ماجرای رسول ترک
#گریز #غارت_خیام
.
.
علیرضا حضرتی (ناعمی)
.
.
دئ «یاحسین» کی قلبه بو آددان صفا گلر
نور و سرور و رحمت بی انتها گلر
.
کوی ارمدی، روضۀ رضواندی روضه سی
یول تاپماز اؤزگه لر بورا، اهل وفا گلر
.
دعوت یازار حسین چیلره حضرت حسین
مولانون اؤز قوناقیدی هر کیم بورا گلر
.
فرش ایلیر فرشته بو مأوایه شهپرین
حور و ملک دیلینده بو بزمه دعا گلر
.
گؤز یاشینون بهاسینی زهرا بیلر فقط
بازار عشقه حضرت خیرالنسا گلر
.
ناب اولسا گوهرون نظر خاص اولار سنه
خوشبخت او کس کی بزم غمه بی ریا گلر
.
سعی ایله لایق اول بو شرافتلی درگهه
بو درگه مقدسه چون انبیا گلر
.
وئرمه حسینون هیأتینی مال و ثروته
شاهلار بو آستانیه مثل گدا گلر
.
مأیوس اولما سنده بو دولت سرایه گل
عالم بو باب رحمته دلده رجا گلر
.
قؤماز حسین قوناقینی زهرایه آند اولا
گبر و مجوس ایلر اونا التجا گلر
.
ال اوزمه دامن کرم شاه عشقیدن
هر کیم ال اوزسه، باشینه مینلر بلا گلر
.
هر کیم گله بو درگهه شأن و شرف تاپار
خورشید قدری، ذرّه، آلار اعتلا گلر
.
غم ایلمه گناهون اگر وار منیم کیمین
ذرّاتخانه دی، بورا مسدن طلا گلر
.
گل بیر گؤزل حکایت ائدوم من سنه بیان
گور نوکری بو حضرتین هاردان هارا گلر
.
مست شرابیدی، گئنه بی اختیاریدی
گؤر مست اولان نئجه یولی باشدا هوا گلر
.
نعره چکوردی، وحشته دوشموشدی هر باخان
ایوای قاچون، دئیوردیله بوندان خطا گلر
.
بیر سس ائشیتدی تیتردی اعضاسی ناگهان
گؤردی وجودی رعشیه سر تا به پا گلر
.
ماه محرّمیدی، حسین وای سسی او سس
بو سسدن آه و نالیه ارض و سما گلر
.
سرعتله قاچدی ایلدی تطهیر آغزینی
وجدانیدن قولاقینه گؤردی ندا گلر
.
اهل گناهیدی، ولی دلدادۀ حسین
اوندان بروزه ایلده همین ماجرا گلر
.
قاچدی یئتیردی تئز بیر عزاخانیه اؤزون
یعنی حسین عزاسینه هر کیم اولا، گلر
.
قوشدی اؤزون جماعته سسلندی «یاحسین»
عالم دئدی قاپوندا فغانه آقا! گلر
.
قول چیمرادی، کچوب آرادا دوگدی سینیه
عاشق گلنده بزم غمه خوش ادا گلر
.
اما اونون حضوری گلوب بعضینه گران
سویلوبله هیأته نئجه ائتمز حیا گلر؟
.
بو لاابالی شُهره دی فسق و فجوریده
چون کی الیندن هر نئجه جور و جفا گلر
.
میخانه لرده عربده کش دی گئجه گونوز
عمری بونون قماریله دائم باشا گلر
.
هیأتده اولماقی بیز ایچون کسر شأنیدور
مردم دئیلله بیر بیره، گؤر کیم اورا گلر؟
.
تصمیم دوتدولا اونی القصّه قؤماقا
بزم حسینه یعنی کی اهل ولا گلر
.
مسئول هیأت ائتدی مخاطب اونی دئدی
بیر سؤز واریم سنیله، دیله برملا گلر
.
