
.
دیدی حسین حبیب لم یزلدی
گوزل یوزی طلیعۀ ازلدی
چوخ چوخ گوزل گلوب گیدوب دنیادن
اما حسینیم هامودان گوزلدی
حسینوین تولدی مبارک
مبارکدی مبارکدی مبارک
.
.
انگیزۀ مهر و وفا حسیندور
آئینه صدق و صفا حسیندور
حسین مندندی منم حسیندن
آدی دوا ذكرى شفا حسیندور
حسینوین تولدی مبارک
مبارکدی مبارکدی مبارک
.
.
شعبان اوچونده عشق شاهی گلدی
شاهین دالنجا سر سپاهی گلدی
دیماقا تهنیت ام البنینه
دلده بوسوز کربلا شاهی گلدی
عبّاسوین تولدی مبارک
مبارکدی مبارکدی مبارک
.
.
بونور دیدۂ گوهر پاشیمدی
غم گونونده یاریمدی یولداشیمدی
محبتیم جوشور داشور گورنده
قانی ایسّی وفالی قارداشیمدی
عبّاسوین تولدی مبارک
مبارکدی مبارکدی مبارک
.
.
اؤپدی علی او باصفا الیندن
او سرو قامتی رسا الیندن
اؤپوب دیدی بو الدی کربلاده
دوتان غریب کربلا الیندن
عبّاسوین تولدی مبارک
مبارکدی مبارکدی مبارک
.
.
.
.
#حسینیه #عباسیه_تائب_تبریزی #عباسیه
#حسینیه_میلادیه #عباسیه_میلادیه
#خبر_یتیشدی_حضرت_طاهایه
#ترکی
#زبدةالاشعار