شهادت حضرت ابوالفضل (ع)
.
✍️ #زبدةالاشعار ✍️
.
🆔: @nohe_torki
.
هدایت تبریزی
.
خیمه لرده سس دوشوب پرچم یاتوب
ساقی لب تشنۀ عالم یاتوب
.
.
یاره سی چوخدور اونون
چاره سی یوخدور اونون
.
.
کوفه و شام اهلی ایلور هلهله
قوزانوبدور کربلاده ولوله
پرچم خونین دوشوب الدن اله
صاحب پرچم دچار غم یاتوب
.
.
شه گلور اخیامه زار و دیده تر
حالی پوزقون دیده ده اشک بصر
دوتماقا یوخدور قولوندان بیر نفر
قول دوتان قارداشی غرق دم یاتوب
.
.
سسلنور گل باجی سینه داغلیاخ
قارداشم عباسه ماتم ساخلیاخ
اوخشا زینب باجی قارداش آغلیاخ
قاداشم عباس ئولوب خیمم یاتوب
.
.
وار باجی قارداشمین چوخ یاره سی
نیزه خنجر یاره سی اوخ یاره سی
شرح اولونماز حد دن آرتوخ یاره سی
یکسر اعضاسی اولوب برهم یاتوب
.
.
تا یتشدیم باشی اوسته دیده تر
شرح ایده بیلمم گوزوم گوردی نه لر
کشمکش ایلوردی اون یدّی نفر
خاک و خونیله اولوب همدم یاتوب
.
.
اللرین قطع ایلمشدی اهل کین
توپراق اوستن گوتدوم ئوپدوم اللرین
سسلدیم وای قارداشم وای دلغمین
قلبدن دوتدوم اونا ماتم یاتوب
.
.
باغری قان قزلار گرک ایوای دیه
سس چکیب عورت اوشاقلار آغلیه
باشنی ایندی وورالّار نیزیه
قان ایچنده الده سرمایم یاتوب
.
.
بیر حالا قالمشدی اول سیمین بدن
پیکری دولموشدی اوخدان نیزه دن
گورسن عباسی ئولرسن غصّه دن
دردی اعظم ، محنتی اعظم یاتوب
.
.
قارداشم حالین پریشان گورموشم
باش یارالی ، سینه شان شان گورموشم
گوزلری ، آغزی دولی قان گوموشم
لاله اوسته اگلشوب شبنم یاتوب
.
.
ایلیم من شرح غم سوز تاپمورام
حالینی عنوان ایدم سوز تاپمورام
گوز یاراسندان دیم سوز تاپمورام
ساغ گوزونده تیر نامحرم یاتوب
.
.
اولموییدی باشدا ایکاش یاره سی
سجده گه ده اوخ یری ، داش یاره سی
چوخ دریندی زینبا باش یاره سی
افتخار عترت خاتم یاتوب
.
.
گل باجی گل سر دبیریم ئولدی گل
عرصۀ هیجاده شیریم ئولدی گل
گل بئلیم سندی وزیریم ئولدی گل
اولمیوبدی زخمینه مرحم یاتوب
.
.
گور نجه قالدی اوغولسوز بوتراب
غصّه دن اولدی یانان قلبیم کباب
خیمه سین الآن گئدیم ایلیم خراب
همدمِ هر آن و هر لحظه م یاتوب
.
.
آخرین لحظه ایشتدیم بو سوزون
راضی سن مندن ، رضایت ویر ئوزون
راضیم سندن دیدیم ، یومدی گوزون
اوج ایدوب عرشه اودور نالم یاتوب
.
.
یکّه تاز عرصه گاه اجتهاد
ایلدی نفسیله سو اوسته جهاد
ایچمدی سو ایتدی منله اتّحاد
افقه دین ، قائد اعظم یاتوب
.
.
سن دینن قارداشمون گلمز تایی
من دئیم باتدی بنی هاشم آیی
سوز زخم نیزه اولدی لایلایی
یاره لر یورموشدی ، چوخ محکم یاتوب
.
.
ایستدی نچّه وصیّت ایلیه
دلده کی گزلین سوزون واضح دیه
ئولمه میش قارداش آپارما خیمیه
گورمیوم قزلار گوزونده نم یاتوب
.
.
باشی اوسته اگلشوب جان جان دیدیم
یوخدی بو ایثاریوه جبران دیدیم
جانمی قارداشمه قربان دیدیم
ایلیوب ایثار او گل چهرم یاتوب
.
.
وار یری باجی بو دنیادن دویام
زنده قالماخدان جهاندا ال یویام
اولمادی فرصت اونی قبره قویام
گون قاباقندا گل سینه م یاتوب
.
.
#عباسیه_هدایت_تبریزی
#عباسیه_شهادت
#خیمه_لرده_سس_دوشوب_پرچم_یاتوب
#ترکی
.
✍️ #زبدةالاشعار ✍️
.
🆔: @nohe_torki
نظر دهید