راضی دگول بو هیأتین اهلی حضوریوه
بو جمعه، کیمدن اولسالار اعضا رضا گلر
.
مجلسده اولماقون بیزی معناده اینجیدور
خفّت بیزه بو امریدن ای مبتلا! گلر
.
گئت اؤز مسیریوه، بورا قرآن مسیریدی
سن تک فجوره غرق اولان هئچ بو یولا گلر؟
.
دنیا دولاندی باشینه ناگه او لحظه ده
فریاده چوخلاری دیدی پرمدّعا گلر
.
اما حسینون هیأتینه حرمت ایلدی
دیللنمدی، کی رخوته بزم عزا گلر
.
باشین سالوب اشاقه او مأوانی قیلدی ترک
جان فکر ائدردی جسمیدن امّا جدا گلر
.
اگلشدی یولدا، اؤز اؤزونه سالدی بیر نظر
بار گناهیدن دئدی قدّیم دوتا گلر
.
باخ ای رسول! گور یئتیشوبدی ایشون هارا
سندن حسین عزاسینه خفّت روا گلر
.
بسدور اویان، حسین قاپوسینداندا قؤدولار
بو آستانه دن قؤولان بینوا گلر
.
بیچاره من؛ گئدیم هارا؟ السّاعه نیلیوم؟
الدن گئدوبدی صبر و قراریم فنا گلر
.
سیندی اؤزونده، منزله ئوز قویدی آهیلن
قلبیندن عرشه اوج ائلیوب آه و وا گلر
.
دیوانه لر کیمین چالیشوب چیرپینوردی هی
قلب اولسا مُنقلب، ائله بو مقتضا گلر
.
مسئول هیأتین ولی باخ نقل قولونا
گور عاشق حسین نئجه غمدن رها گلر
.
خوشحالیدیم کی قؤموشام اول مرد مُفسدی
یعنی دئیوردیم هیأته دای مطلقا گلر
.
گئتدیم ائلیکی من ائوه هیأتدن أُول گئجه
گؤردوم یوخی بو گؤزلریمه جابه جا گلر
.
یاندیم به نوعی بیر یوخی گؤردوم گئجه یاری
فکر و خیاله منظرۀ کربلا گلر
.
بیر یاندا خیمه گاهیدی، بیر یاندا رزمگاه
اُول سمتیدن سرور، بو یاندان نوا گلر
.
باخدیم سپاه کوفیه قان اولدی گؤزیاشیم
سایسیز گؤزومده گؤردوم او قوم دغا گلر
.
هر کیمسه اؤز سلاحین ایتیلدیردی نصف شب
تیز اولسا چون سلاح، جدلده کارا گلر
.
شمشیرلر، جدالر ائدور خیره گؤزلری
هر جسمه دگسه زخم لری جان گزا گلر
.
عزم ایلدیم کمکسیز امامین خیامینی
عرض ایلیم آقا سنه بیر جان فدا گلر
.
ناگه قاباق چیخوب منه اخیامیدن بیر ایت
گؤردوم بئله هوره هوره، وحشت فزا گلر
.
دقت کی ائتدیم، حیرتیم آرتدی او صحنه ده
یارب نئجه بیر ایتدی بو، آدم نما گلر؟
.
غیظیله ایستیوردی منه حمله ایلیه
بوندان باشا یقیندی کی مین ابتلا گلر
.
وحشت ائدوب ایتیردیم او دم ال ایاقیمی
اما نه گؤردوم؟ اوندا خِیَمدن صدا گلر
.
بوشلا رسول بو گله نی، کوفه لی دگول
گرچه گلن بو گون بورا ظلم ائتماقا گلر
.
شاهین حضورینه منی یول وئردیلر غرض
گؤردوم کی عرشیدن باشیم اوندا اوجا گلر
.
احوالیمی سؤروشدی دانیشدیردی لطفیلن
شاهدان غلامینه بلی لطف و عطا گلر
.
