حالات حضرت قاسم علیه السلام
.
✍️ زبدة الاشعار ✍️
?: @nohe_torki
.
شمس شاب تبریزی
.
خرابات بلا دولموش غریبه بوی قاسمدن
دوشوب پیر طریقت حیرته یاهوی قاسمدن
.
مراد نامراد ایلوب مریدین ذکریدن محروم
قیروب زنارینی چلتار خونینون ایدوب مقسوم
گزور کشکولی اللرده عجب معلوم و نامعلوم
مخضب پوستین اولموش مهیا موی قاسمدن
.
قوای خمسه سست اولدی آلشدی خرمن رابع
اولوبلار صوت سفلایه تماما علویان سامع
عروس حجله گاه غم گورنده بختینی لامع
فلک چوگانی شرمنده اولوبدور گوی قاسمدن
.
وصال یار قصرین سیل خون افسوس اولا یخدی
دل شهزاده نی طعن رعیت زاده لر سخدی
محبت آبنوسی تا کمان هجریدن چخدی
خجالت چکمدی هیچ دیده ی آهوی قاسمدن
.
کمال وصلیده دلداریله عهد ایلدی عاهد
نجه عاهد که اسرار لقایه برترین شاهد
اوخ آتماقه حسینه استخاره ایلین زاهد
ایدیدی استخاره کاش او دم گیسوی قاسمدن
.
نزول ایلوبدی ارواح رسل دشت غم افزایه
کلیم و آدم و داوود و نوح اوز قویدی قتلایه
گلوب چرخ چهارمدن باخون احوال عیسایه
اولوب دیوانه دیر عشقیده مولوی قاسمدن
.
کلیم حق عصاسین سیندران فرعون سنگین دل
مصمم اولدی ائتسون طور حق اعجازینی باطل
بساط ننگ سحر سامری بسط اولدی بی حاصل
آسیلدی قلب عالم طره ی جادوی قاسمدن
.
دوشنده زینیدن ناگه عرضدن جوهر آیرلدی
حروف عشقیدن بیر درز عینیله سر آیرلدی
بعیدالفعل تک تا قرب دلدن دلبر آیرلدی
اوپوبدور ذات ذرات وفا زانوی قاسمدن
.
چاغوردی مرشد عشقین مرید باوفا داده
قلندر مثلی سالدی صورت مقصودینی یاده
غریو و های و هوی محتسبدن اولجاق افتاده
آچیلدی خانقاه کربلا یاهوی قاسمدن
.
الا یا ایها الساقی بو دم مخموری درک ایله
شراب وصلیله میخانه ده مهجوری درک ایله
الا ای خسرو خاور شب دیجوری درک ایله
تمنایه گلوب شمع فلک سو سوی قاسمدن
.
چکیلمیش صفحه حسنومده رسمه جدول ابجد
یارا ( هَوََزْ ) آخان قان ( سَعْفَصْ ) و قاشیم خط ممتد
الفبا بولمین قومه نه حاجت مشق یا و مد
بو امی امت ایتمور کسب حکمت روی قاسمدن
.
بنات النعش آرا دوشدوم نفسدن نجم بطحاتک
مه حسنوندن آلدیم جزرو مد عشق دریاتک
آنام خوشدور نوایه چوخ گله پیوسته لیلا تک
سلام ایله او مام ناتوانه سوی قاسمدن
.
بو قان ایچره یاتوب ضعف ایلماقدا اوزگه عالمدی
بو بزم وصلیدور اسراریاره یار محرمدی
قباقیمده تماما قدسیانون قامتی خمدی
او ادنا طاقی گورسنموش مگر ابروی قاسمدن
.
اسور باد مخالف شمع عمری ایلوری تهدید
وصالون شوقی لیک ایلور دوام عشقیمی تمدید
منه هر نیزه وردوقجا دیور ظلم اهلی بی تردید
خموش اولدی عجب بیر شمعیده مشکوی قاسمدن
.
فنون شعره دارا هر کس اولسا درک ایدر هر آن
شه کونینه شاهانه گرک مرقوم اولا عنوان
قسم حقه بو “شمس شاب” ویرمور عرصه ده جولان
فقط سعی ایلور اخراج ایتمسونلر کوی قاسمدن
.
#قاسمیه_شهادت
#خرابات_بلا_دولموش_غریبه_بوی_قاسمدن
#شمس_شاب_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید