مقدمه شهادت حضرت علی اکبر علیه السلام
.
✍️ زبدة الاشعار ✍️
?: @nohe_torki
.
مرحوم حسینی سعدی زمان
.
دل دولوبدور غنچه تک قانیله دلدار آختارور
گوز بولود تک یاش توکور گُل یوزلی بیر یار آختارور
.
دیدۀ شب زنده داریم صبحه تک اولدوز سایور
هر یانا حیران باخور بیر ماه رخسار آختارور
.
چشمۀ چشمیمده وار بیر سرو قامت منظری
دل ویروب باش دیده دن بیر سرو رفتار آختارور
.
اوزگه لر اولسا سلامت یا گوزل گوز عاشقی
عشق بیماری همیشه چشم بیمار آختارور
.
تارِ عمریم بسته دور بیر نقطۀ خال لبه
گوزلریم بو نقطه نی مانند پرگار آختارور
.
ایلیوب تارِ دله تاثیر مضراب فراق
شوریله ایلور نوا بیر طُرّۀ تار آختارور
.
من شکسته قلبیله نورسته بیر گُل عاشقی
حیف اولا گُل گُلسِتاندا صحبت خار آختارور
.
آیریلان گوندن گُلیمدن باخمارام رنگ گُله
قان اولان گوگلوم نه گُل نه سیر گُلزار آختارور
.
نینوا دشتنده سالّام یاده بیر خندان گُلی
ایله بیر گُل گُلسِتانلار تا جهان وار آختارور
.
بیر قوجا قدّی بوکولموش باغبانی وار اونون
باغبانی اوز گُلین گُلزاریده زار آختارور
.
گُل نه گُل گُللر او نا عاشق، علی اکبر آدی
بیر اوغولسوز شه اونی میداندا آغلار آختارور
.
جور و بیداد مخالفدن شهنشاه حجاز
قوس قامتله نشانِ تیر اشرار آختارور
.
وای اوغول دلده – محاسن اَلده – گوزده خونِ دل
اوز جوان اوغلین آتا با چشم خونبار آختارور
.
گه گیدور گه سَسلَنور ای نوجوانیم هارداسان
بُلموسن یالقوز آتان بیر یاور و یار آختارور؟
.
هارداسان سَس ویر سسون قربانی دوشدوم نطقدن
نخلۀ عمریم سنون تک حاصل و بار آختارور
.
خیمه دن عرشه چخوبدور واعلیّا ناله سی
جدّیمون آئینه سین اولاد اطهار آختارور
.
چوخ دولاندی تاپدی آخر باغبان اوز نوگُلین
بیر گُله مین خار گوردی قصد آزار آختارور
.
شه گوروب شهزاده نی بی اختیار آتدان دوشوب
کوفیان گوردی آتا – فرزند دلدار آختارور
.
قلبینون بندین قیروبلار دیزلری گَلمور دورا
قلب عالم طاقت دلبند مضمار آختارور
.
عین عین الّلهی قانیاش دولدوروب دریا کیمی
ایله بیر دریا همیشه ابر آزار آختارور
.
چشمۀ چشمی یوزه اشکین توکر باران کیمی
ئوز عزیزین عزّت دنیا و دین خوار آختارور
.
دیزلری اوسته سوروندی شاهِ دین یِدّی قدم
گوردولر قلبی سنوب جَبریله جبّار آختارور
.
تا یِتشدی باغرینا باسدی داغیلمیش پیکرین
سسلدی دور – بو کمکسیز بیر مددکار آختارور
.
قویدولار یالقوز اوغولسوز – من غریبی کوفیان
بو غریبین قتلینی قرخ مین جفاکار آختارور
.
بو منیم قانیمدی جسموندن رواندور سو کیمی
قانیمون سفگین عبث بو قوم خونخوار آختارور
.
من اوزوم ئولّم اگر بو قوم دون ئولدورمَسه
قتلیمه بیجا سپاه کینه اصرار آختارور
.
ای «حسینی» خوش اثردور سوزلرون سندن صورا
صاحب علم و هنر عالمده آثار آختارور
.
ارزش اشعاروی با فضل شعر اهلی بُلر
شخص دانشمند و فاضل بیله اشعار آختارور
.
#اکبریه_شهادت
#سعدی_زمان
#دل_دولوبدور_غنچه_تک_قانیله_دلدار_آختارور
#لمعات_حسینی ص 139
#ترکی
.
✍️ #زبدةالاشعار ✍️
?: @nohe_torki
نظر دهید