فرمایش ائتدى عرض ارادتلرون قبول
سندن واریمدی بیر گِله اما بجا گلر
.
سن قؤموسان منیم اؤز ائویمدن قوناقیمی
یاخشی یامان منیم قاپیما هكذا گلر
.
فوراً گئدوب آلارسان اونون گویلونی اؤزون
ایسترسن هیأته صاباح عشقیله تا گلر
.
غم ائتمه آستان حسین مثل کُرّدور
تطهیر اولا، نجسده بورا ای بسا گلر
.
دوردوم ایاقه من، باش آچیق، هم ایاق یالین
تأخیریم اولسا یار دئدیم نارضا گلر
.
کوچه به کوچه گزدیم ائوین تاپدیم الغرض
حیرانیدیم دیله نئجه بو ماجرا گلر
.
دوگدوم هزار فکر و خیالیله من قاپی
بو وقتیده نه حالدا قاپی آغزینا گلر؟
.
چوخ چکمدی، آچیلدی قاپی گؤرسنوب رسول
گؤردوم كوسوب، بئله گؤزه بی اعتنا گلر
.
قول فوری بوینونا سالوب، اؤپدوم ئوزون گؤزون
قهر ائتسه کیمسه، دردینه بو ایش دوا گلر
.
یالواردیم أذن وئر کی الوندن اؤپوم سنون
شرمنده یم، مگر غمیمه انتها گلر؟
.
من التماسیده او ولی امتناعیده
حیرت حالیندا هی دیلینه لفظ لا گلر
.
سسلندی علتین دئ بو رفتاریوین منه
اول ایش ندی؟ بو ایش ندی؟ حیرت فزا گلر
.
شرح ایلدیم قضیه نی باشدان باشا اونا
گؤردوم کی منقلب اولوب حالدان حالا گلر
.
او آغلادی من آغلادیم هی تؤكدوگ اشک شوق
آخدوقجا گؤزیاشی اورگه انجلا گلر
.
دیوانه لر کیمین ایاقا دوردی ناگهان
قربان دئدی او شاهه کی اوندان عطا گلر
.
به به کی کلب درگه ارباب اولوب رسول
فخر ایلرم کی کلب حسین باوفا گلر
.
مولا منیم بو ایتلیگیمی ایلیوب قبول
قیلسا کرم دوباره وظیفم ادا گلر
.
بوندان بئله حسین قاپیسیندان ال اوزمرم
بو آستاندا شأن و شرف انسانا گلر
.
ای کاش کربلاده اولیدی بو كلب زار
فکر ایلینده نالیه بو بینوا گلر
.
تک قویمازیدیم اوردا گر اولسیدیم، حضرتی
غربتده درده چون دل درد آشنا گلر
.
اطرافینی گزردیم او شاهین خیامینون
اولما ملال و محنته آل عبا گلر
.
ایلردیم اهل بیته حمایت چتین زمان
اوندا کی غارت عزمینه اهل جفا گلر
.
#گریز #غارت_خیام
.
ایوای او لحظه دن تؤكولوب خیمیه قوشون
دورت سمتیدن هجوم ائلیوب اشقیا گلر
.
دیل قانمیان عرب، داش اورک، رحم و فهمی یوخ
غارت خیالی باشدا او قوم دغا گلر
.
مور و ملخ مثالی اَنُور تلّی خیمیه
سایسیز سپاه عدّه سی حاشا سایا گلر
.
آتلار ایاقی آلتدا گلوب یئر تزلزله
تفسیره سانکی معنی «زلزالها» گلر
.
غوغا قؤپوبدی سس اوجالوب آسمانلارا
اخیامه داد و قالیله اهل جفا گلر
.
فکر ایله گؤر رقیّه نه حاله قالوب او دم؟
وحشت ائدوب فغانه او فرّخ لقا گلر
.
آل على قاچوبلا هامی زینبه ساری
ایوای دئیولَّه چاره قیل عمّه! بلا گلر
.
