اربعین
.
✍️ #زبدةالاشعار ✍️
.
🆔: @nohe_torki
.
#سبک_ای_حرمینه_ناز_ایدن …
.
حاج حسین حسنی تبریزی
.
دور آنام اوغلی قزلارون ناله کنان گتیرموشم
شامیدن اربعینوه سینه زنان گتیرموشم
.
.
یاتما دل ترابیده آز منه ایندی ناز ایله
قلبی شکسته دور باجون زینبی سرفراز ایله
دور ایاقا اوزون گلن قزلاری پیشواز ایله
بیر نچه باشی قاره لی قلبی یانان گتیرموشم
.
.
سن یخلاندا تپراقا اولدی منیم قیامتیم
غارت اولاندا خیمه لر گیتدی جلال و شوکتیم
کوفه ده باشیوی گوروب اولدی خمیده قامتیم
بو سفریمده ارمغان قدّ کمان گتیرموشم
.
.
باشوین آردیجا گزوب نار غمونده یانموشام
کوفه مصیبتی گوروب شامی گیدوب دولانموشام
بیر نچه گون خرابۀ شامده دالدالانموشام
ایندی همان خرابه دن شرح و بیان گتیرموشم
.
.
تا که خرابه گوشه سی اولدی مکان رقیه وه
خارجی آد قویوبدولار شمر و سنان رقیه وه
طعن و شماتت اولدی چوخ اوردا همان رقیه وه
دلده او نازدانه دن درد گران گتیرموشم
.
.
عشقینی اهل عالمه اوردا بالان نشان وئروب
گلشن دینه گور نجه رونق جاودان وئروب
دینه اوزین فدا دیوب باشوین اوسته جان وئروب
من او یتیمه دن نشان اشک روان گتیرموشم
.
.
چوخ سنی آرزو اخا ایلدی بینوا باجون
غسل ویره کفن ایده تاپمادی آشنا باجون
قبره قویوبدی قبرینون اوسته دوتوب عزا باجون
روحیم او یرده دفن اولوب بیر قوری جان گتیرموشم
.
.
جان ویروب اول یتیمه قز سینه می منده داغلادیم
گوزلرینی عزیزه وین معجریمیله باغلادیم
باخدی بالالار آغلادی حالینه منده آغلادیم
دلده او نازدانه دن داد و فغان گتیرموشم
.
.
سندن اخا او خردا قیز زینبه یادگاریدی
عمّۀ دلفکارینه همدم لیل تاریدی
باد خزانیله سولوب غنچۀ نوبهاریدی
دلده اودور شکایت باد خزان گتیرموشم
.
.
شورشه گلدی شامیان یاندی رقیّه حالینه
رخنه یتیشدی دشمنین شوکتینه جلالینه
علّت اودور یزید دون دوشدی صفا خیالینه
شمّۀ ماجراسینی ایمدی عیان گتیرموشم
.
.
کوینگون الده گل کیمی گور نه سولوب سارالموشام
آغلیا آغلیا بونی دشمن الیندن آلموشام
شال عزا تک ایمدی بو قبریوین اوسته سالموشام
سن کیمی بیر شهید دن قانلی نشان گتیرموشم
.
.
گوردوله زینبین هامی ناله سینون ادامه سین
سالدیلار هر شهیدین ئوز قبرینون اوسته جامه سین
لیلی اله آلوب او دم اکبرینون عمامه سین
سسلدی قویمیوبدی بو منده توان گتیرموشم
.
.
گوردوله عرشه اوج ایدور آه و فغانی لیلینون
سسلوری ای اوغول علی جسمیده جانی لیلینون
حقّیدی آغلاماق ئولوب تازه جوانی لیلینون
گور نه سرشگیمی ایدوب دیده ده قان گتیرموشم
.
.
آیری طرفده باشلانوب شوریله یاسی قاسمون
دیللره ایلیوب اثر بس که عزاسی قاسمون
اهل عزانی یاندیروب قانلی لباسی قاسمون
سویلور آناسی آدوی ورد زبان گتیرموشم
.
.
سالدی رباب یادینه اصغر ماه پاره سین
قویدی مزارین اوستونه خرداجا گاهواره سین
ویردی نشان رقیّه نون قزلارا گوشواره سین
اکبرینه دئدی نشان من بو زمان گتیرموشم
.
.
گوردوله فاطمه او دم باشلادی شور و همهمه
آغلیا آغلیا گئدوب جانب نهر علقمه
سویلوری مثلون ای عمو گلمیه جاقدی عالمه
الده سو مشکیوی سنه ناله کنان گتیرموشم
.
.
یوخ بیری من کیمی اولان غرق گناه معصیت
دوره لیه منیم کیمی بیله سپاه معصیت
چون «حسنی» گیدوبدی چوخ دهرده راه معصیت
معصیتی یووان دییر اشک روان گتیرموشم
.
.
#اربعین_حسنی_تبریزی
#دور_آنام_اوغلی_قزلارون_ناله_کنان_گتیرموشم
#ترکی
.
✍️ #زبدةالاشعار ✍️
.
🆔: @nohe_torki
نظر دهید