در مدح ، میلادیه و شجاعت حضرت علی اکبر علیه السلام
#گریز به شهادت
.
.
مرحوم احمد رمضانی ( دلکش زنجانی )
.
.
دل عشّاقه داخی تاب و توان گلمیه جاق
قالب جسم احبّایه ده جان گلمیه جاق
کشته ی عشق بلی روح روان گلمیه جاق
یعنی بو عصره مسیحای زمان گلمیه جاق
علی اکبر کیمی دنیایه جوان گلمیه جاق
.
.
دوغمیوب مادر گیتی بو لیاقتده اوغول
نه اوغول مکتب دانشکدهٔ علم و عقول
وارث معرفت فضل و علومات رسول
سرو گلزار امامت ثمر قلب بتول
بلی تعریفینه یارایه لسان گلمیه جاق
.
.
او جوان علوی پاکدل و پاک ضمیر
باباسی حیدر کرّار کیمی شیر دلیر
پنجهٔ نصرت آچوب قیلدی جهانی تسخیر
شهرت خدمتی عالمده اولوب عالم گیر
حشر اولونجا بونا همپایه عیان گلمیه جاق
.
.
ظاهر ائتدی ائله تابنده قمر صبح ازل
تا طلوع ائتمگیلن وئردی بو دنیایه حلل
اوئیدی صورت پیغمبره عالمده مثل
حیف صد حیف اوگونی تئز بورودی ابر اجل
اوگونون مثلی بو آفاقه اینان گلمیه جاق
.
.
عاجزم من دئمگیمده بو جوانین سوزونی
حسن اخلاقینی تعریف ائلیوم یا اوزونی
قاشلارین نظمه چکوم یا ایکی شهلا گوزونی
وصف ائدوم لعل لبون یاکه دیوم گل یوزونی
بئله عالملری حیرتده قویان گلمیه جاق
.
.
هانی عالمده حسین بن علی مثلی بشر
صاحب لطف اولا هم منبع احسان و هنر
هانی لیلا کیمی عورتلر ایچینده مادر
تا وجوده گله اونلاردان ائله مه پیکر
او اوغول،اول آتادان ، اول آنادان گلمیه جاق
.
.
او گُل اوزلی بالانون گویچک آدی اکبریدی
ادب و فهم و کمالی هامودان بهتریدی
وجه نورانی سی آئینه ی پیغمبریدی
حُسنوده یوسف مصری اونا بیر نوکریدی
بو ملاحتده فصاحتده جوان گلمیه جاق
.
.
بو حسین اوغلودی یوسف بونا همپایه دگُل
هانی یوسفده بو حسن و بو رخ و بو کاکل
قدّی رعنا گوزی شهلا ئوزی ئوزی زیبا لبی گل
طاق ابروسی مه یک شبه زلفی سنبل
قسم اللهه بئله سرو روان گلمیه جاق
.
.
نجه ال چکدی الهی بو جواندان لیلا
گوردی اولدم که اولوب عازم میدان او بالا
مرحبا صبرینه لیلانون ایا اهل عزا
ائتدی ئوز قلبینی چون امر خداونده رضا
یقین آفاقه بئله جان جهان گلمیه جاق
.
.
سویلدی دورما گئت ای سرو خرامانیم اوغول
سن گئدن یوللارا قربان اولا بو جانیم اوغول
گئتمگونله یاناجاق قلب پریشانیم اوغول
ابر تک یاش توکه جاق دیدهٔ گریانیم اوغول
من کیمی اودلارا دنیاده یانان گلمیه جاق
.
.
غرض اکبر ائلدی حضرت لیلانی وداع
یوز قویوب رزمگهه گئتماقا اول ماه لقا
غلط اولماز دئسم آغلوردی او ساعت زهرا
باشدان عمامه سین آلموشدی اله شیر خدا
بولدولر بیرده بئله جلوه کنان گلمیه جاق
.
.