عبّاس یوخدی کوفه لیلر قورخودان چیخوب
بیرده مگر هرایه او صاحب لوا گلر؟
.
چون سیل خیمه گاهه دولوب کوفیان شوم
بعضی الینده قمچی سی، بعضی جدا گلر
.
بیربیر طنابلر یولونوب، یاتدی خیمه لر
آل رسولین عزّتی یعنی فنا گلر
.
عورت اوشاقدی خیمه سرادن چیخوب قاچور
بی آشیانه قوشدی کی بیلمز هارا گلر
.
آتلی پیاده کوفه لی اما قاباق چیخور
دردانه لر گؤروب اولاری دیلده وا گلر
.
سویغونچولار ال آچدیلا ظلمیله غارته
غارت دئمه کی محشر کبرا به پا گلر
.
تنگ ائتدی عرصه نی او زمان تازیانه لر
شدّتله ظالمانه انوب باشلارا گلر
.
الدن اله دوشوب یولونان گوشواره لر
قیزلار چوخی فغانه قولاقدا یارا گلر
.
رحم ایلمز رقیّیه، عبّاسی ئولدورن
بو غمدن آه و نالیه خیرالنسا گلر
.
غارت اولوندی خیمه سرا آز زمانیده
هر خیمه اوسته مین سپه فتنه زا گلر
.
نه گاهواره قالدی، نه عمّامه، نه ردا
بیر کوفی الده معجر، او بیرسی عبا گلر
.
غارت زده خیامه، ستملن ویریلدی اود
شعله اوجالدی، رعشیه عرش خدا گلر
.
قیزلار داغیلدی چوللره ال باشدا، دیلده آه
صیاد الیندن آهو گؤروبسن رها گلر؟
.
بیر خیمه دن سؤز آچسام اولار قان گؤزون یاشی
اوندا نوایه حیدر، او شیر خدا گلر
.
اوددان اودا ویروردی اؤزون زینب حزین
جاریدی اشکی، سسلوری واویلتا گلر
.
الله ترحّم ایله، بالام یاندی خیمه ده
کیم دادیمه بو لحظه ده سندن سورا گلر
.
عبّاسی دوغرویوبلا کنار فراتیده
حاشا هرایه اول قولی تندن جدا گلر
.
راوی دئیور نه گوردوم اؤزون ویردی اودلارا
ایثار و عشقینه خانیمون مرحبا گلر
.
یاندی دئدیم، چتین قوتارا جان بو شعله دن
پروانه دوشسه شعلیه، آخر فنا گلر؟
.
قاچدیم قباقه ایش هارا منجر اولور گؤرم؟
یاندی اَلوؤدا، دیشره او اوددان و یا گلر؟
.
بویلاندیم هر طرفدن، اَلوؤ قویمادی باخام
موج ایلیوردی شعله لری شعله زا گلر
.
دامن کشان، نه گؤردوم او دم چیخدی خیمه دن
قان آغلیور دیلینده علی وای بالا گلر
.
تبدار بیر جوانی چکوبدی قوجاقینه
یافاطمه دئیه دئیه، ایلر نوا گلر
.
شرحی چتیندی، گه یخیلوب، گه دورور خانیم
هر زحمتیله خیمه دن اولموش جدا گلر
.
هردن گؤزون آچوردی او بیمار کربلا
سسلوردی عمه جان! سنه جانیم فدا گلر
.
جبران ائدنمرم بو قدر زحمتون سنون
گؤرسم نه ایش بی بی زحماتون ادا گلر؟
.
الله منه، بو قیزلارا چوخ گؤرمسون سنی
طاقت یوخومدی، بیرجه الیمدن دعا گلر
.
#ورود_محرم #حضرتی_ناعمی
#رسول_ترک #حسینیه_ورود_محرم_حضرتی_ناعمی
#دی_یا_حسین_کی_قلبه_بو_آددان_صفا_گلر
#ترکی
#زبدةالاشعار
نظر دهید