خلقت عالم و آدم
#گریز به واقعۀ #کربلا
.
.
سیّد مرتضی موسوی زنجانی
.
.
خلّاق جهان عرش معلّانی یاراتدی
قدرت الی تقدیر و قضایانی یاراتدی
.
سویدی تانیسونلار هامی اول کنز خفینی(۱)
بیر نور جلی اول حق رحمانی، یاراتدی
.
انوار مقدّسلری مشتق ائدوب اوندان
اوندان صورا بو عالم امکانی ، یاراتدی
.
خورشید و مه و کوکب درّی و سماوات
لوح و قلم و منشی والانی ، یاراتدی
.
الطافیله جنّ و ملکی گتدی وجوده
هم دوزخی، هم جنت الاعلانی ، یاراتدی
.
ایستوردی خلیفه اؤزونه خلق ائده یرده(۲)
بیر حکمتیلن آدم و حوّانی یاراتدی
.
تپراقدان ائدوب جسملرین لطفیله ترکیب
قدرت الی صلصالیدن انسانی یاراتدی(۳)
.
روحیندن اونا نفخ ائلیوب ایلدی زنده(۴)
اوز ایستدیقیدی که بو عنوانی یاراتدی
.
امر ایلدی سجده اولا اول پاک وجوده
مخلوقیده بو سجده سجایانی یاراتدی
.
سجده ائلیوبلر هامی جز حارث مطرود(۵)
ابلیسه تکبّر ره اغوانی یاراتدی(۶)
.
اخراج ائلدی باب کرمدن اونی خالق(۷)
شیطان رجیم آدلانوب عصیانی یاراتدی
.
جنتده وئروب آدم و حوّایه سکونت(۸)
خالق اولارا شوکت عظمانی یاراتدی
.
امر ائتدی ییون هر نئی که ایستسه گوگلوز(۹)
حق سیزدن اوتور نعمت الوانی یاراتدی
.
میل ایلمیون بو شجرین میوه سین اما
حکمتله بونی خالق سبحانی یاراتدی
.
تلبیسیله ابلیس ائلدی اونلاری اغوا(۱۰)
حکمت نئیدی؟حق نیه شیطانی یاراتدی
.
القصه بو ایش منجر اولوب اوندا، هبوطه(۱۱)
بیر عمر، او زوجینه پشیمانی یاراتدی
.
یوز دوتدولا درگاه خداونده پریشان
تقصیرلری حال پریشانی یاراتدی
.
چوخ آغلادیلار توکدوله گوز یاشی عذاره
بو درده ولی حق اؤزی درمانی یاراتدی
.
جبریل امین نازل اولوب سویلدی آدم
حق سندن ازلجه گل طاهانی یاراتدی
.
اللهی قسم وئر گل طاهایه بو یرده
اؤز لمعه ی نوریندن او مولانی یاراتدی
.
اللهی قسم وئردی حسینه او گون آدم
عفو ائتدی خدا قلبینی نورانی یاراتدی
.
عمر ائتدیله مدت بو فنا دار دنی ده
بو ، زوج دن الطافیله انسانی یاراتدی
.
مهلت قوتولوب گئتدیله بو دار فنادن
دنیانی حکیم الله اؤزی فانی یاراتدی
.
فانیدی بو دنیا بورا بئل باغلاما انسان
حق سندن اوتور عالم عقبانی یاراتدی
.
سعی ائتگیله چوخ اولماگیلان نفسین اسیری
گئت حق یولونا حق سنه ایمانی یاراتدی
.
تپراقدی وجودین گنه تپراق اولاجاقسان
خالق سنه بو اوّل و پایانی یاراتدی
.
ایستوردی فنا ایلیه نمرود، خلیلی
صحرا دولوسی آتش سوزانی یاراتدی
.
حقدن اولوب امر آتشه برداً و سلاماً
الطافیله نار ایچره گلستانی یاراتدی
.
فرعون جفا پیشه ائدوب دهریده طغیان
حق ایستدی یول گورسه ده موسانی یاراتدی
.
اعجازیله عیساده قدم قویدی جهانه
علّتسیز او معلولی مسیحانی یاراتدی
.
داووده عطا ایلدی حکمتله خوش الحان
چوخ حشمت و جاهیله سلیمانی یاراتدی
.
یعقوبی ائدوب فرقت یوسفده پریشان
بو فرقت اونا دیده ی گریانی یاراتدی
.