یتیشوب رزمگهه برج حسینون ماهی
جلوه لندیردی فدا گلمگی قربانگاهی
گوستروب صورت زیبای رسول اللهی
قویدی مبهوت تماماً قشون گمراهی
ماسواللهه بئله نام و نشان گلمیه جاق
.
.
وجه اکبردن از اینکه اوجالوب لمعه ی نور
ائلدی کرب و بلا دشتینی چون وادی طور
گوردی بو واقعه نی قوم ستمکار و شرور
دئدیلر ختم پیمبردی بو ایلوبدی ظهور
بونا بیزدن اوخ آتان نیزه وران گلمیه جاق
.
.
بیلدی بن سعد دغا لشگر ائدور ئوزگه خیال
بو خیالیله اله گلمیه جاق قصد جدال
دئدی ای قوم بودور اکبر مه پاره جمال
وئرمیون سیز بو جوانه دم هیجاده مجال
داخی دنیایه رسول دو جهان گلمیه جاق
.
.
وئردی فرمان سپه کوفیه اول مرتد دون
ایلیه حمله علی اکبره بالمرّه قشون
جنگه ال قویدی چون اول طایفهٔ پست و جبون
کربلا دشتینون اوضاعی اولوب دیگر گون
ایله جنگ عالمه گلوبدی همان گلمیه جاق
.
.
حجت الله بالاسی دوتدی الینده شمشیر
اوجا صوتیله دئدی جانیله دلدن تکبیر
لشگره وردی ئوزون مثل غضبلنمیش شیر
استقامت ائده بیلموردی ائله جمع کثیر
ائله دعوا ائله بیر شیر ژیان گلمیه جاق
.
.
بئله جنگ ایلدی فرزند شه گردون فر
سیندی صفلر پوزولوب نظم داغیلدی لشگر
قلجون برقی اولوب گوگده مثال آذر
باش بدندن آیروب قالدی بدنلر بی سر
ائله تاریخ ائله تاریخی یازان گلمیه جاق
.
.
گرم دعوائیدی اول تازه جوان شه دین
کوفیان آلدی آرایه اونی مانند نگین
هر طرفدن اوخ آتان نیزه وران ائتدی کمین
حالین افسرده گوروب دشمن آچوب جرأت الین
روبهان ال تاپا ضرغامه هاچان گلمیه جاق
.
.
بسکه اوخ وردیلا اوخ پارچالادی ساق و صولون
گئتدی طاقتدن او مه پیکر آچوب ایکّی قولون
مضطرب حالتیله دوتدی عقابین بوینون
سویلدی ائتمه تأمّل داخی دوت خیمه یولون
بو قشوندان منه بیر قلبی یانان گلمیه جاق
.
.
بین لشگردن ائله حالیله ایلردی گذر
وردی شمشیریله فرقیندن اودم بیر کافر
پارچالاندی باشی گویا که دونیم اولدی قمر
سیَلان ایلدی قان دولدی او شهلا گوزلر
ائله بی عاطفه شمشیر وران گلمیه جاق
.
.
داخی طاقت گتوره بیلمدی دوشدی آتدان
دوشجگین دور ائلیوب آلدی ارایه عدوان
دوتدی یوز خیمه طرف عرض ائلدی گل باباجان
اکبرون درک ائله ای پادشه کون و مکان
خیمه گاهه داخی اوغلون بو زمان گلمیه جاق
.
.
ختم قیل یازما داخی«دلکش»محزون و ملول
خدمتون دائم اولا محضر مولاده قبول
زحمتون اجرینی لطف ایلسون اولاد رسول
متوجه اولا هر آن سنه زهرای بتول
سنکیمی عصره بئله مدح یازان گلمیه جاق
.
.
#اکبریه_میلادیه
#اکبریه_مدح
#اکبریه_شجاعت
#اکبریه_شهادت
#دل_عشاقه_داخی_تاب_و_توان_گلمیه_جاق
#دلکش_زنجانی
#ترکی
.
نظر دهید