یوسف نجه یوسف رخ زیباسی گوزلدی
کیم گورسه اولار عاشق او زیبانی یاراتدی
.
مه صورتینی گوردی زلیخا اولوب عاشق
مجنون اولوب عشق اوندا بو سودانی یاراتدی
.
ناکرده گنه یوسف اولوب سجنیده محبوس
تقدیر الی گویا بو قضایانی یاراتدی
.
یعقوبین اگر یوسفی عالمده گوزلدی
اونداندا گوزل یوسف لیلانی یاراتدی
.
کیم پنج تنون سایه سینه دالدالانوبدی
حق اوندا اؤزی حُسن سجایانی یاراتدی
.
پیغمبرینه ائتدی عطا خُلق عظیمی
تکمیل ائده دین حقی طاهانی یاراتدی
.
ائتدی اونا دلداده ابوطالبین اوغلون
آئینه ی حق مظهر تقوانی یاراتدی
.
پیغمبر اسلامه وئروب حق اونی یاور
شمشیر دو دم ذلت دونانی یاراتدی
.
تقدیریدی چون خلق اولا زوجینیدن انسان
هم کُفو علی حضرت زهرانی یاراتدی
.
لطف حقیلن اولدی خانم امّ الائمّه
بو طاهره دن اون بیر امامانی یاراتدی
.
ایجاده گلوب درّ حسینی بو صدفدن
عالمده او شه نهضت عظمانی یاراتدی
.
دوران دولانوب هجرتین آتمیش بیری گلدی
بو درّ نچه گوهر رخشانی یاراتدی
.
امر ائتدی خدا کعبه نی ترک ایلیه مولا
مسکن او شهه دشت غم افزانی یاراتدی
.
حق باطله تا غالب اولا کرب و بلاده
شاهنشه دین بیر ایله غوغانی یاراتدی
.
دنیانی تحیّرده قویوب عشق حسینی
بو عشقیدی یتمیش ایکی قربانی یاراتدی
.
ظاهرده اونی کوفه لی لر گتدی او دشته
باطنده قدر بیله قضایانی یاراتدی
.
صحرا دولوسی دشمنیدی تیغلر الده
مولایه اولار جبریله دعوانی یاراتدی
.
سو اولمادی ممکن شهدا قانلارین ایچدی
اخیامیده سو صحبتی طوفانی یاراتدی
.
عباسی سو تحصیلینه مأمور ائدوب اول شاه
روباه لری قیرماقا اصلانی یاراتدی
.
هئچ کیمسه ابوالفضله اولامّازدی برابر
بو گوندن اوتور حق او دل آرانی یاراتدی
.
بیر باش ایکی قول وئردی حسین عشقینه عباس
تا دین حقه فرصت احیانی یاراتدی
.
دیناره ساتوب دینلرینی کوفه نین اهلی
نقض ائتماقا مین ناقض پیمانی یاراتدی
.
ظلمیله توکوب خرد و کبارین یره قانین
گویا که خدا کوفه لینی جانی یاراتدی
.
زینب آدیدا ثبت اولونوب عهد الستده
همتله گوزل عهدینه ایفانی یاراتدی
.
اجلال یزیدی پوزا تاراج ائده تختین
خلّاق ازل دختر زهرانی یاراتدی
.
هند اوغلون ائده مفتضح عالمده اودور کی
ربّ ازلی زینب کبرانی یاراتدی
.
شاماتی مسخّر ائلدی نطقیله زینب
اول سوزلریلن که او سخنرانی یاراتدی
.
من«موسویم»درگه مولاده غلامم
بو رتبه منه عزت شایانی یاراتدی
ــــــــــــــــ
(۱)کنت کنزاً مخفیا فاجببت اَن اعرف(حدیث قدسی)
(۲)سوره بقره آیه ی۲۹(انّی جاعلٌ فی الارض خلیفه)
(۳)سوره الرحمان آیه۱۴
(۴،۵،۶،۷،۸) سوره ص آیه ۷۱ الی ۸۳ _ حارث نام اصلی شیطان است.
(۹)سوره بقره آیه ۳۴
(۱۰)سوره بقره آیه ۳۵
(۱۱)سوره حجرات آیه ۱۴
.
#دحوالارض #کربلا #حسینیه
#عاشورا #ورود_محرم
#خلاق_جهان_عرش_معلانی_یاراتدی
#موسوی_زنجانی
#ترکی
#زبدةالاشعار
نظر دهید